Read South Giziga ACT 9 Bible Online

ACT 9 - South Giziga bible

ACT 9

¹Sawulo, ara sipa mizli ngisi Buy Yesuhoyo nder nder, ɓa a kiɗa taŋ vagay vagay na si. Ara cufuɗa

²masay madiɗa, ɓa a vulaŋ ɗerewol ngi ci ng'ar hay ngi diradibiɗ ngi Yedehey a Damasa. Da a lum mizli misipi jiviɗ ngi Buy Yesu le, ziley malla ngwasay na, ɓa a sa so taŋ kaˀ kaˀ ti celelu nga Zeruzalem.

³A zuɓa jiviɗe le, ara ru. Ti naŋ migweˀ avu Damasa, gurjik si na, li a wucuɗo ti muŋ kpah gun hirnga naŋ.

⁴Sawul a diɗ a ruwuy, a cin ˀay ka ngi mbur, a ɓaŋ: «Sawul, Sawul, ki sipiy nder nder vur mike?»

⁵Sawul a cufuɗaŋ: «I ka waka Buy?«A mbiɗaŋ di: «I ya Yesu, ka masipiy nder nder na.

⁶Amma slikiɗ so, walahaya, yo a sa ɓukuw ɓi ngi gwat ka masa gaŋ.»

⁷Cil naŋhay, taŋ maram bumoˀ na, a cicam, zluwun a hila taŋ mi siriw. T'ada cinam ˀay ngi mbur ɓula, amma ko anta puram mbur ta.

⁸Dar Sawul a slikiɗ baɗ a ruwuyo, hiri ngway ngbaŋ, amma anta pur gwat ko neˀ mata, cil naŋhay a jakaŋ kaw avu haŋ, a ɗiɗakaŋ ti ɗiɗi, a cam di nga Damasa.

⁹A cifi a diga, a gi hin makir, ko a pur ta, a zum gwat ta, a si gwat ta.

¹⁰Mbur ngisi Yesu mekelem ada a Damas a diga, a zilaka Ananiyas. A pura ti kleŋ, Buy Yesu ara zilaŋ: «Ananiyas! Ananiyas!» Naŋ a mbiɗaŋ di: «Y'anihĩ Buy.»

¹¹Buy Yesu a ɓaŋ: «Slikiɗ, aru ng'ar buwol mazilaka Buwol Micir cir na, yo ɓa ki cufuɗa mbur mazilaka Sawul ngir walahay Tarse, naŋ da a hay Yudas, aro ar li diradibiɗi.

¹²Yo ar diradibiɗe, a pura mbur mazilaka Ananiyas, ara ci, ara bucaŋ haŋ a hirnga, ɓa a wunaŋ hiri.»

¹³Ananiyas a mbiɗaŋ di: «Buy, malambaˀ ngi mbur nah gar, naŋ miga da mizli ɗikey mipal, misi a Zeruzalem na, i cine ɓi nah le.

¹⁴Yo aka kwana, masay madiɗahaya, a pulakaŋ jiviɗ le ɓa mizli mazilaka slimiɗ ɗik gar na, a juwa taŋ ti celelu.»

¹⁵Amma Buy Yesu a ɓaŋ: «Aru, asi mbur nah na, i ya muwunaŋ ɓa ngi biga slimiɗ ɗu avu sukwi mekelemey ati buy madiɗa taŋhay waɗ avu Israyeley.

¹⁶Asi mike na, ya ti hirnga ɗu, gwat naŋ masa si bonoy vurˀe gar asi slimiɗ ɗu na, i sa bigaŋ di.»

¹⁷A dirba nah, Ananiyas a ru, a ci ng'ar hay tuwa, a bucaŋ haŋ a hirnga, a ɓaŋ: «Sukum ɗu Sawul, mislino ya ɓa ngi wunuw hiri a muŋ, yo ɓa ki nih ti ˀUf Mipal na, i Buy Yesu mubuguw vu a jiviɗ zleˀe tuwa.»

¹⁸Angi nah si na, gwat ka koslongorokoy a diɗoko ti hiri, a pur a muŋ. Dar a cakaŋ ar yama.

¹⁹A dirba naŋ muzum gwat na, a lum gidaŋ le a muŋ. Sawul a cifi, a gi hin neˀ ati mizli ngisi Yesu ngi Damasaya.

²⁰Ko a mur neˀ mata, a zla tila mi ar hay ngi diradibiɗ ngi Yudeheye, a ɓi: «Yesu i Mangal ngi Buymisemuŋ.»

²¹Mizli macinaka gar na, ɓi naŋ a zuma taŋ hirnga le, a ɓam: «Maguzuvura mizli mazilaka slimiɗ ngi Yesu a Zeruzalem tuwa, i mbur hana vuna ta kwa? Ani a so na waˀwaˀ ɓa a ja taŋ, aru ti taŋ kaˀ kaˀ ti celelu da masay madiɗahay takwa?»

