Read South Giziga ACT 8 Bible Online

ACT 8 - South Giziga bible

ACT 8

¹Sawulo kwana, naŋ tisi mizli hĩhĩyaka muc ngi Etiyen na ya. Angi hin nah vuna, a zlaka sipi Cikil ngi misikristu ngi Zerusalemeye nder nder haɗi. Taŋ gar a zliɗam hirnga nga hirwuy Yude, waɗ nga Samari, sey misliney mindiram tewle.

²Mitiɓihey a dikaka Etiyene, a tuwakaŋ haɗi teˀe.

³Sawulo, naŋ ara ngizla Cikil ngi misikristuhoyo, a ci vur hay vur hay, a ja zil ati ngwas mitiɓiheye, a pa taŋ ng'ar dangay.

⁴Mizli mizliɗam hirnga tuwa, a ram aka aka, a tilam mi ti Ɓimezle.

⁵Naŋ kine, Filip aru ng'ar walahay Samari, a til mi ti Ɓi ngi Mesi da mizli a diga.

⁶Zigiduw a jo kaw kaw, ti ˀay purla, slimiɗ jak ngi cine mingiɓi ngi Filipe, asi ara cinaka ɓi ngi cekenehey naŋ maga taŋ, yo ara puraka taŋ.

⁷Asi mike na, setenehey haɗi, a bam ti hirnga mizli, a wudam ti gidaŋ, yo mizli mihilɓahay ati misi blehey haɗi a ɗiyam le.

⁸Mizli ngir walahay Samari, a mumulom haɗi.

⁹Dambalaka, angi walahay nah na, mbur mekelem ada, a zilaka Simoŋ. I misi cucuk, yo a zuma hirnga le da mizli ngir walahay Samari. A wa vu naŋ i mbur mududoko.

¹⁰Mizli gar, zle avu ziri memeɗehey hã avu mizli madiɗahaya, a vulakaŋ vu taŋ le taˀ wãˀ, a ɓam: «Mbur hana i gidaŋ ngi Buymisemuŋ mazilaka Gidaŋ Madiɗa.»

¹¹Taŋ muvulakaŋ vu taŋ taˀ wãˀ vuna na, asi ara zuma taŋ hirnga diga zlezle ti ketele, naŋ maga taŋ na.

¹²Amma Filipe, naŋ mitila taŋ mi ti Ɓimezle ngi Zumabuy ngi Buymisemuŋ waɗ ti slimiɗ ngi Yesu Kristu na, a tiɓaka ɓi naŋle, dar a caka taŋ ar yam, ziley ati ngwasaya.

¹³Simoŋ tuwa kwana, a tiɓa ɓi nah le ya, a cakaŋ ar yam, a pula Filipe mata. Naŋ mapura cekenehey ati gwat migam ɗaˀ tahay magam tuwa na, ara zumaŋ hirnga da naŋ vuna ya muduba.

¹⁴A dirba nah, misliney misi a Zeruzalem a cinaka na, Samarihey a tiɓaka ɓi ngi Buymisemuŋ le, a slinaka ti Piyer ati Zaŋ nga diga.

¹⁵Ti Piyer ati Zaŋ mindilam a diga na, a diram dibiɗ vur Samariheye, ɓa a lumam ˀUf Mipal.

¹⁶Asi mike na, ˀUf Mipal a so angi mbur pal asi taŋ ɗaˀ t'aruŋ, a caka taŋ ar yama ti slimiɗ ngi Buy Yesu tewle si.

¹⁷Piyer ati Zaŋ a bucaka haŋ ar taŋ, joˀ Samarihey a lumam ˀUf Mipala so.

¹⁸Amma ˀUf Mipal, Simoŋ mupura mitiɓiheye, a lumaka ti misliney mabucaka haŋ ar taŋ na, a wuɗ ɓa a vula taŋ dala.

¹⁹A ɓa taŋ: «Vulikiy gidaŋ misenna da ya ya, ɓa ko mizli wanaka gar, ya misa buca haŋ le ar taŋ na, a sa lumam ˀUf Mipala ya.»

²⁰Amma Piyer a mbiɗaŋ di: «Ka ati dala ɗik vuna gar, zizam! Vur gwat ngi vul ngatara ngi Buymisemuŋ na, ki wa kaɓa ki hiɗika ti dala gu kwa?

²¹Hana i slra ɗik ta, mi ngi ɗik anta ra ta, asi mevel ɗik anta kaslsla a mbuŋ Buymisemuŋ ta.

