Read South Giziga ROM 4 Bible Online

ROM 4 - South Giziga bible

ROM 4

¹I sa ɓam mbri vur Abraham, dideˀ ndra na ka? Ar joˀ nga naŋ mbur titra[1] na, a lum mike?

²Abrahama, da a ndir jeŋŋe a mbuŋ Buymisemuŋ, asi gwat ngi gi naŋ mimezle na, anja a lum gwat ngi huhumvu ti naŋ le. Amma a mbuŋ Buymisemuŋ ta ɓula.

³Asi mike na, Ɓimutoho a ɓi: «Abraham a tiɓa Buymisemuŋ le. Joˀ Buymisemuŋ kwana, a pura i mbur mijeŋŋe.»

⁴Dambalaka, mbur magi slra ngi mbur gar na, a wurkakaŋ, amma i migir nah na, anta slufaka kaɓa i gwat ngatara ta, i gwat sey a luma.

⁵Amma da mbur anta gi slra ta, Buymisemuŋ maɗiya mbur magi mungra na, da mbur nah ara tiɓaŋ na, Buymisemuŋ a puraŋ i mbur mijeŋŋe asi tiɓi naŋ na.

⁶Vurˀe, Davit ara ɓa ɓi ngi mumul ngi mbur Buymisemuŋ mapura i mbur mijeŋŋe, anta sey vur gwat ngi gi naŋ ta, a ɓi na:

⁷«Mizli Buymisemuŋ mupula gi gwat malambaˀ taŋhaya le, yo mupuya mungra taŋhaya le avra na, a mumulom!

⁸Mbur, Bumbulvuŋ mapura mungra naŋ kaɓa i ɓi ta na, a mumul!»

⁹Ɓi ngi mumul, Davit maɓi vurˀe na, naŋ vur mizli micam le a mizaway tew si kwa? Naŋ vur mizli micam mizaway ta na ya takwa? Naŋ kine, i ɓam na: «Buymisemuŋ a pura Abrahama i mbur mijeŋŋe, asi tiɓi.»

¹⁰Na, ɓi hana a gi ngi vunaka? Dumbuŋ angi naŋ mici a mizaw kwa? Malla a dirba ci mizaw naŋ kwa? Ĩˀ ĩˀ, a dirba ci mizaw ta, amma dumbuŋ anga.

¹¹Abraham a tiɓi le, a ci le a mizawa, vivi mabiga Buymisemuŋ a ɗiyaŋ le zlezle jeŋŋe na, a lum le. Bumbulvuŋ a ɗiya Abrahama dumbuŋ angi naŋ mici a mizawa. Naŋ kine, Abraham a tiri cine ngi mizli mitiɓihey gar. Ko da a cam mizawa ta tekeɗe kwana, Bumbulvuŋ ara pura taŋ ka mizli mijeŋŋehey.

¹²Abraham i cine ngi mizli micam mizaw le gar ma, mizli micam mizaway le tew kanah ta ɓula, amma mizli matiɓam a mevel taŋ ka ngi cine ndra Abraham miga dumbuŋ angi naŋ mici mizawa na jaka.

¹³Naŋ kine, Buymisemuŋ miɓa Abraham ati dideˀ naŋhaya ɗaˀ, a sa vula taŋ hirwuyo da taŋ wãˀ na, anta vur Abraham mija ɓimujuwa na ta, amma asi Buymisemuŋ mupuraŋ naŋ jeŋŋe, asi tiɓi naŋ.

¹⁴Da mizli a lumaka hirwuy Buymisemuŋ miɓa ɗaˀ le, a sa vula taŋ di na, asi taŋ magaka gwat ɓimujuwa miɓa na, naɓa tiɓi taŋ, i ngataraŋ, yo gwat Buymisemuŋ miɓa ɗaˀ le, a sa vula taŋ di na kwana, a tiri gwat lambaˀ le.

¹⁵Asi ɓimujuwa na, a slikiɗa himaˀ ngi Buymisemuŋ. Amma da ɓimujuwa anta na, naɓa ngila ɓimujuwa kwana anta ya.

¹⁶Naŋ kine, gwat Buymisemuŋ miɓa ɗaˀ le na, i lumaka tisi tiɓi. I gwat Buymisemuŋ mavula ngataraŋ, yo ɓa a ndir i gwat mupuɗaw wãˀ da dideˀ ngi Abrahamay gar. Anta vur mizli magaka gwat ɓimujuwa maɓa na tewle ta, amma vur tiɓi kaɓa ngi Abraham, cine ndra gar na ya.

¹⁷Naŋ kine, a tohoko na: «Yi cufuw le ki dideˀ ngi sukwi ngi mizli haɗi.» I dideˀ ndra a mbuŋ Buymisemuŋ, naŋ mitiɓaŋ na. Buymisemuŋ mavula siifa da mizli mumucahay i naŋ, yo miɓi le a ga gwat misi anta zleˀe ta, a gi na, i naŋ vuna ma.

¹⁸Abraham a tiɓa Buymisemuŋ le, a njih hiri le njah vurˀeŋ. Hin ngi njaha hiri na, a cuh le avu Abrahama, anta ava mata zleˀe. Vurˀe, a tiri cine ngi zigiduw haɗi teˀe, ka Buymisemuŋ miɓaŋ di zleˀe: «Dideˀ ɗikey a sa jam haɗa» tuwa.

¹⁹Vi ngi Abrahama, a gi ng'avu skata gu. Amma dumvu naŋ misi ka mumuca, yo Sara mayi mata na, da naŋ mira wulka a mevele na, ko naŋ anta hĩhĩy ar tiɓi ta.

²⁰Gwat Buymisemuŋ miɓa ɗaˀ na, Abraham a wuluk cuw cuw anga ɓa a hĩhĩyaŋ mevele ta. Amma tiɓi naŋ, a tusoŋ mevel jaka, a ga dudok da Buymisemuŋ.

²¹A si na le wãˀ a mevele gisiŋ gisiŋ: gwat Buymisemuŋ miɓa le ɗaˀ le na, Buymisemuŋ a ndila le ngi gi naŋ.

²²Buymisemuŋ mapura Abrahama i mbur mijeŋŋe na aseˀeŋ.

²³Dambalaka, ɓimutoho miɓi: «Buymisemuŋ a pura i mbur mijeŋŋe» na, anta vur Abraham pal ta,

²⁴amma a tohoko vur ndra ya. Ndra, Buymisemuŋ mapura ndra, ndr'i mizli mijeŋŋehey asi tiɓi na. Ndra i ra tiɓaka, i naŋ mislikiɗa Buy ndra Yesu ti wuzla mumucahaya.

²⁵Buymisemuŋ a vula Kristu ɓa mizli a kiɗaka vagay, asi ndra migam gwat malambaˀa, yo a slikiɗa ti wuzla mumucahaya, ɓa a ɗiya ndra jeŋŋe a mbuŋ naŋ.