²²Amma Sawulo, a ro mi haram haram gisiŋ gisiŋ. Ti naŋ mabiga taŋ di Yesu i Kristu gisiŋ vuna si na, Yude ngir walahay Damasa, a sinaka ɓa a ɓakaŋ kini ta.

²³A zikam a zikam na, Yude tayna a kusom, a ngilam wuy ɓa a kiɗaka Sawulo vagay.

²⁴Sawul a si na gidiɓi taŋ na le, hã a jiginaka mizlingre ngi walahaya duvuɗ ti papas gar, ɓa a kiɗaka Sawulo vagay.

²⁵Amma ngi duvuɗ mekelem ada na, mizli ngi seˀehey a zuɓaka, a pam di sar tir mohol, kutuk angi leleke.

²⁶Sawulo mindil a Zeruzalem na, a zla ɓa a jum ng'avi mizli ngisi Yesuhoyo, amma taŋ gar a zluwunam di. Ɓa a ɓam a tiri mbur ngisi Yesu le gisiŋ na, a tiɓaka ta.

²⁷Dar Barnabas a zuɓaŋ, aru di ng'avi mislineye, a slufa taŋ ɓi ngi Sawul mupura Buy Yesu miɓaŋ ɓi a jiviɗ, waɗ naŋ mitil mi ti zila slimiɗ ngi Yesu a Damas manja zluwun na.

²⁸Zle tapasa, Sawulo, a bam, yo a moko bumoˀ ati mislineye nga Zerusaleme, a til mi ti zila slimiɗ ngi Buy Yesu manja zluwun.

²⁹A kiɗam slir ati Yude miɓi mi Grekeye, a gam mi ati taŋ, amma taŋ ara puram jiviɗ ɓa a zizakaŋ.

³⁰Sukum naŋhay micinaka ɓi naŋ na, a ram di nga Sezare, yo a slinam di ti diga nga Tarse.

³¹Cikil ngi misikristuhoy misi angi hirwuy Yude, Galile ati Samari gar na, a roko zuy zuy, ara lumam gidaŋ, ara hinam hirnga a mbuŋ Bumbulvuŋ, mbele ˀUf Mipal majina taŋ, yo ara sikam nga mbuŋ nga mbuŋ.

³²Naŋ kine, Piyere, mabula li ko amaka gar na, ngi pas mekeleme, a ndil a hay mitiɓihey misi a Lida.

³³A luuma mbur mekelem ada a diga na, naŋ hilaɓ hilaɓ ɓaˀ ar cacala, a zilaka Ene, a zik di le vi dangafaɗa.

³⁴Joˀ Piyer a ɓaŋ: «Ene, i Yesu Kristu maɗiyuw. Slikiɗi, ɗiya cacala ɗike ti haŋ ɗike.» Angi nah si na, Ene a slikiɗ pirtaˀ.

³⁵Mizli ngir walahay Lida ati ngir li micay ngi Saroŋ, taŋ mupuraka kahana na, a mbuɗoko ng'avu Bumbulvuŋ.

³⁶Ngwas mitiɓi mekelem ada a Zafa, a zilaka Tabita. Ti mi Greke, ‹Dorkas›, mbiɗeˀvra: ‹Mangazaw› A gi gwat mezlehey haɗi teˀe, a jina misi murgahaya haɗi.

³⁷Ti hin nah na, jiji a jaŋ, a mucu. A dirba taŋ mubunaka vagay naŋ na, ara kaka ar hay minjirngasl a hirnga cala.

³⁸Lida naŋ gweˀ avu Zafa jaka, mitiɓihey micinaka Piyere naŋ da a diga na, a slinam mizli cuw nga zil naŋ, a ɓakaŋ: «Ambuh, wuso vu ng'avi ndra.»

³⁹Dar Piyer a ram kutum ati taŋ si. Ti naŋ mindil na, a jiɗam di ng'ar hay mijirngasl a hirnga cala tuwa. Ngwas wudigahay gar a roko dedeŋ a mbuŋ naŋ, ara tuwam. A bigakaŋ rigahay ati godohoy naŋ maja taŋ zleˀe ti naŋ misi ti siifa naŋ aruŋ.

⁴⁰Piyer a bi ti mizli gar ng'avra, a huruk huruk a ruwuy, a dir dibiɗ. Dar a mbiɗi ng'avi vagay ngi ngwas tuwa, a ɓaŋ: «Tabita, slikiɗi!» Tabita a wuna hiri, naŋ mupura Piyer na, a slikiɗ joˀ.

⁴¹Piyer a tilaŋ haŋ, a slikiɗaŋ, a zilo mitiɓihey ati ngwas wudigahay tuwa, a biga taŋ Tabita deŋ ti siifa naŋ.

⁴²Mizli ngi Zafahay gar, a cinaka ɓi nah le, joˀ mizli haɗi a tiɓaka ɓi ngi Bumbulvuŋ.

⁴³Piyer a zik a Zafa haɗi, a hay Simoŋ mekelem ada, i mbur mufukuɗa garaka.