Read South Giziga ACT 27 Bible Online

ACT 27 - South Giziga bible

ACT 27

¹Ti taŋ majuwaka ɓi nah, ɓa i cam palalam nga Itali na, a vulaka Pol ati dangay mekelemey asi haŋ ngi madiɗa ngi sojehey mazilaka Zuliyus. Naŋ ar vurum ngi Roma mazilaka vurum ngi buy mimadiɗa.

²Dar i cam palalam maso ti Adramit, ɓa aru kini ng'ar li pi sar ngi hirwuy Azi, i zuɓam jiviɗ. Ndra bumoˀ ati Aristarke, mbur Maseduwan ngi Tesaloniki.

³Li naŋ muwun na, i ndilam a Sidoŋ. Zuliyus ada ga mezle da Polo haɗa, vurˀe a vulaŋ jiviɗ ɓa aru ng'avi ngama naŋhaya, ɓa a lum gwat avu taŋ.

⁴Ndra mislikiɗam baɗ akẽh na, i kam kini ti ciki hirwuy Sipre, asi burkataŋ ara go puɗak ar ndra.

⁵A dirba ndra mutuwuɗaka mubuliy ngi ciki Silisi ati Pamfili na, i ndilam ar walahay Mir, hirwuy Lisi.

⁶Adiga, madiɗa ngi sojehey a lum palalam muso ti ngi hirwuy Alekzandir, ara zuɓ mulak nga Itali. Joˀ a ci ti ndra ng'araŋ.

⁷I ram zayãˀ zayãˀ, gwat ngi hin mbeˀ mbeˀ, hã i ra ndilam a Kinide tuwaˀ tuwaˀa. Burkataŋ matika ndra nga dirba nga dirba tuwa na, i cohom kini tivi Salomoŋ, a ciki matura ngi Kret.

⁸I kam ɓaˀa ti mibuzugumo, i sa ndilam tuwaˀ tuwaˀ ar li mazilaka Li Pi Sar Mezle, migweˀ avu walahay Laze.

⁹I zikam hã hin ngi dalyam ngi Yudehey a cuhu. Vurˀe, zuɓa mulak ti palalama naŋ ɓiɓir haɗi. Pol a wuɗ a ɓa taŋ wuluk naŋ,

¹⁰a ɓa taŋ: «Hey ngama ɗuwoy, i pura na, zuɓa mulak ndra hana, a sa hiryi gwat, yo a sa zizi gwatay haɗi. I palalam ati gwat ngi huroˀohoy tew ta ma, amma bis ta hirnga ndra vuna ma.»

¹¹Amma madiɗa ngi sojehey a cin mi ngi mbur misi palalam ati ngi buy naŋ fineˀ ɓi ngi Polo.

¹²Ti kiya ngi burkataŋ na, cifi ar li pi sar ngi palalam na nah na, naŋ kuy ta. Vurˀe, vendeke ngi mizli a juwaka le a mevel taŋ, ɓa a cohom ti kẽh. A wuɗam, da a gi na, ara ndilam a Fenike, ɓa ara baka kiya ngi himiɗ a diga. Fenike i li pi sar ngi palalamay ar matura ngi Kreta, hiri pulaˀ ngir ti ruwuy tisi pas ngi pastaˀ naŋ, yo ngir ti muŋ tisi pas ngi pastaˀ naŋ.

¹³Ti himiɗ mifiɗek fiɗek vay ngi ruwuy maso na, taŋ a waka kaɓa a lumaka gwat taŋ muwuɗama le, vurˀe, a zuɓaka ɓiri ngi cica palalama. A tutumaka ngi ru nga ciki matura ngi Krete.

¹⁴Amma neˀ si na, burkataŋ gambara mazilaka ‹himiɗ vay muŋ ngir tisi pas ngi miprike›, a slikiɗo tir matura, a so luuma taŋ.

¹⁵Burkataŋ ara kil ti palalama. Ti ndra mupuraka palalama anta ngira burkataŋ gu mata na, i pulakaŋ vu mbak, i ra ram nga zizi.

¹⁶I cohom ti ciki matura meciɗek ada, a zilaka Koda, a tika ndra himiɗe neˀe. Joˀ i tikaka ˀay da palalam meciɗeke tuwaˀ tuwaˀa.

¹⁷A dirba nah, i zuɓaka palalam meciɗeke humbaɗ mi ng'ar palalam madiɗa, dar migi slra ngir yamaya, a vahaka zeweɗ da palalam madiɗa ɓa jinaŋ, yo taŋ mazluwunam vur taŋ mara tikam is angi muyuŋ ngi mi buzugum ngi hirwuy Libi na, a kusluroko zana [9] maru ti palalama, a pulaka ɓa himiɗ a kil taŋ kahana.

¹⁸Burkataŋ ara ga ndra bonoy ti gidaŋ ava na si. Li naŋ muwun na, i hizigaka gwat ngir palalamaya ng'ar yam.

¹⁹Yo angi hin mimakir naŋ na, misi palalamaya, taŋ ti haŋ taŋ, a hizigaka gwatay maram ti palalam avra.

²⁰A gi le hin mbeˀ mbeˀe, ko pas, ko wurzlahay anta puram ta, amma burkataŋ migi ɗaˀ kanah ta, ara muɗa ndra didak na si. Ar nah na, ɓa i njaham hiri, i sa laham na, anta mata.

