Read South Giziga 1CO 1 Bible Online

1CO 1 - South Giziga bible

1CO 1

¹I ya Pol, Buymisemuŋ a wuɗ le, a ziliy ɓa yi tiri mislin ngi Yesu Kristu. Ya ati sukum ndra Sosten matohoko ɗerewol hana,

²da Cikil ngi misikristu misi a Korenti, yo waɗ da mizli mitiram mitiɓihey, asi taŋ mujom ati Yesu Kristu na. Buymisemuŋ a zila taŋ le ɓa a tiram mizli naŋhay. Mizli gar mandiram zlak ko amaka gar ti zila slimiɗ ngi Buy ndra Yesu Kristu, i Buy taŋ, yo i Buy ndra ya.

³Anja Cine ndra Buymisemuŋ ati Buy ndra Yesu Kristu a gukum mezleŋ, a vulukum zuy.

⁴I ra ga sise da Buymisemuŋ ndrehhe asi ɓi kumo, vur naŋ mugukum mezle asi kum mujom ati Yesu Kristu na.

⁵Asi mike na, ar kum mujom ati Yesu Kristu na, ki gam zlili le ar gwat ngi gihey gar, ar mingiɓi, yo ar sin ma gar.

⁶Mbiɗeˀvra: gi sedewo ar Kristu a dir virzi le gidaŋ gidaŋ a hur kumo,

⁷hã gwat ngi vul tisi gimezle ngi Buymisemuŋ mukicukum pal tekeɗe, anta mata. Kum mizli makutukom Buy ndra Yesu Kristu masa bugo vu bidasa.

⁸Masa cucukum zlak gidaŋ gidaŋ hã avu kiɗa mi naŋ na, i naŋ vuna ma, ɓa ti hin ngi Buy ndra Yesu Kristu na, ko mbur masa mbuɗukum hirnga, anta.

⁹Bumbulvuŋ muzulukum ɓa ki ndiram jom ati Mangal naŋ Yesu Kristu, Buy ndra na, gwat naŋ miɓa le na, a ga cummo.

¹⁰Sukum ɗu misikristuhoy, i ra gukum ambuh ambuh, kum gar kumo ti slimiɗ ngi Buy ndra Yesu Kristu: ngiɓam ˀay purla, anja ki wunkam ˀay ar wala kumo ta. Ar wuluk kum ati gwat kum majuwaka le a mevele ngi gi gar na, jumom ˀay purla.

¹¹Sukum ɗuwoy, asi mike na, mizli ngi Klowehey a ɓikiy, ki ra tiram ar wala kumo kini.

¹²I wuɗ i ɓi na: a wuzla kumo, mbur gar a ɓi: «Yi mbur ngi Pol, yi ngi Apolos, yi ngi Piyer, yi ngi Kristu.»

¹³Kristu a wunuk le kwa? Midiram avu dum mizlira asi kum na, i Pol kwa? Taŋ mucukum ar yam na, ti slimiɗ ngi Pol kwa?

¹⁴I ga sise da Buymisemuŋ, asi i ci mbur purla ar yam a wuzla kumo ta, sey Krispus ati Gayus.

¹⁵Naŋ kine, ko mbur loŋ maɓi gu: kum micam ar yama, ti slimiɗ ɗu na, anta.

¹⁶Hãhh, ada, mizli ngi hay Stefanasay na, i ca taŋ le ar yama ya. Da i ci mbur mekelem le pal ar yama ma tekeɗe kwana, i sin mata so.

¹⁷Asi Kristu a slino ya ɓa ngi ci mizli ar yam ta, amma ɓa ngi tila mi ti Ɓimezleŋ. Yo yi tila ti sinmijileŋ ngi mbur ta, ɓa gidaŋ ngi muc ngi Kristu angi dum mizlira na, a tiri gwat lambaˀ ta.

¹⁸Naŋ kine, avu mizli mazizamaya, ɓi ngi dum mizlira i ɓi ngi mibirngahay. Amma avu ndra mizli malaham na, i gidaŋ ngi Buymisemuŋ.

¹⁹Vur a tohoko na: «Sinmijileŋ ngi misi sinmijileŋheye, i sa hirya avra, lesl ngi mizli misi lesleye, i sa susuymo avra.»

²⁰Mbur misi sinmijileŋ amaka? Buy ngi ɓimujuwa amaka? Mingila mi ngi duniya hana amaka? Sinmijileŋ ngi duniya hana, Buymisemuŋ a tiri di ɓi ngi mibirngahay le ta kwa?

²¹Asi duniya ti sinmijileŋ nga naŋ na, a si na Buymisemuŋ ar sinmijileŋ nga naŋ, naŋ minjikaŋ di na ta. Vurˀe, ɓi ngi mibirngahay ndra matilam di mi, mizli matiɓaka gar na, Buymisemuŋ a hĩyã le, ɓa a laha taŋ ti naŋ.

²²Yudeheye, taŋ a cufuɗam ɓa a puram cekenehey, yo Grekeye, taŋ a cufuɗam ɓa a lumam sinmijileŋ.

²³Amma ndra, i tilam di i mi ti Yesu midiraka ar dum mizliraŋ. I ɓi ngi ji mevel haɗa da Yudeheye, yo avu Yudehey ta na, i ɓi ngi mibirngahay.

²⁴Amma avu mizli Buymisemuŋ mizila taŋ na, da ko i Yudehey malla i Grekey kwana, ɓi ndra matilam di mi na, i ɓi ngi Kristu, gidaŋ ngi Buymisemuŋ, yo sinmijileŋ ngi Buymisemuŋ ma.

²⁵Vur gwat ngi Buymisemuŋŋ gar mizli mawaka kaɓa i ɓi ngi mibirngahay na, dambalaka, i sinmijileŋ mifineˀ sin ngi mizli. Yo gwat mawaka kaɓa i hĩhĩy ngi Buymisemuŋ na, dambalaka i gidaŋ mifineˀ gidaŋ ngi mizli.

²⁶Sukum ɗuwoy, puraka ɗi, kum Buymisemuŋ muzulukum na, kum i waniyka? Avi mizli mapuraka na, misi ti sinmijileŋhey, migidaŋhay, malla ko miyaka taŋ ar hay madiɗahay anta haɗa a wuzla kumo ta.

²⁷Amma gwat duniya mapura kaɓa i ɓi ngi mibirngahay na, Buymisemuŋ a wina le ɓa ngi pa mesem da mizli misi ti sinmijileŋ jileŋhey. Yo gwat duniya mawa kaɓa i hĩhĩy na, Buymisemuŋ a wina le ɓa ngi pa mesem da mizli misi gidaŋhay.

²⁸Gwat duniya mapura vus le, hiris le, yo i gwat ta na, Buymisemuŋ a wina le ɓa ngi ziza gwat duniya mapura i gwat hirnga na.

²⁹Naŋ kine, ɓa ko mbur loŋ mahuhum vu gu a mbuŋ Buymisemuŋ, anta.

³⁰Kum misi jom ati Yesu Kristu na aseˀeŋ, naŋ a tiri le i sin ndra mijileŋ muso ti vu Buymisemuŋ, miɗiy ndra jeŋŋe a mbuŋ Bumbulvuŋ, mitiri ti ndra mizli nga naŋhay, yo mucuko ndra tir mungra ndrahay.

³¹Naŋ kine, a gi le ka taŋ mutohoko: «Mbur muwuɗ le ɓa a huhum vu na, anja a huhumo vu ar naŋ mujom ati Bumbulvuŋ.»