Read South Giziga ACT 23 Bible Online

ACT 23 - South Giziga bible

ACT 23

¹Pol a ɗuva hiri taˀ ar mizli ngir kus ngi ngilawuy madiɗa tuwa, a ɓi: «Sukum ɗuwoy, ya mindirawa a mbuŋ Buymisemuŋ hã dana na, ar wuluk ɗu, ɓi ngi mbiɗiy hirnga aseˀe na, anta ko neˀ ta.»

²Amma Ananiyas, masay madiɗa, a ɓa mizli ngi cikeˀeheye ɓa a kiɗaka Pol avu mi.

³Dar Pol a ɓaŋ: «Buymisemuŋ a sa kiɗ di i ka, ka mohol mupuyaŋ burkoɗoko le! Ki cifi le ngi gi kiita kaɓa Ɓimujuwa miɓi. Na, ki hirsa ɓimujuwa ma, ki ɓi ɓa a kiɗikiy vur mike?»

⁴Mizli ngi ciki Poloy tuwa a ɓakaŋ: «Ki za masay madiɗa kwa?»

⁵Pol a mbiɗa taŋ di: «Sukum ɗuwoy, i masay madiɗa na, i si na zleˀe ta. Asi mike, a tohoko na: ‹Ki za mbur madiɗa ngi mizli ɗikeye ta.›»

⁶Pol a si na le, zigiduw mukos kos na, cah mekelemey i Sadukihey, yo cah numuŋhoyo kwana, i Farisahay. Vurˀe, a zla tila mi a wuzla kus tuwa, a ɓi: «Sukum ɗuwoy, yi mbur Farisa, mangal ngi mbur Farisa. Muwudam ti ya na, asi njaha hiri ndra, mizli mumucahay a sa slikiɗam a muŋ na.»

⁷Mingiɓi hana mikiɗ mi wãˀ t'aruŋ si na, ngilami a slikiɗ ar wala ngi Farisahay ati sadukiheye, kus nah na a wunuk a wuzla cuw.

⁸Asi mike na, Sadukihey a ɓam: «Mizli mumucahay anta sa slikiɗam ta, modro ngi Bumbulvuŋ anta, yo musuɗukoy anta.» Amma Farisahaya , taŋ a tiɓaka le taŋ gar.

⁹A ra tiram kuy kuy wãˀ. Farisa mekelemey a wuzla buy ngi ɓimujuwahay a slikiɗam, a ngumam ta, a cicam kaŋ kaŋ, a ɓam: «I lumam ɓi ngi mbiɗa hirnga da mbur hana ta wãˀ. Asinta, musuɗuk mekelem pal malla modro ngi Bumbulvuŋ a ɓaŋ ɓi le kwani!»

¹⁰Tiri mandih ti gidaŋ tuwa na, buy ngi sojehey a zluwun, vur taŋ masa puwaka Polo minjeɗ minjeɗe. Vurˀe, a ɓa sojeheye, ɓa a pam sar, ara ɗiɗaka ti wuzla taŋ, ɓa a mam di ng'ar hay ngi sojehey a muŋ.

¹¹Ngi duvuɗ nah na, Bumbulvuŋ a biga vu da Polo, a ɓaŋ: «Ɓusa ɓus! Ki ga sedewo ɗu le a Zerusaleme, anja ki ra ga a Roma kanah ma.»

¹²Put ngi miprik naŋ na, Yudehey a gam gidiɓi, a hudumom, a ɓam: a zumam gwat ta, a sam gwat ta, sey da a kiɗaka Polo le vagay ɗagay far.

¹³Mizli migam gidiɓi vuna, a funaka mizli kukur mufaɗa le.

¹⁴A ra lumaka masay madiɗahay ati mizli micawwahaya, a ɓaka taŋ: «Ndr'i hudumom le, i ɓam: i zumam gwat ta, i sam gwat ta, sey da ndra mikiɗaka Polo le vagay ɗagay far.

¹⁵Ani so na, kumo, jumom ati mingila wuy ngir kus madiɗahaya, ɓaka buy ngi sojeheye, ɓa a sukum ti Polo, kaɓa ngi ka virzi naŋ kuy kuy. Ndra kwana, naɓa i wam vu le weˀ, ɓa hã a sa ndilo tikeˀe avu kum na, i kiɗaka le vagay.»

¹⁶Amma gumseˀ ngi Polo, a cine ɓi taŋ majuwaka a mevel taŋ na le. Aru ng'ar hay ngi sojeheye, a ci, ara fa ɓi nah fet da Polo.

