Read South Giziga ACT 17 Bible Online

ACT 17 - South Giziga bible

ACT 17

¹A zuɓam jiviɗ, a cohom ti Amfipolis ati Apoloni, a ndilam a Tesaloniki. Hay ngi diradibiɗ ngi Yudehey ada a diga.

²Pol ara luuma Yudehey anga kaɓa naŋ maga hõyyõ. Hin ngi sabat aseˀe aseˀe sar makir, ara ɓa taŋ mingiɓi ngir Ɓimutoho.

³A mbiɗa taŋ pulaˀavra naŋ, a biga taŋ di kaɓa mutohoko na: «Sey Mesi a si bonoy seˀ le, a slikiɗ ti wuzla mumucahaya.» A ɓi: «Yesu ya matulukum di mi na, i Kristu vuna.»

⁴Mekelemey a wuzla Yudeheye, a tiɓaka ɓi ngi Pol ati Silasa le, a jumom ng'avi taŋ, waɗ Grek midiradibiɗey haɗi, zigiduw taˀ, waɗ ngwas muɗongor ɗongoroy haɗi ma.

⁵Amma Yudehey a jam mevel, a kusumom sulomehey malaˀam suweˀ a jiviɗ madiɗahaya, a paka mi da zigiduwo, a yam mi wuwwo ar walahaya. A ram ngi hay Zasoŋ, nga puro Pol ati Silasa. A wuɗam ɓa a ram taŋ nga wuzla mizli.

⁶Taŋ mulumaka taŋ ta na, a ɗiɗaka Zasoŋ ati sukum naŋ mitiɓi mekelemeye nga mbuŋ mizli madiɗahay. A tilam mi: «Mizli tayna, a hiryaka lesl ngi mizli le ar duniya gar! Wurenna t'ani aka.

⁷Yo Zasoŋ a tiɓa taŋ le a hay naŋ. Mizli tayna gar, gi gwat taŋ a zliram ati ɓimuɗuva ngi buy mimadiɗa ta, taŋ a ɓam buy mekelem ada pal, i Yesu.»

⁸Mingiɓi hana a slikiɗa mevel da zigiduw ati mizli madiɗahaya le.

⁹Dar a tikaka ˀay da ti Zasoŋ ati mizli mekelemeye, ɓa sey a wurkam wuruk le ɗagay, ɓa a sa pulaka taŋ far.

¹⁰Duvuɗ miji si na, mitiɓihey a slinam ti Pol ati Silasa kutum nga Bere. Ti taŋ mindilam a diga na, a ram ng'ar hay ngi diradibiɗ ngi Yudehey.

¹¹Yude ngi Bereheye, i mizli miteŋteŋhey fineˀ ngi Tesalonikeye, a tiɓaka ɓi ngi Buymisemuŋ ti mevel purla. Vur hin gar na, ara wunjilaka Ɓimutoho, ɓa a puraka ɓi Pol maɓa na, naŋ kanah gisiŋ kwana.

¹²Mizli haɗi a wuzla taŋ a tiram mitiɓihey, waɗ ngwas Grek muɗongor ɗongoroy ati ziley haɗi ma.

¹³Amma Yude ngi Tesalonikey micinaka, Pol ara til mi ti ɓi ngi Buymisemuŋ a Bere ma na, a ndilam a diga ma, a paka mi da zigiduwo, ɓa a slikiɗam mevel.

¹⁴Angi nah na, mitiɓihey a murom mata, a ki saka Polo nga mi mubuliy, amma Silas ati Timote a ndiram a diga.

¹⁵Mizli miki saka Polo, a ram di sesẽŋ a Aten, a dirba nah, a moko nga Bere. Pol a slino taŋ ɓa a so ɓaka Silas ati Timote, ara lumakaŋ kutum.

¹⁶Polo, ti naŋ mira kutuko Silas ati Timote a Atene na, a pura walahaya, li gar i kuli, a gaŋ kuy ar membezleŋ ngi vu naŋ ta wãˀ.

¹⁷Dar a ɓa Yudehey waɗ mizli madilkam a mbuŋ Buymisemuŋ ati mizli naŋ maji taŋ hirnga vur hin gar ar li ngi luma.

¹⁸Mizli mekelemey ada, i misi ti siney, a zilaka taŋ Epikurihey ati Stowikihey [4], ada kiɗam slir ati Polo. Mizli mekelemey a ɓam: «Migi mi hana vuna, a wuɗ a ɓi mbrike?» Numuŋhoy a ɓam: «Asinta, a ɓi di i ɓi ngi gwat manja sin, taŋ madilkam a mbuŋ naŋ na kwani.» Asi mike na, Pol a til di i mi ti Yesu waɗ slikiɗ ti wuzla mumucahay.

