Read South Giziga ACT 4 Bible Online

ACT 4 - South Giziga bible

ACT 4

¹Piyer ati Zaŋ, ti taŋ maɓaka mizli aruŋ si na, masayay ati madiɗa mijigina hay ngi Bumbulvuŋ a Zeruzalem waɗ Sadukihey a ndiloko.

²A jam mevel haɗi angi mislin ngi Yesu mucuw tayna, asi taŋ mupuraka taŋ, ara dubunam gwat da mizli, yo ara tilaka taŋ mi ti ɓi ngi Yesu mislikiɗ ti wuzla mumucahay.

³Dar a jaka taŋ, a caka taŋ ar dangay, ɓa hã li a wun, asi hiikuɗo ji le si.

⁴Amma a wuzla mizli micinaka mingiɓi ngi misliney tuwa, mizli haɗi a tiɓaka le. Taŋ jom gar, a gam gwat ngi mizli durmuk zlum gu.

⁵Li naŋ muwun so na, madiɗa ngi Yudehey ati mizli micawwahay waɗ buy ngi ɓimujuwahay misi a Zerusaleme, a kusom.

⁶Mukusom i ti Han, masay madiɗa, Kayif, Zaŋ, Alekzandir waɗ mizli ngi hay masay madiɗahay gar.

⁷Joˀ a soko ti Piyer ati Zaŋ tuwa dedeŋ a mbuŋ taŋ, dar a zlaka a cufuɗaka taŋ: «Ki lumam di i gidaŋ ngi mike? Kum miɗiyaka mbur kilbeɗe nah ti slimiɗ ngi waka?»

⁸Piyer a nih le ti ˀUf Mipal, dar a ɓa taŋ:

⁹«Hey, kum madiɗa ngi mizli ati kum micawwahay, ani a wudam ti ndra le dana asi ndra migam mezle da kilbeɗe miɗiyi na. A cufuɗam ndra, a ɗiyi mbri mbrike ɓa i ɓam.

¹⁰Sey ki sinaka kuy kuy so, kum ati mizli Israyeley gar, miɗiya mbur hana i slimiɗ ngi Yesu Kristu ngi Nazaret, kum midiraka avu dum mizliraŋ, Buymisemuŋ mislikiɗaŋ a muŋ na. Mbur hana miɗiyi ngbatak a mbuŋ kum na, mbele naŋ.

¹¹Yesu vuna: ‹I ɗugur kum mindira hayay mihizigaka avra, misa tiri ɗugur hirnga ngi ji mivay.[2].›

¹²Milaha vu, i naŋ pal naŋ tewle. Asi gazlavay kurzluˀ gar na, Buymisemuŋ a vul slimiɗ mekelem da mizli, ɓa i laham ti naŋ na, anta.»

¹³Ti taŋ mupuraka Piyer ati Zaŋ maɓam manja zluwun na, a zuma taŋ hirnga le, asi a sinaka taŋ le, i mizli mudubunam ta, mizli ngatarahay ngbaŋ. Joˀ a sinaka, taŋ i mizli ngisi Yesuhoy.

¹⁴Amma ko a ɓam gu mata, asi ara puraka mbur miɗiyi tuwa, naŋ da deŋ gweˀ avu taŋ akẽh.

¹⁵Dar a ɓam ɗaˀ ɓa a bam taŋ tir hay ngi ngilawuy madiɗiɗa, dar taŋ a ngilam wuy ar wala taŋ,

¹⁶a ɓam: «I sa gaka mizli tayna mbri kpak ka? Asi mike na, cekene mubudas hana, migaka i taŋ gisiŋ, Zerusalemey gar a sinaka le. I jam di mi gu mata.

¹⁷Amma ɓa ɓi naŋ a njih nga mbuŋ a wuzla mizli mata na, sey i gaka taŋ zluwun, ɓa zle dana, ko waka gar, a ɓi ɓi ti slimiɗ ngi Yesu mata.»

¹⁸Dar a ziloko taŋ a muŋ, a tikaka taŋ kaŋ kaŋ, ɓa a ɓam ɓi malla a dubunam gwat da mizli ti slimiɗ ngi Yesu mata wãˀ.

¹⁹Amma Piyer ati Zaŋ a mbiɗaka taŋ di: «Mikaslsla a mbuŋ Buymisemuŋ i wanaka? I cinami da kum kwa, malla da naŋ? Avu kum maslaka wala nah so.

