Read South Giziga ACT 6 Bible Online

ACT 6 - South Giziga bible

ACT 6

¹Ti di nah na, mizli ngisi Yesuhoy ara sikam. Yude miɓi ti mi Grekeye, a zlaka mbulo mi ti Yudehey ngi hirwuy nah na, asi gwat taŋ mawunkaka angi hin gar na, anta kam slimiɗ angi ngwas wudiga taŋhaya ta.

²Dar misliney mukuruˀ nga cuwo, a ziloko mizli ngisi Yesuhoyo keɗeɗe, a ɓam: «Ɓa i pulaka tila mi ti ɓi ngi Buymisemuŋ, ɓa i gam slra ngi gwat ngi zum na, a tiɓaŋ ta.

³Sukum ndrahay, zuwen wuɗam mizli tarnaˀ a wuzla kumo jak, mizli mezlehey, minaham le ti ˀUf, yo ti sinmijileŋ, ɓa i sa pulaka slra hana asi haŋ taŋ.

⁴Ndra ya kwana, i sa ram ti slra ngi diradibiɗ ati ngi tila mi ti ɓi ngi Buymisemuŋ ya.»

⁵Zigiduw gar a hĩyã mingiɓi misenna le. Joˀ a wunam Etiyen, mbur mitiɓi wãˀ, a nih le ti ˀUf Mipal, yo Filip, Prokor, Nikanor, Timoŋ, Parmenas ati Nikolas ngi hirwuy Antiyos, a ci Yude ti ci.

⁶A bigaka taŋ da mislineye, a diram dibiɗ, a bucaka taŋ haŋ a hirnga.

⁷Mingiɓi ngi Bumbulvuŋ ara ndih ti gidaŋ, mizli ngisi Yesuhoy a Zerusaleme, ara sikam haɗi haɗi. Masayay haɗa, ara tiɓaka ɓi misenna.

⁸Buymisemuŋ a ga mezle le da Etiyene haɗi, a vulaŋ gidaŋ le haɗi, a gi gwat migam ɗaˀtahay ati gwat ngi zuma hirngahay haɗa a wuzla mizli.

⁹Amma ti di nah na, mekelemey a wuzla mizli ngir hay ngi diradibiɗ, mizli mazilaka taŋ beke muluma hirnga le na, i Yude ngi ruwuy Sirene, ngi Alekzandir, ngi Silisi waɗ ngi Azihey, a zlaka ngilami ati Etiyene.

¹⁰Amma ko a ngilakaŋ mi gu ta, asi ˀUf Mipal a vulaŋ sinmijileŋ le ar mingiɓi naŋ.

¹¹Dar a wurkam mizli ɓa a ɓam: «I cinam le, ara ɓi ɓi ngi zi Moyis ati Bumbulvuŋ !»

¹²A paka mi da mizli, mizli micawwahay ati buy ngi ɓimujuwahaya, a ndiloko ɓuyoh, a jaka Etiyene, a ram di nga wuzla kus ngi ngila wuy madiɗa.

¹³A ram ti sedewo misi slirey tuwa nga diga, dar a ɓam: «Mbur hana, ara ɓi ɓi malambaˀ ndrehhe vur hay ngi Bumbulvuŋ, waɗ ar Ɓimuɗuva!

¹⁴Asi i cinaka, a ɓi na: ‹Yesu ngi Nazaret nah na, a sa waha hay nah avra, yo a sa mbiɗa sirik ndra mulumoko di avu Moyise.›»

¹⁵Mizli mujoar kus ngi ngila wuy madiɗa gar, a ɗuvaka hiri hiviceˀ ng'ar Etiyene, a puraka mihiri naŋ, a bam vu ati ngi modro ngi Buymisemuŋ.