Read South Giziga ACT 7 Bible Online

ACT 7 - South Giziga bible

ACT 7

¹Masay madiɗa a cufuɗa Etiyene: «Naŋ kaslsla kahana gisiŋ kwa mbrike?»

²Etiyen a mbiɗaŋ di: «Kum sukum ɗuwoy, cine ɗuwoy, cinam: Dideˀ ndra Abrahama, ti naŋ misi angi hirwuy Mezopotami, dumbuŋ angi naŋ micifi a Haraŋ na, Buymisemuŋ misi ti dudok a bigaŋ vu le.

³Dar Buymisemuŋ a ɓaŋ: ‹Pula hirwuy ɗik ati muy ɗikeye, aru nga ruwuy ya masa buguw di.›

⁴Abraham a pula hirwuy Babiloŋ, ara cifi a Haraŋ. A dirba cine naŋ mumuco, Buymisemuŋ a coho di ti kẽh nga ruwuy hana kum misi anga wurenna na.

⁵Ko a vulaŋ li angi hirwuy nah ta, ko li ngi ɗuva sar taˀ tekeɗe kwana, a vulaŋ ta. Amma ko ti Abraham mulum zuŋ ta na kwana, a ɓaŋ ɓa a sa vulaŋ ruwuy misenna da naŋ, yo da dideˀ naŋhay a dirba naŋ ma.

⁶Buymisemuŋ a ɓi na: Dideˀ naŋhay a sa cifam angi hirwuy mulak, a sa tiram taŋ bekehey, a sa guzuvuraka taŋ, hã vi skat skat mufaɗa.

⁷Amma Buymisemuŋ a ɓi ma: ‹Sukwi masa tiri taŋ beke na, ya vuna, i sa ga taŋ kiita, yo a dirba nah, a sa bam, a sa dilkam a mbuŋ ɗu ar li hana.›

⁸Dar Bumbulvuŋ a jum ˀay ati Abrahama ti ɓi ngi ci mizaw. Naŋ kine, a dirba naŋ miya Izaka, Abraham a caŋ a mizawa ar hin midangafaɗ naŋ. Izaka kwana, a ga kanah da Zakopo ya, yo Zakop a ca dideˀ ndra mukuruˀ nga cuwoyo le kanah ya.

⁹«Dideˀ ndrahay a gam suloŋ ti Zosefe, a hiɗikakaŋ avra, ɓa a ram di nga Ezipte. Amma Bumbulvuŋ naŋ da ati naŋ,

¹⁰a bi di tir bonoy naŋhay gar. Joˀ a gaŋ mezleŋ, a vulaŋ sinmijileŋ a mbuŋ buy madiɗa ngi Ezipte. Buy Ezipte a cifa Zosefe i buy miwi li angi hirwuy Ezipte, yo ar hay naŋ gar.

¹¹Ti nah na, may a gi angi hirwuy Ezipte gar waɗ angi hirwuy Kanaˀan gar. A ga bonoy da mizli le haɗi, dideˀ ndrahay anta lumam gwat ngi zumo mata.

¹²Ti Zakop micina daw ada angi hirwuy Ezipte na, a slina dideˀ ndraˀahaya nga diga sar mudumbuŋ naŋ ɗagay.

¹³Ngi mucuw naŋ so na, Zosef a biga vu da sukum naŋhaya. Buy Ezipte kwana, a si na muy ngi Zosefeye le muduba.

¹⁴Joˀ Zosef a slin nga zuɓo cine naŋ Zakop ati mizli ngi hay naŋhay gar muduba so, taŋ jom gara, mizli kukur tarnaˀ nga zlum.

¹⁵Dar Zakop aru nga Ezipte, a muc a diga, dideˀ ndrahay kwana, a micam a diga ya.

¹⁶A zuɓaka vagay taŋhaya nga Sikem, ara kaka taŋ angi vigiɗ, Abraham mihiɗika ti dala avu ziri ngi Hemoroy, Hemor i cine ngi Sikem.

¹⁷«Ɓi Buymisemuŋ miɓa ɗaˀ le da Abraham zleˀe tuwa, gwat naŋ a wuɗ ɓa gi muduba so. Hin naŋ mindilo gweˀ ɓa a gi na, Israyeley a jam, a sikam haɗi a Ezipte,

¹⁸hã a ndila hin ngi buy mekelem a Ezipte, buy misina Zosefe ta.

¹⁹Buy nah tuwa, a tikina mizli ndraˀahaya, a guzuvra dideˀ ndraˀahaya, hã a tika taŋ ˀay, ɓa a hizigaka ziri gaza taŋhay avra, ɓa a micam.

²⁰Angi hin nah na, a ya ka Moyise so, naŋ kuy a mihiri ngi Buymisemuŋ, a vulakaŋ ɗuwa a hay cine, kiya makir.