¹⁷Angi nah na, Polo zil mbur pal a wuzla soje madiɗahaya, a ɓaŋ: «Aru ti mangal gawla hana ng'avu buy ngi sojehey ta kwa. N'ada ti ɓi neˀ ngi ɓaŋ di.»

¹⁸Dar madiɗa ngi sojeheye, a zuɓa mangal tuwa, aru di ng'avu buy ngi sojeheye, a ɓaŋ: «Pol, mbur dangay na, a ziliy, a ɓiy ɓa yi suw ti mangal gawla misenna. N'ada ti ɓi neˀ ngi ɓuw di.»

¹⁹Buy ngi sojehey a ja mangal gawla tuwa kaw avu haŋ, a kirih di baˀ neˀ, a cufuɗaŋ: «Ki wuɗ ki ɓiy mbrike?»

²⁰Mangal a mbiɗaŋ di: «Yudehey a ngiɓam ˀay le ngi cufuɗuw, ɓa ti prike, a ram ti Polo ng'ar kus madiɗa ngi ngilawuyo. A ɓam kaɓa kus taŋ madiɗa ngi ngilawuyo, naŋ da ti may ngi ka virzi ngi Polo kuy kuy.

²¹wãˀ naŋ na, anja ki cine taŋ di ta. Mizli fineˀ kukur mufaɗa, a wam vu le weˀ. A hudumom le, a ɓam: ‹I zumam gwat ta, i sam gwat ta, sey da i kiɗaka Polo le vagay ɗagay far.› Taŋ a wam vu le zlezle si, a kutukom na, ɓa ki zil mi.»

²²Buy ngi sojehey a ɓa mangala: «Ɓi ka muslufiy di misenna, ko ki ɓa da mbur ta wãˀ.» Joˀ a pula mangal a ru.

²³Dar buy ngi sojehey tuwa, a zil mizli cuw a wuzla madiɗa ngi sojeheye, a ɓa taŋ: «Juwam vu, hilam sojehey skat skat cuw, misi pilisey kukur tarnaˀ, yo misi ziwitey skat skat cuw, ɓa hirak ti ci nga viŋ na, kisa ram nga buy mimadiɗa.

²⁴Anja ki wuɗam pilisey, ɓa Pol a sa jiɗ anga ya, ɓa ki ram di da Felikse, buy miwi li, anja ko gwat a gaŋ neˀ ta.»

²⁵A tuh ɗerewol toh toh, a ɓi anga na:

²⁶«Felikse, buy miwi li, buy ngi ngilawuy, zuy zuyo ya, i ya Klod Lisiyas matuhuw ɗerewol misenna.

²⁷Yudehey a ndilam vu kuvbum angi mbur ya maslinuw di hana na, a wuɗam a kiɗaka vagay zleˀe. Amma ti ya micina i mbur Roma na, yi hil sojehey, dar i ra loho di.

²⁸Ti ya muwuɗ ɓa yi si na gwat taŋ muwudam di hĩˀĩ aseˀe na, yi ru di nga mbuŋ kus madiɗa ngi ngila wuyo.

²⁹Yi luuma na, a wudam di asi ngila mi vur ɓimujuwa taŋ. Amma ko a gi gwat malambaˀ neˀ, ɓa a kiɗaka vagay malla a juwaka ti celelu vurˀe ta.

³⁰Ti ya micina Yudehey a gam gidiɓi le ar mbur misenna na, yi slinuw di kutum. Yi ɓa mizli mijakaŋ ɓi vuna, ɓa ara wudam di a mbuŋ ɗike.»

³¹Sojehey a zuɓaka Polo, a ram di ngi duvuɗo sesẽŋ a Antipatris kaɓa miɓaka taŋ di.

³²Li naŋ muwun na, a pulaka misi pilisey a ram di, joˀ taŋ a moko ng'ar hay ngi sojehey a muŋ.

³³Misi pilisey tuwa mindilam ndil a buy mimadiɗa si na, a vulaka ɗerewolo waɗ Polo da Felikse, buy miwi li.

³⁴Buy miwi li muslufa ɗerewolo slaf slaf na, a cufuɗa Polo: «A yukuw ar hirwuy wanaka?» Ti naŋ micina Pol i mbur ngi hirwuy Silisi na,

³⁵a ɓaŋ: «Da mizli muwudam ti ka, a sa ndiloko le na, i sa cine mi ngi balam ɗike.» Dar a ɓa sojeheye ɓa a jiginaka Polo ar hay ngi buy Herodo.