Read South Giziga ROM 8 Bible Online

ROM 8 - South Giziga bible

ROM 8

¹Wurenna, mizli mujumom le ati Yesu Kristu na, Buymisemuŋ anta ga taŋ kiita mata.

²Naŋ kine, ɓimujuwa ngi ˀUf Mipal, ɓi mavul siifa da mbur mujom ati Yesu Kristu na, a lihiy [2], le tivu ɓimujuwa ngi mungra ati ngi muco.

³Gwat ɓimujuwa ngi Moyis maga gu ta, asi kpak ngi vu ngi mbur mavuso na, Buymisemuŋ a ga le, a ga kiita le da mungra misi avu kpak ngi vu ngi mburo, ti naŋ mislino Mangal nga naŋ na. Mangala, naŋ ti kpak ngi vu mupurla ati ngi ndra magam di mungra na. A so ɓa ngi zuɓa mungra avra,

⁴ɓa gwat mijeŋŋe ɓimujuwa mawuɗo, a gi wãˀ a hur ndra, asi ndr'anta sipam gwat kpak ngi vu ndra mawuɗ ta, amma gwat ˀUf Mipal mawuɗo.

⁵Naŋ kine, mizli muluɓ luɓ avu kpak ngi vu taŋ na, a sipam di i gwat kpak ngi vu taŋ mawuɗo. Amma mizli muluɓ luɓ avu ˀUf Mipala kwana, a sipam di i gwat ˀUf Mipal mawuɗ aya.

⁶Sipi gwat kpak ngi vu mawuɗo, aru ti mburo ng'ar mucu. Amma sipi gwat ˀUf Mipal mawuɗo, aru ti mburo ng'ar siifa waɗ ng'ar zuy.

⁷Asi gi gwat kpak ngi vu mawuɗo, a tiri ti mburo, i mesene ngi Buymisemuŋ. N'anta hin hirnga a mbuŋ ɓimujuwa ta. A ja ɓi nah gu vuna ta si.

⁸Mbur muluɓ luɓ avu kpak ngi vu nga naŋ na, a cira hiri da Buymisemuŋ gu ta.

⁹Kumo, kum anta luɓ luɓ avu kpak ngi vu kumo ta, amma kum luɓ luɓ avu ˀUf Mipal, asi ˀUf ngi Buymisemuŋ nah na, naŋ da a hur kumo. Da ˀUf ngi Kristu anta a hur mburo ta na, naɓa i mbur ngi Kristu ta.

¹⁰Da Kristu, naŋ da a hur kumo na, dumvu kumo, i mumuca asi mungra gisiŋ, amma ˀUf Mipal a vulukum siifa, asi ki ɗiyam le jeŋŋe.

¹¹Yo Buymisemuŋ mislikiɗa Yesu ti wuzla mumucahay na, da ˀUf naŋ, naŋ da a hur kumo na, naɓa Buymisemuŋ mislikiɗa Kristu ti wuzla mumucahay na, a sa vula siifa da dumvu kum mamuc na ya, tisi ˀUf naŋ misi a hur kumo.

¹²Naŋ kine, sukum ɗuwoy, duvus ada avu ndra, amma i duvus ngi wuruk da kpak ngi vu ndra mawuɗ ɓa i sipaka na ta.

¹³Asi mike na, da ki ra sipam gi gwat kpak ngi vu kum mawuɗ na, kisa micam. Amma da ˀUf Mipal ara jinukum ɓa ki kiɗaka gwat kpak ngi vu kum mawuɗo vagay na, kisa ndiram ti siifa.

¹⁴Naŋ kine, mizli tayna gar masipam jiviɗ ˀUf Mipal mawuɗ na, taŋ i ziri ngi Buymisemuŋhoy.

¹⁵ˀUf Mipal, kum mulumam na, i ˀUf matiri ti kum bekehey ta, yo mami ti kum ng'ar zluwun a muŋ mata ma, amma ki lumam di i ˀUf magi ti kum ziri, naŋ mugulukum. Yo ndra matilaka mi da Buymisemuŋ, i ɓam: «Baha, Cine ndra» na, ti seˀeŋ.

¹⁶ˀUf Mipal vuna a ɓa membezleŋ ngi vu ndra njah: Ndr'i ziri ngi Buymisemuŋhoy.

¹⁷Ndr'i ziri naŋhay, yo ndr'i muzuma hayay, muzuma hay ngi Buymisemuŋ jom ati Kristu ya. Asi da i ra sam bonoy jom ati Kristu na, i sa lumam dudok mupurla ka nga naŋ na ya.

¹⁸Yi wa na, bonoy, ndra masaka angi hin muwurenna na, anta wam weˀ le ati dudok Buymisemuŋ masa njika ndra di tumbuŋ na ta wãˀ.

¹⁹Asi hin Buymisemuŋ masa biga dudok naŋ da ziri naŋhay na, gwat naŋ miga taŋ gar ara kutuko pas naŋ ti yam ar gojogoɗo.

²⁰Buymisemuŋ a pula gwat naŋ miga na gar asi haŋ ngi gwat ngatara lambaˀ. I gwat nah muwuɗ ti haŋ naŋ ta, amma i Buymisemuŋ mupula ti gidaŋ naŋ. Ko ti nah gar kwana, gwat Buymisemuŋ miga gar ara njih hiri aruŋ na si.