²¹Yo ti taŋ mihizigaka avra na, zuŋ ngi buy Ezipte a zuɓaŋ, a gila ka mangal naŋ si.

²²Moyis a dubuna sinmijileŋ ngi Ezipteheye le gar. Naŋ gidaŋ ar mingiɓi ati gwat ngi gi naŋ ma.

²³«Ti naŋ mindila vi kukur mufaɗ na, a wuluk nga pura sukum naŋ Israyeley.

²⁴A pura mbur Ezipte, ara ga bonoy da mbur pal asi taŋ. A tiɓaŋ hirnga, a pula cuwal ngi sukum naŋ magakaŋ bonoy tuwa, a kiɗa mbur Ezipte vagay.

²⁵Naŋ a wa na, kaɓa sukum naŋ Israyeleye, a sa sinaka, Buymisemuŋ a zuɓ ngi laha taŋ i naŋ, amma ko taŋ a slaka wala naŋ ta.

²⁶Li naŋ muwun ma na, mizli Israyeley cuw ara kiɗam vu, Moyis ara ci ar wala taŋ, ɓa a jumo taŋ ˀay. A ɓa taŋ: ‹Ngama ɗuwoy, kum i sukumuŋhoy, ki guzuvram vu kahana vur mike?›

²⁷Amma mbur maga bonoy da cala tuwa, a dumbusla Moyise, a ɓaŋ: ‹Mucufuw ki buy, ki migi kiita a hirnga ndra, i waka?

²⁸Ki wuɗ ki kiɗiy vagay kaɓa ka mikiɗa mbur Ezipte ngi dambu na ya kwa?›

²⁹Moyis micina mingiɓi hana na, a kil, ara cifi angi hirwuy Madiyan, a yi ziri mizilehey cuw a diga.

³⁰Vi kukur mufaɗ a dirba nah na, modro ngi Bumbulvuŋ a bigaŋ vu a wuzlaɓuh, gweˀ avu muwã Sinay, angi irne vu ngi sisim mawur.

³¹Moyis mupura sisim mawur tuwa na, a zumaŋ hirnga le, a wuɗ a kirih gweˀ ng'ava ɓa a puraŋ, a cine ˀay ngi Bumbulvuŋ maɓaŋ:

³²‹Yi Buymisemuŋ ngi dideˀ ɗikey, Buymisemuŋ ngi Abraham, ngi Izak waɗ ngi Zakop.› Moyis ara jijik, a tum vu ngi pur naŋ gu mata.

³³Joˀ Bumbulvuŋ a ɓaŋ: ‹Cuko tarak ngi sar ɗikey avra, asi li ka mideŋ anga na, i li mipal.

³⁴Haˀaw, yi pura bonoy ngi mizli ɗuwoyo le a Ezipte, yi cine niˀic taŋ le. Yi po sar na, ɓa ngi laha taŋ. Na wurenna, yi wuɗ i slinuw, aru nga Ezipte.›

³⁵«I Moyis nah vuna, Israyeley muɓulakaŋ avra ti taŋ miɓakaŋ: Mucufuw ki buy, ki migi kiita i waka tuwa. Buymisemuŋ a slin di i naŋ ka buy taŋ, ka mimbiɗi hirnga taŋ, a jinaŋ ti modro mibigaŋ vu a wuzla sisim tuwa.

³⁶I naŋ vuna mubo ti taŋ ti hirwuy Ezipte, ti naŋ miga gwat migam ɗaˀ tahay ati gwat ngi zuma hirngahay angi hirwuy Ezipte, a mubuliy gaza, waɗ a wuzlaɓuh mikirɗak kirɗak hã vi kukur mufaɗa.

³⁷I Moyis nah miɓa zir Israyeley zleˀe: ‹Buymisemuŋ a sa slinukum mijiviɗ misi kaɓa ya, masa bo ti wuzla kum tuwa.›

³⁸Ti taŋ mukusom a wuzlaɓuh na, i naŋ vuna micici ar wala ngi dideˀ ndrahay ati modro ngi Bumbulvuŋ miɓaŋ baɗ ti muwã Sinay na. Mulumo ndra mingiɓi ngi siifa, muso ndra di i naŋ.

³⁹Amma dideˀ ndraˀahaya, a ngumam cinakaŋ mi ta, a pakaŋ haŋ, a mevel taŋ na, a wuɗam mi nga Ezipte a muŋ.

⁴⁰Asi mike na, a ɓaka Aroŋ: ‹Ɗiya ndra kulihey ɓa i dilkam a mbuŋ taŋ, ɓa a kam ɓaˀ a mbuŋ ndra, asi Moyis nah na, mubo ti ndra ti hirwuy Ezipte tuwa, da a tiri mike na, i si na ka ta›

⁴¹Ar hin tayna, a vuɗam zuŋ sla, a gam mikuli da kuli nah vuna, a gam muguzlum ti mumulo gwat, taŋ migaka ti haŋ taŋ.

