Read South Giziga ACT 3 Bible Online

ACT 3 - South Giziga bible

ACT 3

¹Ngi hin mekelem ada, ngi pas ngi ɓula away ngi hay na, Piyer ati Zaŋ ara jiɗam ng'ar hay ngi Bumbulvuŋ a Zeruzalem ɓa a diram dibiɗi.

²Mbur kilbeɗe ada miyakaŋ cak kine. Mizli a zuɓoko di, a soko di vur hin gar nga mizlingre mazilaka «Mizlingre Mezle», ɓa a suk gwat avu mizli macam ng'ar hay ngi Bumbulvuŋ vuna.

³Mbur tuwa mupura Piyer ati Zaŋ mawuɗ a cam ng'ar hay ngi Bumbulvuŋ tuwa na, a tumbulo taŋ ɓa a lum gwat avu taŋ.

⁴Akẽh na, Piyer ati Zaŋ a puraka cum cum, dar Piyer a ɓaŋ: «Pura ndra!»

⁵Joˀ mbur tuwa a pura taŋ lawwa, asi ara wuluk, ko mbri a sa lum gwat avu taŋ.

⁶Dar Piyer a ɓaŋ: «Ani, dala malla ɓiri tapasl tapasl anta avu ya ta, amma gwat ya misi ti naŋ na, yi vuluw di. Ti slimiɗ ngi Yesu Kristu ngi Nazarete, slikiɗ, a ru!»

⁷Dar Piyer a jaŋ kaw avu haŋ hazumo, a slikiɗaŋ pirtaˀ. Angi nah vuna si na, sar muhurmuso ati hiri sar ngi kilbeɗe tuwa a lumam gidaŋ le,

⁸a slikiɗ njar deŋ, ara rudigi. Joˀ a cam bumoˀ ati misliney tuwa ng'ar hay ngi Bumbulvuŋ. A ra ru, ara jiɗ ngbik ngbik bal ti hunuma Buymisemuŋ.

⁹Mizli gar a puraka na, ara ru, ara hunuma Buymisemuŋ.

¹⁰A sinakaŋ le gisiŋ, i mbur macifi ngi suko gwat a Mizlingre Mezle ngi hay ngi Bumbulvuŋ tuwa. Ɓi naŋ a zluwuna mizli haɗi, hã a ga taŋ welele teˀe.

¹¹Mbur tuwa, anta pula ti Piyer ati Zaŋ mata. Joˀ mizli gar a kiloko ng'avi taŋ asi palak mazilaka Palak ngi Salomoŋ, asi ɓi naŋ a zuma taŋ hirnga le.

¹²Piyer mupura kahana na, a ɓa mizli: «Kum Israyeley, gwat migi hana, a zumukum hirnga vur mike? Ki ɗuvoko hiri mi puyõˀ ng'ar ndra ka? Miga mbur misenna ɓa aru na, i gidaŋ ndra ati sipi jiviɗ ndra kwa?

¹³Buymisemuŋ ngi Abraham, ngi Izak, ngi Zakop, Buymisemuŋ ngi dideˀ ndraˀahaya, a ga Gawla naŋ Yesu le ɗongor. Kum vuna, ki vulakaŋ da mizli madiɗahay ɓa a jakaŋ. Pilat a wuɗ pul naŋ le, amma kumo, ki wuɗakaŋ ta daˀ a mbuŋ naŋ vuna si.

¹⁴Mbur mipal, mbur mijeŋŋe, ki hizigakaŋ zloh avra. Dar ki cufuɗam ɓa a pulukum ngi kumo, i mbur mikiɗa hirnga jaka.

¹⁵Naŋ kine, Buy ngi siifa, kum mikiɗaka vagay na, Buymisemuŋ a slikiɗa le a muŋ ti wuzla mumucahaya. Ndr'i sedewo naŋhay.

¹⁶Mbur kum mapuraka ati kum misinaka hana, mbele tiɓi waɗ slimiɗ ngi Yesu, miɗiyaŋ ngbatak a mihiri kum gara, i tiɓa Yesu.

¹⁷«Sukum ɗuwoy, yi si na le, dambalaka kum ati mizli madiɗa kumoy gar na, ki gam tir manja sin naŋ.

¹⁸Buymisemuŋ a til mi ti ɓi nah le daf dumbuŋ, a ɓo di ti balam mijiviɗ naŋhay gar, a ɓi na: ‹sey Mesi naŋ a si bonoy seˀ le.› Migi na, i nah so.

¹⁹Mbiɗaka mevel kumoyo so, moko ng'avi Buymisemuŋ, ɓa a puya mungra kumoy avra,

²⁰ɓa tapas Bumbulvuŋ masa slino Kristu, Yesu, naŋ muwunukum di nah na, a sa vulukum muska vu.

²¹Sey Yesu Kristu a cifi a muŋ a diga ɗagay, hã a ndila pas ngi Buymisemuŋ masa ɗiya hiri ngi gwataya gar nawayahay, kaɓa naŋ miɓa ɓi naŋ zleˀe ti balam mijiviɗ naŋhay mipal.

²²Dumbuŋ zleˀe, Moyis ɓi na: ‹Bumbulvuŋ, Buymisemuŋ a sa slinukum mijiviɗ misi kaɓa ya, a sa bo ti wuzla kum vuna si. Ki sa cinaka mingiɓi naŋ, naŋ masa ɓukum di gar.

²³Mbur gar masa cine mingiɓi ngi mijiviɗ nah ta na, a sa gwahakaŋ avra ti wuzla mizli ngi Buymisemuŋhoyo, yo a sa kiɗaka vagay.›

²⁴Mijiviɗey gar asi cala asi cala, zle avu Samuyele, taŋ kwana a tilam di i mi ti ɓi ngi hin ndra misi anga dana na.

²⁵Ziri ngi mijiviɗey waɗ ngi jumoˀay ngi Buymisemuŋ ati dideˀ kumoy na, i kum vuna. Ti naŋ miɓa Abraham: ‹I sa ɗuwula mi da sukwi ngi mizli gar tisi ziri ɗikey› na, i kum vuna.

²⁶Buymisemuŋ mubo ti Gawla naŋ na, a slino di dumbuŋ da kum, ɓa a ɗuwulukum mi, a mbuɗo hiri kum tivu mungraˀahaya, purla purla gar ng'avaŋ.»