²¹Mizli ngir palalamaya, ko a zumam gwat neˀ ta wãˀ hin mbeˀ mbeˀe. Dar Pol a cici deŋ a wuzla taŋ, a ɓa taŋ: «Ngama ɗuwoy, puraka so. Ya muɓukum i pulaka Krete ta na, da ani ki cinikiy mi le zleˀe na kuy, anja ni i hiryaka gwataya, yo i zizaka taŋ lambaˀ ta takwa?

²²Amma wurenna, ambuh kum, anja ki zluwunam ta si. Ko mbur pal asi kum masa zizi anta, sey palalam tewle masa hiryi ɓula.

²³Asi mike na, modro ngi Bumbulvuŋ ɗu ya mahuruk huruk a mbuŋ naŋ na, a bigiy vu le ngi duvuɗ nga dana vuna si,

²⁴yo a ɓiy na: ‹Pol, ki zluwun ta, anja ki ra cici gbaˀ a mbuŋ buy mimadiɗa ngi Roma, mizli kum misi bumoˀ a hur palalama gar na, Buymisemuŋ a puluw siifa taŋ le asi haŋ ɗike, ɓa ki ra tuwuɗam.›

²⁵Tusom didak so ngama ɗuwoy. Asi yi pula hirnga ɗu le wãˀ da Buymisemuŋ, gwat naŋ miɓiy di na, a sa gi kanah gisiŋ.

²⁶Amma so na, palalama, a sa ra tiki is ti ndra ar matura ɓula.»

²⁷Ngi duvuɗ mukuruˀ nga mufaɗ naŋ na, burkataŋ ara kil ti ndra ar Mubuliy Mediterane na si. Ng'avu wuzla duvuɗ na, misi palalamaya, a waka kaɓa ara lumaka hirwuyo gweˀe.

²⁸Dar a waka jileŋ ngi yama ti zeweɗ ɓiri kaˀ ava. A lumaka na, naŋ metir kukur makir nga tarnaˀa. Ne nga mbuŋ ma na, a waka ma, a lumaka na, metir kukur cuw nga dangafaɗa.

²⁹A ra zluwunam vur palalam mara dumbusl ɗugur asi yam, vurˀe, a pulaka ɓiri ngi cica palalamay mumufaɗ vay dirbahaya ng'asi yam, a kutukoko li ɓa a wuno ti yam ar gojogoɗo.

³⁰Mukukuro palalamaya, ara puram jiviɗ ngi sumuɗ le tir palalama. A poko sar ti palalam meciɗek tuwa ng'ar yam, a gam kaɓa a ram nga pula ɓiri vay ngi mbuŋhoy ngi cica palalama.

³¹Pol a ɓa sojehey ati madiɗa taŋ: «Da mizli misi palalamaya, t'anta a hur palalam aka ta na, ki laham gu ta.»

³²Dar sojehey a slaka zeweɗ ngi palalam meciɗek tuwa, a pulaka mbak a ru.

³³Ti taŋ makutukoko li masa wun tuwa na, Pol a ɓa mizli gar ɓa a zumam gwat, a zla a ɓa taŋ na: «A gi le dana hin kuruˀ nga mufaɗa, ki ra kutukom, manja zuma gwat.

³⁴I ɓukum na, kum zumam ɗafa muduba. Asi kum ti may naŋ ɓa kisa lahama, yo i mukum hiri naŋ ava ma, ko mbur pal asi kumo, masa ziza himac ngi hirnga naŋ pal, anta.»

³⁵A dirba naŋ miɓi kahana na, a zuɓa ɗaf, a ga sise da Buymisemuŋ a mbuŋ mizli gar, a ngila, dar a zla a zum.

³⁶Joˀ taŋ gar a tumom vu muduba, a zumam aya.

³⁷Ndra jom gar ndra a hur palalama, mizli skat skat cuw ti kukur tarnaˀ nga merkeɗe.

³⁸A dirba taŋ mimbam na, a zliɗaka daw alkamari ng'ar yam, ɓa a ga kefek neˀ da palalama.

³⁹Li muwun muduba na, misi palalamaya, a sinaka taŋ aka mata. Amma a puram sliŋ muyuŋ sliɗ a miyam mici zoɗ nga wuzla hirwuy, taŋ a wulkam, da a gi na, ara tikam is ti palalama angaŋ.

⁴⁰Dar a slaka ɓiri ngi cica palalamaya, a pulaka taŋ ng'asi yam, naɓa ara puskaka zeweɗ mujuwam taŋ dum ngi misi palalama cici. Joˀ a slikiɗaka godo ngi mbuŋ palalama, ɓa himiɗ a hizigiɗa nga mibuzugum.

⁴¹Amma palalam ara lum muyuŋ tisi yama. Mbuŋ ngi palalam a cici kaŋ avu muyuŋ, a wus mata. Angi nah, yam a slikiɗo fuyõ fuyõ ti gidaŋ, diɓel naŋ a waha virzi ngi palalama meɗ meɗ wãˀ.

⁴²Sojehey a wuɗam ɓa a kiɗaka dangayaya vagay vagay zleˀe, vur taŋ masa kaka yama, a kilam.

⁴³Amma madiɗa ngi sojeheye, naŋ a wuɗ laha Polo. Vurˀe a tika taŋ, ɓa a gaka gwat taŋ majuwaka a mevel taŋ na ta. A ɓa mizli misina ki yamaya, ɓa a ndilam dumbuŋ ar yama, a ndilam nga ˀaydidike.

⁴⁴Is ngi mizli mindirama kwana, a sa tuwuɗam ti dum misliprak sliprak ati mupuɗaˀ puɗaˀ ngi palalam muwuh tuwa. Naŋ kahana, mizli gar mindilam zuy zuy a ˀaydidike.