Read South Giziga ACT 24 Bible Online

ACT 24 - South Giziga bible

ACT 24

¹Hin zlum a dirba nah na, Ananiyas, masay madiɗa, a ndilawa ati mizli micawwa ngi Yudehey waɗ mbur mekelem ada, a zilaka Tertulus, i mbur misli wala ngi kiita ngi Roma. A wudam ti Pol a mbuŋ buy Felikse.

²A ziloko Polo, dar Tertulus a zla a jaŋ ɓi, a ɓi: «Aw buy ngi ngilawuy, ndra micifam zuy zuy na, mbele ka. Yo lesl ɗik mezle ngi zuma buyo, a ɗiya gwataya le gar kuy kuy asi dumvu ngi mizli ndraˀahaya.

³Felikse, buy ngi ngilawuy, i ra gukuw sise ar pas gar, ko amaka gar, asi ndra matiɓaka gwat mezlehey, ka miga taŋ tayna.

⁴Y'anta giruw ti mi koloŋ koloŋ haɗi ta, amma yi guw ambuh asi mezle ɗik na, ɓa ki cine ɓi midegweleˀ ya masa ɓuw di ani hana.

⁵Ndr'i lumaka mbur misenna, i mihirya vu wãˀ. A ra slikiɗ ɓi a wuzla Yudehey ngir duniya kurzluˀ. Naŋ i buy ngi mizli micah mekelemey mazilaka taŋ Nazaretey.

⁶A tutuma le ngi hirya hay ngi Bumbulvuŋ ma. Dar i sa jakaŋ. [I wuɗam ɓa i gakaŋ kiita kaɓa Ɓimujuwa ndra miɓi zleˀe.

⁷Amma Lisiyas, buy ngi sojeheye, a so tiɓa tisi haŋ ndra ti gidaŋ. A ɓa mizli muwudam di na, ɓa a soko ng'avi ka

⁸Ti ka masa cufuɗa na, ka ti hirnga ɗik vuna, kisa cine ɓi ndra muwudam di aseˀe vuna gar, naŋ kaslsla gisiŋ.»

⁹Yudehey a hurdumom ti ɓi nah, a ɓam: «Naŋ kaslsla!»

¹⁰Akẽh buy miwi li, a guvuca haŋ da Polo ɓa a ɓi. Dar Pol a zla a ɓi na: «Yi si na le, a gi le ani vi mbeˀ mbeˀ haɗi, ki migi kiita ngi sukwi ndra. Vurˀe, yi sa slufa mingiɓi ɗu a mbuŋ ɗike manja zluwun.

¹¹Ka vuna, kisa si na si, a funa hin kuruˀ nga cuwo t'aruŋ, yi ru nga Zeruzalem, nga huruk huruk a mbuŋ Buymisemuŋ.

¹²Mbur mulumiy ar li tiri malla ar li slikiɗa ɓi a wuzla mizli kwana, anta. Ko ar Hay ngi Bumbulvuŋ, ko ar hay ngi diradibiɗey, malla ko ar walahay mekelem kwana, a lumikiy ɗaˀ ta.

¹³Mizli tayna, ɓa a bigaka ɓi taŋ muwudam ti ya hĩˀĩ aseˀe na, a ndilaka ta wãˀ.

¹⁴Gwat ya misina ani: yi migi slra ngi Buymisemuŋ ngi dideˀ ndrahay, ar sipi jiviɗ, taŋ maɓam i slir na. Ɓimutoho ngir Ɓimujuwa ati ɓi ngi mijiviɗey gar na, yi tiɓa le.

¹⁵Yi njih hiri le najah, mizli mijeŋŋehey ati malambaˀhay gar, Buymisemuŋ a sa slikiɗa taŋ gar a muŋ, kaɓa taŋ mawulkam vuna ya.

¹⁶Vurˀe, ya kwana, i ra tum vu, ɓa ɓi ngi mbiɗiy hirnga a mbuŋ Buymisemuŋ waɗ avu mizli na, a lumam a mevel ɗu ta.

¹⁷«A dirba ya mizik vi mbeˀ mbeˀ na, yi so ti gwat ngi vul ngi jina mizli ɗuwoy, waɗ gwat ngi gi sedege.

¹⁸Pura, taŋ musoko lumikiy ar hay ngi Bumbulvuŋ na, ar li gi mezegwel ngi buna vu ɗu, gweˀ ngi kiɗa mi muduba. Ko mizli anta hoyo hoyo ta, yo ko mi wuwwo kwana, anta ma.

¹⁹Amma mekelemey a wuzla Yude ngi Aziheye, da t'ada ti ɓi ngi mbiɗiy hirnga aseˀe na, anja zleˀe i taŋ masoko cicam a mbuŋ ɗike, ɓa a wudam ti ya.

²⁰Malla mizli tayna vuna, ti taŋ miram ti ya ng'ar kus madiɗa na, a lumam mungra mi avu ya ka? Anja a ɓaka so.

²¹Sey ɓi purla ya mitil di mi deŋ ti cici a wuzla taŋ na, ya mideŋ dana ar kiita a mbuŋ ɗik na, asi ya mitiɓa, mizli mumucahay masa slikiɗam a muŋ na!»

²²Felikse, a si na jiviɗ ngi misi Kristuhoyo le kuy kuy, vurˀe, a kiraha hin ngi kiita nga mbuŋ, a ɓi: «Da Lisiyas, buy ngi sojehey misa ndilo le aka na, i sa slukum kiita kumo.»

²³Dar a ɓa soje madiɗa mijigina Polo, ɓa a jiginaŋ kuy kuy, a pulaŋ a pul vu neˀe, anja a tika ngama naŋhay ma kam slimiɗ anga na ta.

²⁴Hin neˀ a dirba nah na, Felikse a soko ati ngwas naŋ Drusil, zuŋ Yude. Dar a ziloko Polo, ɓa a cinam naŋ maɓi vur tiɓa ɓi ngi Yesu Kristu na.

²⁵Amma Pol maru ti mingiɓi dum le ng'ar ɓi ngi cifi mijeŋŋe, jigina vu avu gwatay waɗ ng'ar ɓi ngi kiita ngi kiɗa mi ngi duniya tuwa na, a ga zluwun le da Felikse, a tika Polo, a ɓaŋ: «Wurenna, aru kwaɗay, i sa ziluw duwul aruŋ.»

²⁶A njih hiri zleˀe na, kaɓa Pol a sa vulaŋ dala. A zilo Polo ndrehhe ɓa a kiɗam slir cuwa na vurˀe.

²⁷Vi cuw a gi le, a dirba nah na, Porkiyus Festus a zuɓa li ngi Felikse. Amma Felikse a wuɗ ɓa Yudehey a hĩyãkaŋ, vurˀe a pula Polo angi dangaya.