Read South Giziga ROM 15 Bible Online

ROM 15 - South Giziga bible

ROM 15

¹Ndra mizli muzlak gidaŋ gidaŋ ar tiɓi na, sey i jinaka hĩhĩyahaya angi jijira hĩhĩy taŋ, anja i gam gwat ngi cira hiri da ndra tew ta.

²Anja mbur gar a gi gwat ngi cira hiri da mbur cil naŋ. A sa gi i gwat mukuy avaˀa ngi vulaŋ gidaŋ ar tiɓi.

³Asi mike na, Kristu a sipi di gwat ngi cira hiri da vu naŋ ta, amma a tohoko na: «Zi ngi mizli muzukuw na, a mbiɗi nga hirnga ɗu.»

⁴Dambalaka, ɓi mutohoko zlezle gar na, a tohoko ɓa ngi biga ndra gwata, ɓa i njaham hiri njah, asi ɓusaɓi ati tisla mevel, naŋ mavula ndra di.

⁵Anja Buymisemuŋ mavulukum ɓusaɓi ati tisla mevele, a jinukum ɓa ki ngiɓam ˀay kuy kuy ar wala kumo, kaɓa Yesu Kristu mawuɗo,

⁶ɓa ki hunumaka Buymisemuŋ, Cine ngi Buy ndra Yesu Kristu, ti mevel purla, yo ti ˀay purla.

⁷Tuɓam vu ar wala kumo, kaɓa Kristu mutuɓukum na ya, ɓa mizli a gaka dudok da Buymisemuŋ.

⁸Naŋ kine, i ɓukum na: Kristu mitiri gawla ngi Yudehey na, ɓa a biga taŋ di, Buymisemuŋ naŋ jeŋŋe, ɓa gwat Buymisemuŋ miɓa ɗaˀ le zleˀe da dideˀ mudumbuŋ ngi Yudehey na, a gi muduba,

⁹ɓa mizli Yude tahay na, a hunumaka Buymisemuŋ asi naŋ mapura taŋ ˀircece, kaɓa Ɓimutoho miɓi: «Vurˀe, i sa hunumuw a wuzla sukwi ngi mizli duniyahay, i sa hunumuw ti dimisi.»

¹⁰A ɓi ma: «Kum sukwi ngi mizli, jom ati mizli ngi Bumbulvuŋhoy gar, mumulom!»

¹¹Yo ma na: «Kum sukwi ngi mizli gar, hunumaka Bumbulvuŋ! Yo anja mizli gar, a jakaŋ salalay!»

¹²Ezayi a ɓi ma na: «Mbur a sa bo tir tizer ngi Zese, a sa slikiɗo ɓa a zum buy a hirnga sukwi ngi mizli gar. Sukwi ngi mizli a sa njaham hiri njah aseˀeŋ.»

¹³Anja Buymisemuŋ magukum ɓa ki njaham hiri njah na, a nihikum mevele ti mumul ati zuy ar kum mitiɓam na, ɓa njaha hiri kum na, a gi haɗa ti gidaŋ ngi ˀUf Mipal.

¹⁴Kum sukum ɗuwoy, ya vuna, i si na le gisiŋ gisiŋ, ki sinaka gi gwat mezle le kuy kuy wãˀ, ki naham le ti sin mijeŋŋe wãˀa, yo ki ndilaka le ngi kuti vu ar wala kumo.

¹⁵Amma ɗerewol, ya mutuhukum di na, i tuhukum di ar mekelemeye manja zluwun, ɓa ki wulkaka gwat kum mudubunaka le zleˀe si. I toho kanah asi mezle Buymisemuŋ migiy di,

¹⁶ɓa a tiri ti ya gawla ngi Yesu Kristu avu mizli Yude tahay. I vula vu ɗu le ngi gi slra ngi tila mi ti Ɓimezle ngi Buymisemuŋ, ɓa mizli Yude tahay, a tiram gwat ngi mikuli a mbuŋ Buymisemuŋ macira hiri da Buymisemuŋ, mikuli ˀUf Mipal muvula le da Buymisemuŋ wãˀ.

