Read South Giziga ACT 20 Bible Online

ACT 20 - South Giziga bible

ACT 20

¹A dirba mi muwuwwo mikiɗ mi na, Polo zilo mitiɓiheye, dar a vula taŋ gidaŋ. A dirba nah, a mbiɗa taŋ mi, a zuɓa jiviɗ nga Maseduwan.

²A dirba naŋ mutuwuɗa hirwuy nah bal ti vula gidaŋ da mitiɓihey haɗi na, ara ndil angi hirwuy Grek.

³A gi kiya makir a diga. Hirak ti naŋ mawuɗ a ci palalam nga hirwuy Siri na, dambalaka Yudehey ara gam gidiɓi a hirnga naŋ. A sa wuluk ɓa a bi ti Maseduwan a muŋ.

⁴Misi aseˀe i ti Sopater, mangal ngi Pirrus, mbur Bere, Aristarke waɗ Sekundus, mizli Tesalonikihey, yo Gayus ngir walahay Derbe ati Timote waɗ Tisike ati Trofim, mizli ngi Azihey.

⁵Mizli tayna a ram le zleˀe dumbuŋ, ara kutukom ndra a Trowas.

⁶Ndra kwana, a dirba muguzlum ngi zuma ɗaf manja ˀis [7] na, i cam palalam a Filipe. Hin zlum a dirba nah na, i ra lumaka taŋ a Trowas. I gam luuma pal a diga.

⁷Yo asewe ngi hiikuɗ naŋ na, i kusom le ngi zuma ɗaf ngi Buy Yesu muvula, ɓa li a wun na, Pol a sa cuh le. A zik ti mingiɓi haɗi da sukum naŋ mitiɓiheye, hã ng'avu wuzla duvuɗu.

⁸Lampehey ada haɗi ar hay ndra mukusom anga vuna.

⁹Mangal gawla ada, a zilaka Etike, a cifi le a mi fenetir, hinje a jaŋ le haɗi wãˀ, ko Pol a tika mingiɓi naŋ t'aruŋ. Hinje tuwa a hizigiɗaŋ, a diɗo nga ruwuy, zle ar hay mijirngasl mimakir naŋ a hirnga cala. A slikiɗaka na, a muc le si.

¹⁰Dar Pol a po sar, a wus vu ng'avaŋ, a zuɓa kutuk a haŋ, a ɓa mizli: «Anja didak a muɗukum ta, naŋ ti siifa.»

¹¹Joˀ a jiɗ ng'ar hay mijirngasl ngi hirnga cala tuwa a muŋ, a ngila ɗaf tuwa, a zumakaŋ. A dirba nah, a kiɗam slir hã gbaˀ avu li, dar a cuh.

¹²A ram ti mangal gawla tuwa, naŋ ti siifa. Ɓi nah, i ɓi ngi vula gidaŋ haɗi da mizli gar.

¹³Yo ndr'i cam palalam dumbuŋ angi Polo, i ram nga Asos, ɓa i sa zuɓaka Pol a diga. Naŋ aru nga diga ti sar, kaɓa naŋ mujuwa a mevele zleˀe.

¹⁴Ti naŋ mira luuma ndra a Asos na, i zuɓaka angi palalam ndra, ɓa i ram nga Mitilene.

¹⁵Li naŋ muwun na, i cam palalam baɗ a diga hã i ram hirak ti Kiyo. Ngi duwul naŋ na, i ra tuwuɗam a Samos, ngi duwul naŋ mekelem ma na, i ra cicam a Trogiyoŋ. A dirba nah, i ndilam a Milete so.

¹⁶Asi mike na, Pol a juwa le a mevele, ɓa a cohom manja cici a Efeze, vur taŋ masa zizam pas lambaˀ a Azi. A ra wus vu, a wuɗ da a gi na, hã hin ngi muguzlum Paŋtekot na, naŋ a Zeruzalem.

¹⁷Pol a slin zle a Milete nga zilo mizli micawwa ngi Cikil ngi misikristu ngi Efezeye.

¹⁸Ti taŋ mindiloko na, a ɓa taŋ: «Zle ti ya mindilo ndil a Azi na, gwat ngi gi ɗu a wuzla kumo, ki sinaka le.