²²Zil marava, pula malambaˀ ɗik na, yo tumbulo Bumbulvuŋ. Asinta, a sa puyuw wuluk muso kahana a mevel ɗik na kwani.

²³Asi mike, yi pura na, ka ti mevel miɗalak ka meɗeleke, yo mungra a juwuw le.»

²⁴Dar Simoŋ a mbiɗa taŋ di: «Na, kum vuna, tumbuloko Bumbulvuŋ vur ya, ɓa ɓi kum miɓaka na, a gi avu ya ta.»

²⁵A dirba Piyer ati Zaŋ migaka sedewo taŋ, mitilam mi ti ɓi ngi Bumbulvuŋ na, a mam nga Zerusalem a muŋ, bal ti tila mi ti Ɓimezle angi prok ngi Samarihey haɗi.

²⁶Modro ngi Bumbulvuŋ a ɓa Filipe: «Slikiɗ, aru kini tir vay ngi ruwuy, ti ngi jiviɗ mapo sar baɗ ti Zeruzalem nga Gaza na.«Jiviɗ nah na, anta ram ti ngaˀa mata.

²⁷Filip a mur mata, dar a ru. Dambalaka mbur Etiyopi, mbur munguɗo, a zuɓ mulak le zleˀe vur Bumbulvuŋ nga Zeruzalem, i mbur madiɗa miji zlili ngi Kandas, ngwas mazum buy a Etiyopi.

²⁸A cifi le ar mota ngi pilisey, ara mi ngi hay naŋ bal ti slufa ɗerewol ngi mijiviɗ Ezayi.

²⁹ˀUf Mipal a ɓa Filipe: «Aru, ja is da mota ngi pilis ngi diga na.»

³⁰Filip a kil nga diga, a cine mbur Etiyopi maslufa ɗerewol ngi mijiviɗ Ezayi tuwa, a ɓaŋ: «Ani k'ada ki cine mbiɗeˀvra ngi ɓi ka maslufa vuna gisiŋ kwa?»

³¹Mbur tuwa a mbiɗaŋ di: «Da mbur majiniy anta na, yisa cine gu mbri mbrike?«Joˀ a zila Filipe, ɓa a jiɗ, ara cifi gweˀ acikeˀe.

³²Ɓi naŋ maslufa ar Ɓimutoho vuna, n'ani: «Naŋ kaɓa tumuŋ maram di nga sli ˀay, kaɓa tumuŋ milek lek a mbuŋ mbur maslaŋ ngwici. Naŋ kine, ko a wun mi ta.

³³A ma hirnga naŋ nga ruwuy, a gakaŋ kiita naŋ jeŋ ta. Mbur masa slufa ɓi ngi sukwi naŋ ada kwa? Vur hin ngi siifa naŋ a ruwuyo, a kiɗ mi le.»

³⁴Mbur Etiyopi tuwa a ɓa Filipe: «Ambuh, ɓiy di: mijiviɗ maɓi kahana vuna, a hirnga waka? A hirnga naŋ tehhe a muŋ kwa, malla a hirnga mbur mekelem kwa mbrike?»

³⁵Dar Filip a zla a ɓaŋ Ɓimezle ngi Yesu, a wa weˀ avu ɓi naŋ muslufa hana tuwa.

³⁶A zuɓaka jiviɗe, ara ndilam kasl a mi futuŋ, joˀ mbur Etiyopi a ɓa Filipe: «Yam anihĩ, matikiy ɓa ngi ci ar yam i mi maka?»

³⁷Filip a ɓaŋ: «Da ki tiɓi le a mevel ɗik wãˀ na, a gi.«Mbur Etiyopi a mbiɗaŋ di: «Yesu Kristu i Mangal ngi Buymisemuŋ, i tiɓa le.»

³⁸Dar a ɓi ɓa a cicaka mota ngi pilise, taŋ cuw taŋ a pam sar ng'ar yama, joˀ Filip a caŋ ar yama.

³⁹A dirba taŋ mubam tir yama na, ˀUf ngi Bumbulvuŋ a zuɓa Filipe faw, mbur Etiyopi a pura mata, a zuɓa jiviɗ naŋ ti mumul haɗi.

⁴⁰Filipe, a sa pura na, naŋ deŋ a Azot, a rudigi bal ti tila mi ti Ɓimezle angi walahay micawwahay gar, hã ara ndil a Sezare.