¹⁷Ar ya mujom ati Yesu Kristu na, i ndila le ngi huhumo vu ɗu, asi slra ɗu ya maga da Buymisemuŋ.

¹⁸Da i tum vu le ngi ɓi ɓi neˀ na, sey ar ɓi ngi slra Yesu Kristu miga tisi ya, ɓa ngi biga jiviɗ da mizli Yude tahay, ɓa a cinam mi da Buymisemuŋ. A ga tisi mingiɓi ɗu ati gwat ngi gi ɗu,

¹⁹yo tisi gidaŋ ngi cekenehey, gwat migam ɗaˀ tahay waɗ tisi gidaŋ ngi ˀUf Mipal. Naŋ kine, zle a Zeruzaleme, i ru gun gun ti tila mi ti Ɓimezle ngi Kristu kuy kuy wãˀ, hã sesẽŋ angi hirwuy Iliri.

²⁰Amma gwat ya muwuɗ dum le na, i tila mi ti Ɓimezle, sey angi li mizli micinam ɓi ngi Kristu ɗaˀ t'aruŋ, ɓa i juɓo avu ngi mbur mekelem muɗuva virzi naŋ le ɗaˀ zleˀe si ta.

²¹Naŋ kanah, ɓa i ga kaɓa Ɓimutoho miɓi: «Mizli miɓaka taŋ ɓi naŋ ɗaˀ ta na, a sa purakaŋ. Mizli micinam mingiɓi naŋ ɗaˀ ta na, a sa cinam.»

²²Mitikiy is mbeˀ mbeˀ ɓa ngi ru ngi hay kumo na, i Ɓimezle ya matil di mi hana.

²³Amma wurenna, i kiɗa mi ngi slra ɗu le angi hirwuy hana muduba, i ra wuɗ pur kumo ti yam ar gojogoɗo, a zik le vi mbeˀ mbeˀe.

²⁴Ti ya masa ru ngra Espayã na, i wa na, i sa purukum bal ti ya masa cuh na. A dirba ya mupura hiri kumo le neˀ, a mbiy le na, kisa jinikiy ngi ru nga diga.

²⁵Amma wurenna, i ra ru nga Zeruzalem ɗagay, nga jina mitiɓihey.

²⁶Asi misikristu ngi Maseduwanay ati ngi Akayahaya, a wulkam le ti mevel purla ɓa a cikilam gwat da misi murga ngi wuzla mitiɓi ngi Zeruzalemeye.

²⁷Muwulkam gi naŋ, i taŋ ti hirnga taŋ, amma wãˀ naŋ na, a zlir le ɓa a gaka taŋ di vuna zleˀe si. Asi, da Yude misikristuhoy a jinaka mizli Yude tahay na le ti gwat mezle ngi ˀUf Mipal na, sey Yudehey ta na kwana, a vulaka gwat mezle taŋhaya ngi jina taŋ ya.

²⁸Da ya misa kiɗa mi ngi slra hana le, yo ya misa vula taŋ gwat micikila hana le na, i sa cuh bal ti hay kumo nga Espayã.

²⁹Amma ti ya masa ru ngi hay kum na, i si na le, ɗuwulami ngi Kristu mihaɗi na, i sa ru di a haŋ.

³⁰Amma na, sukum ɗuwoy, ambuh ambuh kum, ti slimiɗ ngi Buy ndra Yesu Kristu, yo ti wuɗavu ngi ˀUf Mipal na, ɓa ki cikam vu jom ati ya ti diradibiɗ, kum madiraka vur ya na,

³¹ɓa i lih tisi haŋ ngi mizli ngi hirwuy Yude matiɓam ta na, yo ɓa mitiɓihey misi a Zeruzaleme, a tiɓaka gwat ngi jini vu, ya mara taŋ di na ti mumul.

³²Naŋ kine, da Buymisemuŋ a ngum le na, naɓa i sa ndil a hay kumo ti mumul, yo ɓa i sa lum muskavu a wuzla kumo neˀe.

³³Anja Buymisemuŋ mavul zuyo, a ndir ati kum gar. Amin.