Read South Giziga ROM 5 Bible Online

ROM 5 - South Giziga bible

ROM 5

¹Kanah so na, i ɗiyam le jeŋŋe a mbuŋ Buymisemuŋ, asi tiɓi, ani wurenna, ndra zuy zuy ati Buymisemuŋ, mbele Buy ndra Yesu Kristu.

²Gi mezle Buymisemuŋ miga ndra di, ndra mideŋ gidaŋ gidaŋ anga na, miga ɓa i kiraham gu ng'ara na, i Yesu vuna, asi tiɓi ndra. Yo ndra manjaham hiri asi dudok ngi Buymisemuŋ na, i jijaham na aseˀeŋ.

³Mifineˀ nah ma na, ko ti bonoy ndra masaka na kwana, ndr'i ra mumulom. Asi i sinaka le, bonoy mbur masa na, a sirkaŋ ɓusaɓi.

⁴Ɓusa ɓi a cica mburo zlak angi bonoyo. Cici zlak angi bonoyo kwana, a so ti njaha hiri.

⁵Njaha hiri na, anta gi gilaw da mbur ta, asi Buymisemuŋ a po wuɗavu naŋ le a mevel ndraˀahaya tisi ˀUf Mipal, naŋ muvula ndra di.

⁶Naŋ kine, ti ndra hĩhĩyahay zleˀe aruŋ na, hirak angi pas Buymisemuŋ muɗuva na, Kristu a muc vur mizli misi moˀorehey.

⁷Naŋ tuwaˀ ɓa mbur a tiɓa muc ar deɗe ngi mbur mijeŋŋe. Mbur a tum vu gu ngi muc ar deɗe ngi mbur magi gwat mezle far kwani?

⁸Amma Buymisemuŋ mibiga ndra di, naŋ muwuɗ ndra haɗa na, ti Kristu mumuc vur ndra, ti ndra misi ar mungra ndrahay aruŋ na.

⁹Ani wurenna, Kristu a ɗiya ndra le jeŋŋe ti pumbus, naŋ mipa vur ndra ma na, a sa laha ndra ti ngi himaˀ Buymisemuŋ masa zuɓa angi ndra na ta jak kwa?

¹⁰Naŋ kine, ndr'i mesene ngi Buymisemuŋhoy zleˀe, amma tisi Mangal naŋ mumuc na, ɓi ndra a ɗiyi le ati Buymisemuŋ muduba. Da naŋ kine na, ɓi ndra miɗiyi ati naŋ na, a sa laha ndra tisi siifa ngi Mangal naŋ vuna ta jak kwa?

¹¹Mifineˀ nah vuna ma na, i ra mumulom vur Buymisemuŋ, asi wurenna Buy ndra Yesu Kristu a ɗiya ɓi le ar wala ndra ati Buymisemuŋ.

¹²Naŋ kine, mungra a co ar duniya tisi mbur pal, yo muco kwana, tisi mungra. Vurˀe, sey mizli gar a micam, asi taŋ gar a gam mungra le.

¹³Dumbuŋ, angi Buymisemuŋ muvula ɓimujuwa naŋ da Moyis na, naɓa mizli ara gam mungra zlezle ar duniya si. Amma Buymisemuŋ a slufa mungra ngi mizli tayna ta, asi ɓimujuwa anta zleˀe taruŋ.

¹⁴Dambalaka zle avu Adamu hã avu Moyis na, muc a zum buy le ar mizli, ko ar mizli migam mungra ka ngi Adamu vuna ta ngbaŋ kwana, muc a zum buy le. Adamu, i foto ngi mbur masa sawa, naŋ a ngila ɓimuɗuva ngi Buymisemuŋ le.

¹⁵Amma mezle Buymisemuŋ maga ndra di na, i gwat mupurla ati mungra ngi Adamu na ta. Asi da mizli haɗi a micam le vur mbur pal migi mungra na, sokkota gimezle Buymisemuŋ miga ndra di, naŋ mipa a hirnga zigiduw haɗa tisi mbur pal, Yesu Kristu na jak kwa?

¹⁶Yo gwat Buymisemuŋ mavula na, naŋ wal avu mungra ngi Adamu miga na. Naŋ kine, zle avu mungra ngi mbur pal miga na, Buymisemuŋ a ga kiita ngi muc le da mizli. Wurenna mungra miji haɗa na, Buymisemuŋ ara ɗiya mizli jeŋŋe ti gwat naŋ mavula ngatara tuwa.

¹⁷Asi da muc muzum buy ar mizli na, tisi mbur pal, yo tisi malambaˀ ngi mbur pal na, sokkota Buymisemuŋ maga mezle haɗa da mizli, yo naŋ maɗiya taŋ jeŋŋe, taŋ masa ndiram ti siifa ngi zumabuy mbele mbur pal, Yesu Kristu na jak kwa?

¹⁸Naŋ kine, Buymisemuŋ a ga kiita ngi muc da mizli gar asi mbur pal migi mungra. Naŋ kanah ya, slra mijeŋŋe ngi mbur pal, Yesu Kristu na, a ɗiya mizli le jeŋŋe ɓa a lumam siifa.

¹⁹Mizli haɗa a tiram migi mungrahay asi mbur pal micin mi ta. Naŋ kanah ya, Buymisemuŋ a sa ɗiya mizli haɗi jeŋŋe asi cine mi ngi mbur pal, Yesu Kristu.

²⁰Ɓimujuwa na, a co ɓa mungra a yi vu ti gidaŋ haɗa. Amma da mungra miyi vu le haɗi na, gimezle ngi Buymisemuŋ a sik hã a funa ma.

²¹Kaɓa mungra muzum buy tisi muc na kwana, gimezle ngi Buymisemuŋ a zum buy tisi siifa ngi sete, mbele Buy ndra Yesu Kristu.