²⁰Avu ndra na, gwat ndra mupuraka ati ɓi ndra micinaka na, ɓa i cifam di teˀ manja i ɓaka na, a gi ta.»

²¹Mizli ngir kus ngi ngila wuy madiɗa, a bucaka taŋ ti gidaŋ ava ma, a pulaka taŋ. A lumam ɓi midar ɓa a jaka taŋ ti kiita aseˀe ta, asi zigiduw gar ara hunuma Buymisemuŋ asi gwat migi nah vuna.

²²Asi mike na, mbur miɗiyi ti cekene nah na, vi naŋ, a funa vi kukur mufaɗa le.

²³A dirba mupulaka ti Piyer ati Zaŋ na, a ram ng'avi cil taŋhay, a slufaka taŋ ɓi ngi masay madiɗahay ati mizli micawwahay miɓaka taŋ di na gar.

²⁴A cinaka taŋ di, a dirba nah, taŋ gar jom ar leˀe a diram dibiɗ, a ɓaka Buymisemuŋ na: «Aw Kumani, miga muŋ, hirwuy, mubuliy ati gwat ngi rahay gar na, i ka.

²⁵I ka ti ˀUf ɗik Mipal, mica mingiɓi hana a balam dideˀ ndra Davit, gawla ɗike, ti naŋ miɓi: ‹Sukwi ngi mizli mekelemey a bucam ɓar ɓar vur mike? Mizli a juwam ɓi lambaˀ a mevel taŋ vur mike?

²⁶Buy madiɗa ngi ruwuyoy, a juwam vu le, yo madiɗa ngi mizli, a jumom ˀay le, ɓa a gam vurum ati Bumbulvuŋ waɗ avu mbur naŋ muwunaŋ.›

²⁷«Kanah, Herod, Pons Pilat ati sukwi ngi mizli mekelemey waɗ mizli Israyeley a jumom ˀay le gisiŋ ar walahay madiɗa hana vur Yesu, gawla ɗik mipal, ka muwunaŋ na.

²⁸Gwat ka ɓi micica ɓi nah zleˀe daf dumbuŋ, ti gidaŋ ɗik ati wuɗ ɗik na, taŋ migam na, i nah so.

²⁹Aw Bumbulvuŋ, wurenna so na, jik slimiɗ ar bonoy ngi mizli ɗikeye, pula jiviɗ da gawla ɗikeye, ɓa a tilam mi ti mingiɓi ɗike manja zluwun.

³⁰Sika haŋ ɗike, ɓa misi jijihey a mbulom, ɓa gwat ngi zuma hirngahay ati gwat migam ɗaˀ tahaya, a gam ti slimiɗ ngi Yesu, gawla ɗik mipal na.»

³¹Angi kiɗa mi ngi diradibiɗ taŋ na, li taŋ mukusom anga, a wus hiɓik hiɓik, ˀUf Mipal, a naha taŋ le gar, a tilam mi ti ɓi ngi Buymisemuŋ manja zluwun.

³²Mitiɓiheye, taŋ zigiduw taˀ, taŋ ti mevel purla, lesl purla, ko mbur maɓi gwat hana inga ya na, anta. Amma a jumoko gwat taŋhay gar ar li purla jaka.

³³Mislineye, a gaka sedewo ngi slikiɗ ngi Buy Yesu ti gidaŋ jak. Buymisemuŋ a ga taŋ mezle wal wal haɗa gar taŋ.

³⁴Mbur misi murga anta a wuzla taŋ ta, mizli misi ti guvahay ati hayaya, a hiɗikaka taŋ avra, a soko ti dala nah,

³⁵a paka a mbuŋ misliney, a wunkaka, ɓa mbur gar a lum mi nga naŋ weˀe avu naŋ muro ti may naŋ.

³⁶Naŋ kine, mbur mekelem ada, a zilaka Zosef, sukwi ngi Levi, a ya ka a Sipre. Misliney a cakaŋ slimiɗ ti migala, Barnabas, mbiɗeˀvra: «mbur muvula gidaŋ da mizli», naŋ da ti guva.

³⁷A hiɗika guva naŋ tuwa avra, a so ti dala nah, a pa a mbuŋ mislineye.