Read South Giziga ROM 10 Bible Online

ROM 10 - South Giziga bible

ROM 10

¹Sukum ɗu misikristuhoy, i ra wuɗ ti mevel ɗu wãˀ, ɓa Yudehey a laham, yo i ra tumbulo Buymisemuŋ vurˀe ma.

²Asi i ga sedewo taŋ gu: A roko ti may ngi gi gwat ngi Buymisemuŋ haɗi haɗi, amma a sinaka jiviɗ ngi gi naŋ ta.

³Asi mike na, jiviɗ Buymisemuŋ maɗiyi di mizli jeŋŋe na, a slaka wala nah ta. Joˀ taŋ a puram jiviɗ ti haŋ taŋ, ɓa a tiram jeŋŋe. Vurˀe, jiviɗ Buymisemuŋ maɗiyi di mizli jeŋŋe na, a hinam hirnga aseˀe ta.

⁴Asi ɓimujuwa na, Kristu a naha mi naŋ le, ɓa ko wa gar mitiɓi le na, a ndir jeŋŋe a mbuŋ Buymisemuŋ.

⁵Mbur mandir jeŋŋe asi naŋ masipa ɓimujuwa na, Moyis a toho ɓi naŋ ani: «Mbur maga gwat ɓimujuwa maɓa na, a sa ndir ti siifa aseˀeŋ.»

⁶Amma Bumbulvuŋ maɗiya mburo jeŋŋe asi tiɓi naŋ na, Ɓimutoho a ɓi vurˀe anihĩ: «Anja ki ɓi a mevel ɗike: Masa jiɗ ng'a muŋ, i waka na? Anja ki ɓi ta» (mbiɗeˀvra: jiɗ nga muŋ ɓa ngi po sar ti Kristu).

⁷Yo ma na, ki ɓi: «Masa pi sar ng'ar li ngi mizli mumucahay, i waka na? Anja ki ɓi ta ma» (mbiɗeˀvra: slikiɗa Kristu a muŋ baɗ ti wuzla mumucahay).

⁸Na, Ɓimutoho a ɓi mbri ska? A ɓi: «Mingiɓi, naŋ da gweˀ avu ka, naŋ da a balam ɗike, yo a mevel ɗike.» Ɓi nah na, i ɓi ngi tiɓi ndra, ndra matilam di mi na.

⁹Da ki ɓi le njah ti mi ɗik a mbuŋ mizli gar: «Yesu i Buy», yo da ki tiɓa le ti mevel purla, Buymisemuŋ a slikiɗa le baɗ ti wuzla mumucahaya na, kisa lih.

¹⁰Vur mike na, mbur matiɓi ti mevel purla na, Buymisemuŋ a ɗiyaŋ jeŋŋe, yo mbur maɓi njah ti mi naŋ kwana, Buymisemuŋ a lahaŋ.

¹¹Asi Ɓimutoho a ɓi: «Ko wa mitiɓaŋ le na, anta sa pi mesem ta wãˀ.»

¹²Vurˀe, mbur Yude asinta, mbur Grek asinta. Taŋ gar, Bumbulvuŋ taŋ purla, ara gi gwat mezlehey haɗi da mizli mandiram deŋ ti zila slimiɗ naŋ.

¹³Asi mike, Ɓimutoho a ɓi na: «Ko wa gar mindir le zlak ti zila slimiɗ ngi Bumbulvuŋ na, a sa lih.»

¹⁴Amma da a tiɓakaŋ ta si na, a sa ndiram zlak ti zila slimiɗ naŋ mbri mbrike? Da a cinam ɓi naŋ ɗaˀ ta si na, a sa tiɓaka mbri mbri zleˀe ka? Da mbur a til di mi ɗaˀ ta si na, a sa cinam mbri mbri zleˀe ka?

¹⁵Da a slinam mizli ta si na, a sa tilam di mi mbri mbri zleˀe ka? Yo a tohoko ma na: «Mizli masoko tilam mi ti Ɓimezle na, mukuy kanah, i mike?»

¹⁶Amma Ɓimezle, mitiɓi naŋhaya, i mizli gar ta. Asi Ezayi ɓi: «Bumbulvuŋ, ɓi ndra matilam di mi na, mitiɓa, i waka?»

¹⁷Naŋ kanah, tiɓi na, a bo tir ɓi matilam di mi. Yo ɓi matilam di mi kwana, i ɓi ngi Kristu.

¹⁸Na, i cufuɗ so: A cinam ɓi nah ta kwa? Kay, a cinam le! Ɓimutoho a ɓi: «ˀAy taŋ a cin le asi ruwuy kurzluˀ gar. Yo mingiɓi taŋ a ndil le gbaˀ angi hirwuy mikiɗ mi.»

¹⁹Na, i cufuɗ maso: Israyeley a slaka wala nah ta kwa mbrike? Moyis a ɓa ɓi nah le si, a ɓi na: «Buymisemuŋ a ɓi: Sukwi ngi mizli mupuɗaw puɗaway ta na, i sa ga ɓa kisa gam taŋ suloŋ. Yo i sa pukum mi, ɓa kisa slikiɗam himaˀ a hirnga sukwi ngi mizli manja lesleye.»

²⁰Ezayi a tum vu, hã a ɓi: «Buymisemuŋ a ɓi: Mizli maram ti sipi ɗu zleˀe ta na, a lumikiy le. Mizli macufuɗam gwat neˀ avu ya zleˀe ta na, yi biga taŋ vu le.»

²¹Amma a ɓi ar Israyeleye na: «Angi hiipas gar na, i ra tila haŋ ng'avi mizli micina mi tahay, mambiɗam hirnga avu ya.»