⁴²Amma Buymisemuŋ a mbiɗi duba avu taŋ, a pula taŋ mbak a dilkam a mbuŋ gwat ngi muŋhoy, a gi le kaɓa taŋ mutohoko angi ɗerewol ngi mijiviɗey miɓi: ‹Kum Israyeley, angi vi kukur mufaɗ a wuzlaɓuh na, kum mikiɗaka gwatay, yo kum migaka mikuli na, da ya kwa?

⁴³Ki hilaka guɗuk ngi kuli kum Molok ati wurzlaŋ ngi kuli kum Refaŋ.Tayna i fotohoy kum miɗiyaka taŋ ɓa ki dilkam a mbuŋ taŋ.Vurˀe, ya kwana, yi sa hulukum, i ra pukum kileŋ nga duba Babiloŋ.›

⁴⁴«Dideˀ ndraˀahaya, t'ada ti guɗuk a wuzlaɓuh, guɗuk ngi zlir ati Buymisemuŋ. Buymisemuŋ miɓa Moyise ɓa a ɗiya heˀ ka naŋ mupura tuwa.

⁴⁵Guɗuk nah na, dideˀ ndrahay a lumakaŋ, Zosuwe muru ti taŋ na, a zuɓaka a haŋ, nga hirwuy taŋ mitiɓaka avu sukwi ngi mizli Buymisemuŋ muɓula taŋ a mbuŋ taŋ na, guɗuk nah a ndir hã a ndila hin ngi Daviti.

⁴⁶Davite, Buymisemuŋ a gaŋ mezle le. Joˀ a cufuɗ jiviɗ ɓa a ɗiyi guɗuk da Buymisemuŋ ngi Zakopo.

⁴⁷Amma hã misa ndiraŋ haya i Salomoŋ.

⁴⁸«Na Buymisemuŋ Mimadiɗa, anta cifi ar hay mizli mindiraka ti ndire ta ngbaŋ. Kaɓa mijiviɗ miɓa:

⁴⁹‹Muŋ i janga ɗu ngi buy, yo hirwuyo, i li ɗuva sar ɗu. Ki sa ndirikiy di i hay mike? Li ɓa i musuk vu anga gu, i li wanaka?

⁵⁰Gwat tayna gar, i ya miga taŋ ti haŋ ɗu ta kwa?›

⁵¹«Kayya, kum mizli misi hirnga gidaŋhay, mevel kum ati slimiɗ kumoy a digislam le ngi cine ɓi ngi Buymisemuŋ! Ki ra slam hima ndrehhe avu ˀUf Mipala! Kum kaɓa dideˀ kumoy vuna si.

⁵²I mijiviɗ wana asi mijiviɗeye, ɓa dideˀ kumoy misipakaŋ nder nder ta na ka? Mizli mitilam mi daf dumbuŋ, ti ɓi ngi so ngi mbur mijeŋŋe na, ki kiɗaka taŋ le vagay vagay, yo kum mijaka, midiraka wureˀani na, i mbur nah vuna.

⁵³Ɓimuɗuva, kum mulumaka ti vu modro ngi Bumbulvuŋhoy na, ko ki jaka ɓi nah a hirnga ta!»

⁵⁴Mizli mingila wuyoyo, taŋ micinaka mingiɓi hana na, a ja taŋ mevel haɗi, a ngirɗam sliŋ deŋ angi Etiyene.

⁵⁵Amma Etiyen a nih le kɗaf kɗaf ti ˀUf Mipal, a ɗuva hiri taˀ nga muŋ, a pura dudok ngi Buymisemuŋ waɗ Yesu deŋ tir vay hazum ngi Buymisemuŋ vuna.

⁵⁶Dar a ɓi: «Ani, i ra singila muŋ, a wucuh le wucah, waɗ Mangal ngi mbur deŋ tir vay hazum ngi Buymisemuŋ.»

⁵⁷Dar a zlaka a wudam haɗi haɗi, a dislaka slimiɗeye, ɓa a cine ka ta A dirba nah, taŋ gar a jumom sirit a hirnga Etiyene,

⁵⁸a ɗiɗaka nga duba gala, a kuypakaŋ ti ɗugur. Migi sedewohoy tuwa, a paka zana taŋhay avu mbur gawla mekelem ada, a zilaka Sawul.

⁵⁹Ti taŋ makuypakaŋ ti ɗugur na, Etiyen a dir dibiɗ, a ɓi: «Buy Yesu, tiɓa musuɗuk ɗu!»

⁶⁰A dirba nah, a huruk huruk ti popurok, a til mi ti gidaŋ: «Bumbulvuŋ, anja ki slufa mungra hana a hirnga taŋ ta! A dirba naŋ miɓa mingiɓi hana na, a mucu.