Read South Giziga ACT 22 Bible Online

ACT 22 - South Giziga bible

ACT 22

¹«Sukum ɗuwoy ati cine ɗuwoy, cinaka ɓi ya mawuɗ i ɓukum di wurenna ngi laha hirnga ɗu.»

²Ti taŋ micinaka Pol maɓa taŋ ti mi Heber tuwa na, a ɗumoko is lek lek wãˀ ma. Pol a ɓi:

³«Yi mbur Yude, a yikiy a Tarse, hirwuy Silisi. Amma yi gil angi walahay Zeruzalem aka. Yo i dubuna ɓimujuwa ngi dideˀ ndraˀahaya le kuy kuy wãˀ avu Gamaliyel. Ya zleˀe wirwir ar ɓi ngi Buymisemuŋ kaɓa kum gar dana vuna ya.

⁴Mizli masipam jiviɗ ngi Buymisemuŋ na, yi sipa taŋ le nder nder hã mekelemey a lumam mucu. Yi ji ziley ati ngwasaya le kaˀ kaˀ ti celelu ng'ar dangay.

⁵Masay madiɗa ati kus ngi mizli micawwahay a gaka sedewo naŋ gu. Asi mike na, ya muru zleˀe nga jo mizli a damasa, ɓa yi so ga taŋ bonoy a Zeruzalem aka na, muvulikiy ɗerewol da sukum ndra Yude ngi digahay vuna, i taŋ.

⁶«Ti ya maru a jiviɗe, ya gweˀ ngi ndila Damasa, hirak ng'avi pas deŋ, gurjik si na, li a wucuɗo kpah zle a muŋ gun hirnga ɗu.

⁷Yi diɗ putukul a ruwuy, joˀ yi cin ˀay ngi mbur maɓi: ‹Sawul, Sawul, ki sipiy nder nder vur mike?›

⁸Yi mbiɗaŋ di: ‹I ka waka Buy?› A ɓiy ma: ‹I ya Yesu ngi Nazaret, ka masipiy nder nder na.›

⁹Mizli ndra mubumoˀhoyo, t'ada puraka li minjahha tuwa kuy kuy ɓula, amma t'anta cinaka ˀay ngi mbur maɓiy na ta.

¹⁰Dar yi cufuɗaŋ: ‹Sey yi gi mi ska Buy?› Buymisemuŋ a mbiɗiy di: ‹Slikiɗ, aru nga Damas. Gwat Buymisemuŋ maɓuw di, ngi gi ngi gi gar na, a sa ɓukuw di a diga.›

¹¹Wucuɗ ngi li minjahha tuwa, a kiɗiy hiri le, y'anta pur mata. Vurˀe, mizli ndra mubumoˀhoyo, a sa ɗiɗikiy ti ɗiɗi kulaˀ a Damasa.

¹²«Mbur ada a diga, a zilaka Ananiyas. I mbur masipi jiviɗ ngi Buymisemuŋ, naŋ teŋteŋ avu Ɓimujuwa. Mizli Yude ngi digahay gar ara ngilam di wuy teˀe.

¹³Dar a so lumiy, a ɓiy na: ‹Sawul, sukum ɗu, pur muduba.› Angi nah vuna si na, i ra pur muduba, joˀ yi puraŋ.

¹⁴Ananiyas a ɓiy: ‹Buymisemuŋ ngi dideˀ ndrahay a muɗuw le ceɗ, ɓa ki si na gwat naŋ mawuɗo, ɓa ki pura mbur mijeŋŋe na, ɓa ki cine ˀay nga naŋ maɓuw ti balam naŋ.

¹⁵Asi mike na, gwat ka mupura ati ɓi ka micina gar na, sey ki ga sedewo naŋ a mbuŋ mizli gar.

¹⁶Wurenna, ki mur vur mike? Slikiɗ, tiɓa ci ar yama, ɓa munga ɗikey a bunam avra ti zila slimiɗ ngi Buymisemuŋ.›»

¹⁷«Yi mo le nga Zeruzaleme. Ti ya muro dir dibiɗ ar Hay ngi Bumbulvuŋ na, yi pur gwat ti kleŋ.

¹⁸Yi pura Bumbulvuŋ maɓiy: ‹Bi kutum ti Zerusaleme, asi sedewo ka masa ga ar ya na, t'anta sa tiɓaka ta.›

¹⁹Yi mbiɗaŋ di: ‹Buy, taŋ vuna a sinaka le kuy kuy, yi mbur maru zleˀe ar hay ngi diradibiɗey, mizli matiɓaka ɓi ɗike, i jo taŋ ng'ar dangay, yo i sliɗa taŋ tuwaŋ.

²⁰Yo tapas mizli mikiɗaka Etiyen migi sedewo ɗik na, y'ada, ya vuna, i hĩyã mikiɗ naŋhaya le, yo i ya mijigina zana taŋhaya.›

²¹Amma Bumbulvuŋ tuwa a ɓiy: ‹Aru, ya masa slinuw na, kileŋ ng'avi mizli Yudehey ta.›»

²²Yudehey micinaka mingiɓi ngi Polo hã avu naŋ miɓa hana na, dar a zlaka a tilam mi, a ɓam: «Zuwen zizeˀ mbur misi kahana avra! A zlir ɓa a ndir ti siifa ta!»

²³Taŋ mizlaka mbura himaˀ, a hizigaka godo taŋhay avra, a zliɗam muyuŋ nga muŋ pik pik na,

²⁴buy ngi sojeheye, a ɓi ɓa a cam ti Polo ngi hay, a sliɗakaŋ ti laway, ɓa a si na ɓi Yudehey mawudam cirəw cirəw aseˀe na.

²⁵Ti taŋ majuwakaŋ ɓa a sliɗaka tuwa na, mbur soje madiɗa ada akẽh, Polo zla a ɓaŋ: «Zuŋ Roma migakaŋ kiita t'aruŋ si na, a pulukum jiviɗ le ɓa ki sliɗakaŋ kwa mbrike?»

²⁶Mbur soje madiɗa tuwa, micina kahana na, ara fa ɓi nah fet da buy ngi sojeheye, a ɓaŋ: «Ki wuɗ ki gi mi zleˀe ka? Mbur tuwa i mbur Roma!»

²⁷Dar buy ngi sojehey tuwa, a mo ng'avi Polo, a cufuɗaŋ: «Ɓiy di, ki mbur Roma gisiŋ gisiŋ kwa?» Pol a ɓaŋ: «Hĩ.»

²⁸Buy ngi sojehey a ɓaŋ: «Ɓa ya mitiri mbur Roma na, yi hiɗika ti dala haɗi a zli ta.» Pol a ɓaŋ: «Ya i mbur Roma miyaka cak ti yi.»

²⁹Mizli muwuɗam zleˀe ɓa a sliɗakaŋ tuwa, a pulaka kutum si. Buy ngi sojehey misina sin i mbur Roma na, a zluwun haɗi vur naŋ muro kaˀ kaˀ ti celelu na.

³⁰Li naŋ muwun na, buy ngi sojehey a juwa le a mevele kuy kuy, ɓa a si na gwat Yudehey makupaka ɓi da Pol aseˀe na. A cukokoŋ celeluhoyo, a dirba nah, a ɓi ɓa masay madiɗahay ati mingilawuy madiɗa taŋhaya gar, a cikilam. Dar a ɓi ɓa a poko sar ti Polo, a cicaka deŋ a mbuŋ taŋ.