²¹Asi ti hin nah na, gwat naŋ miga gar na, a sa puloko di tir beke ngi muco, ɓa a sa luuma hirnga naŋ waɗ dudok ngi ziri ngi Buymisemuŋhoy na ya.

²²Naŋ kine, i sinaka le, hã dana, gwat Buymisemuŋ miga gar na, ara niˀic aruŋ, ara si bonoy kaɓa ngwas mayi.

²³Maniˀic, i naŋ pal ta, amma ndra vuna ya, ndra mulumam ˀUf Mipal, gwat ngi vul ngi Buymisemuŋ mudumbuŋ dumbuŋ naŋ na, i ra niˀicam a mevel ndra, i ra kutukoko Buymisemuŋ masa zila ndra, ziri naŋhay, naŋ migila ndra, naŋ masa bo ti dumvu ndra wãˀ tir bonoyo.

²⁴Asi Buymisemuŋ a laha ndra le, amma i njaham hiri aseˀe ti njih aruŋ. Na, da mbur ara pura gwat naŋ manjih hiri aseˀe tuwa na, kite a njih hiri ti njih mata. Gwat mbur mira pura ti hiri naŋ ma na, a njih hiri ti njih ɓula mbri mbri maka?

²⁵Amma da i ra njaham hiri ngi kutuko gwat ndra mapuraka ta na, naɓa i ra kutukom gwat ti ɓusaɓi.

²⁶Naŋ kanah ya, ˀUf Mipala kwana, ara so jina ndra, ndra hĩhĩyahaya, asi i sinaka tumbulo Buymisemuŋ ti jiviɗ naŋ ta. Amma ˀUf Mipal ti hirnga naŋ, ara tumbulo Buymisemuŋ vur ndra ti niˀic maɓi ɗaˀ ɗaˀ ti mi gu ta.

²⁷Joˀ Buymisemuŋ mapura mevel ngi mizli na, a si na gwat ˀUf Mipal mawuɗo. Naŋ kine, ˀUf madir dibiɗ ar deɗe ngi mizli ngi Buymisemuŋhoy na, a dira kasl kasl kaɓa Buymisemuŋ mawuɗo.

²⁸Yo ma na, i sinaka le, Buymisemuŋ a jum jom ng'ar gwat ngi mizli mawuɗakaŋ gar, ɓa a tiri gwat mezle avu taŋ. Taŋ i mizli Buymisemuŋ mizila taŋ ka naŋ mutoho ɓi nah zleˀe.

²⁹Asi mike na, mizli Buymisemuŋ misina taŋ le daf dumbuŋ zleˀe si na, a wuna taŋ le dumbuŋ zleˀe ya, ɓa a bam vu heˀ ati Mangal naŋ, ɓa Mangal naŋ a tiri modogom a wuzla sukum naŋhay mihaɗi na.

³⁰Mizli Buymisemuŋ muwuna taŋ dumbuŋ zleˀe tuwa na, a zila taŋ le ma. Mizli naŋ mizila taŋ na, a ɗiya taŋ le jeŋŋe. Yo mizli naŋ miɗiya taŋ jeŋŋe tuwa, a vula taŋ dudok naŋ le ma.

³¹Ani, i ɓam mbri aruŋ maka? Da Buymisemuŋ i ngi ndra na, magi mesene ti ndra gu, i waka?

³²Ko Buymisemuŋ a sli himaˀ ti Mangal nga naŋ ta, amma a vula, a gi di mikuli vur ndra gar. A sa gi mbri ɓa a sa vula ndra gwat gar tisi Mangal naŋ ta ka?

³³Mizli Buymisemuŋ muwuna taŋ na, masa kupa taŋ ɓi gu, i waka? Asi Buymisemuŋ vuna ara ɗiya taŋ jeŋŋe.

³⁴Mbur maga taŋ kiita gu, i waka? Anta wãˀ! Asi Yesu Kristu a muc le, yo mukuy wãˀ ma na, a slikiɗ le, naŋ da tir vay hazum ngi Buymisemuŋ, ara dir dibiɗ ar deɗe ndra.

³⁵Masa wuɗka ndra gu ati Kristu mawuɗ ndra na, i waka? Bonoy kwa? Lik kwa? Sipi vu minder nder kwa? May kwa? Murga kwa? Mendere kwa? Malla muc kwa?

³⁶Naŋ kaɓa Ɓimutoho miɓi: «Angi hiipas gar na, a roko sipam ndra ngi kiɗ vagay vagay asi ka. A roko gam ti ndra kaɓa tumuŋhoy maram taŋ ng'ar li sli ˀay taŋ.»

³⁷Amma angi nah gar na, i lumam bugawla le wãˀ tisi mbur muwuɗ ndra na.

³⁸Haˀaw, i si na le wãˀ gisiŋ, gwat masa wuɗka ndra gu ati Yesu mawuɗ ndra na anta. Ko mucu, ko siifa, ko modro ngi Buymisemuŋhoy, ko gidaŋ mekelemey pal pal, ko hin misi dana ati hin ngi mbuŋ,

³⁹ko gidaŋ ngi muŋhoy, malla gidaŋ ngi ruwuyoy. Buymisemuŋ muwuɗ ndra, naŋ mibiga ndra di ar ndra mujom ati Buy ndra Yesu Kristu na, a wuzla gwat naŋ miga taŋ gar na, ko mekelem pal mawuɗka ndra ti vaˀa gu anta.