¹⁹Dar a jaka Polo, a ram di nga mbuŋ mingilawuyoy a muwã Areyopak, a ɓakaŋ: «Ɓi nawaya ka matil di mi hana, zliv i sinaka gu kwa?

²⁰Asi mike na, ki ra ga ndra slimiɗ ti ɓi ndra micinam ɗaˀ ta, yo i wuɗam na, ɓa i sinaka pulaˀvra naŋ kuy kuy.»

²¹Vur mizli Ateney ati mulakay misi a wuzla taŋ a diga gar na, a vam hiipas lambaˀ ar li slufa ɓi nawayahay malla ngi cin naŋ tewle si.

²²Pol a slikiɗ deŋ a mbuŋ mingila wuyoy a muwã Areyopaka, a sla taŋ di, a ɓi: «Aw mizli Ateney, yi pura ko ar mike gar na, kum i mizli masipam jiviɗ kuy kuy.

²³Da ya mira liˀi a jiviɗ ngir walahay kumoy gar na, yi ɗuva hiri ndrehhe ar kulihey kum madilkam a mbuŋ taŋ, yo yi lum li gi mikuli mekelem ada na, a tohoko ava: ‹Da kuli manja sin.› Kuli kum madilkam ava, manja si na slimiɗ naŋ nah, ya muso na, a tulukum mi ti ɓi naŋ vuna.

²⁴Buymisemuŋ miga duniya ati gwat ngi raˀahay gar, naŋ Buy ngi muŋ ati hirwuy gar na, naŋ anta cifi angi hay mizli mindiraka ti ndire ta,

²⁵yo slra naŋ kwana, anta wuɗ i mbur titra magaŋ di, kaɓa naŋ da ti may ngi gwat ta, asi i naŋ mavula siifa da mizli gar, yo i naŋ mavula musuwun ati gwat mekelemey gar.

²⁶A go mizli keɗeɗe, ɓa ngi cifi asi ruwuy kurzluˀ gar na, ti vu mbur purla. A sla taŋ hin ngi sifi le, yo a cira taŋ maakway ngi li taŋ masa cifam anga le.

²⁷Bumbulvuŋ miga kahana na, ɓa mizli a ram ti pur naŋ, da ara ram ti tutum naŋ gbiˀgbiˀ na, asinta, a sa lumakaŋ gu kwani. Amma wãˀ naŋ na, avu ko waka gar, Buymisemuŋ anta kileŋ ava ta.

²⁸‹Asi ndra misi ti siifa, i roko wusam, yo ndr'ada ngi ndra ngi ndra na, asi jum ndra ati naŋ vuna.› Naŋ kaɓa mizli dimis kumoy miɓam: ‹Ndra vuna, ndr'i ziri naŋhay aya na.›

²⁹«Da ndr'i ziri naŋhay so na, anja i wulkam kaɓa Buymisemuŋ a bam vu ati kuli mipaka ti ɓiri tapasl tapasl malla ti ɓiri bara ta, malla ko a bam vu ati kuli ɗugur miciɗa ti ciɗ, mbur miciɗa ti sin naŋ waɗ ti wuluk ngi mbur titira ta.

³⁰Ani hin ngi dirba, mizli migam tir manja sin naŋ na, Buymisemuŋ anta slufa ta, wurenna ara tila mi da mizli gar, ko amaka gar, sey a mbiɗaka mevele.

³¹Naŋ kine, a ɗuv hin le pal, naŋ masa ga kiita mijeŋŋe da duniya gar tapasa. Masa ga taŋ di, i mbur naŋ muwunaŋ. A biga le njah wãˀ da mizli gar ti naŋ mislikiɗaŋ ti wuzla mumucahay na.»

³²Taŋ micinaka, Pol miɓa ɓi ngi slikiɗ ti wuzla mumucahay na, mizli mekelemey a singiram angaŋ, numuŋhoy a ɓakaŋ: «Ki sa ɓa ndra ɓi hana duwul mekelem aruŋ.»

³³Pol a pula taŋ kahana so.

³⁴Dambalaka, mekelemey a wuzla taŋ, a tiɓaka ɓi ngi Polo le ngbaŋ, a tiram mitiɓihey. A wuzla taŋ na, i Denis, mbur ngi wuzla mingila wuy ngi Areyopakay ati ngwas ada, a zilaka Damaris, waɗ mizli mekelemey ma.