¹⁹Yi ga slra ngi Bumbulvuŋ le ti hina hirnga wãˀ, ti tuwuy, yo ti bonoy a wuzla mi memeɗe, Yudehey magaka a hirnga ɗu.

²⁰Ki sinaka le, ɓi zliv ɓa a jinukum gar na, yi ɗumo ɗaˀ ta. Jak na, yi tulukum mi ti ɓi ngi Bumbulvuŋ, i dubunukum gwata le a mihiri mizli, ko a hay kumoyo ma jaka.

²¹Tila mi ɗu i ngi zila Yudehey ati Grekey, ɓa a mbiɗam ng'avu Buymisemuŋ, yo ɓa a tiɓaka Buy ndra Yesu.

²²Ani wurenna, ˀUf Mipal ara tikiy ˀay, i ra ru nga Zeruzalem. Gwat masa lumiy a diga na, yi si na ta.

²³Amma gwat ya misin na, ˀUf Mipal ara njikiy di, celelu ati bonoy ara kutukukiy vur walahay vur walahay ɓula.

²⁴Na zle, y'anta pura siifa ɗu kaɓa i gwat mupuɗaw ta. Ya magi hĩˀĩ na, ɓa yi kiɗa mi ngi pi mi ɗu kuy kuy waɗ slra Buy Yesu mupuliy di na, i sedewo ngi Ɓimezle, ti gimezle ngi Buymisemuŋ.

²⁵«Ani zle dana, yi si na le kuy kuy, kum gar, ya mizik a wuzla kum ti tila mi ti Ɓimezle vur Zumabuy ngi Buymisemuŋ na, kum anta sa puraka hiri ɗu mata.

²⁶Vurˀe yi ɓukum njah dana muduba, da ki zizam le na, zayɓi ngi mbur anta ar ya ta.

²⁷Yi ɗum ɓi ko neˀ ta ndiɗaˀ, jiviɗ ngi Buymisemuŋ miɗiya gar na, yi tulukum di mi le gar jaka.

²⁸Jiginaka hirnga kumo, yo jiginaka ginewey, ˀUf Mipal mucufukum ɓa ki jiginaka taŋ na. Cikil ngi misikristuhoy, naŋ mimbiɗa hirnga naŋ ti pumbus naŋ na, jiginakaŋ.

²⁹Yi si na le kuy kuy, a dirba ya mucuh le na, kiriɓuh miji vuhoy, a sa coko a wuzla kumo, t'anta sa wam vu ti gineweye ta.

³⁰Mizli miɓi mi cuw cuwhoy, a sa boko tehhe ti wuzla kum vuna a muŋ, a sa ɗiɗaka mitiɓihey ng'asi taŋ.

³¹Ndiram hiri ɗeŋ ɗeŋ so, wulkam, angi vi makir, duvuɗ ti papas gar na, yi ro ar li kuti kumo purla purla gar ti tuwuy a hiri.

³²«Wurenna so na, yi pulukum asi haŋ ngi Buymisemuŋ waɗ da gimezle naŋ na. A ndila le ɓa a vulukum gidaŋ, yo ɓa a vulukum gwat mezlehey naŋ miwi taŋ vu da mizli naŋhay gar.

³³Dala, ko ɓiri tapasl tapasl malla zana, yi hiyĩ ɗaˀ avu mbur ta.

³⁴Kum ti hirnga kumo, ki sinaka le, yi gi slra ti haŋ ɗu misenna, ɓa ngi luuma gwat ya mawuɗ waɗ da mizli ngisi yahaya ma.

³⁵Buy Yesu ti hirnga naŋ a ɓi: ‹Mbur mavul gwata, a mumul fine mbur mavulakaŋ gwat ti vulo.› Ɓa i wulkaka mingiɓi hana, yo ɓa i jinaka hĩhĩyahaya na, sey ti gi slra gǝr gǝr kahana, yi bugukum di le ar gwat gar.»

³⁶A dirba mingiɓi hana na, a huruk huruk ti popurok jom ati taŋ gar, a dir dibiɗ.

³⁷Dar mizli tuwa gar a tuwam, a jaka Polo kuɓuy kuɓuy, ngi mbiɗi mi.

³⁸A ndurɓom hiri dum le na, asi naŋ miɓi: t'anta sa puraka hiri naŋ mata na. Joˀ a ki sakaŋ hã avu palalama.