Read South Giziga 1CO 10 Bible Online

1CO 10 - South Giziga bible

1CO 10

¹Sukum ɗu misikristuhoy, ɓi ani na, i wuɗ ɓa ki ndiram manja sin naŋ ta. Dideˀ ndraˀahaya zleˀe gar, a ram gazlavay sirit a hirnga taŋ, taŋ gar a cohom le ti hur mizawa.

²Yo ar taŋ mujom ati Moyis na, Moyis a ca taŋ le ar gazlavay waɗ angi mubuliy ma.

³Taŋ gar a zumam ɗaf mupurla Buymisemuŋ muvula taŋ di,

⁴yo a sam gwat ngi si mupurla Buymisemuŋ muvula taŋ di. Vur a sam avu mandazlay muwã misipa taŋ, Buymisemuŋ muvula taŋ di. Mandazlay muwã nah na i Kristu.

⁵Amma vendeke taŋ, Buymisemuŋ a hĩyã taŋ ta. Vurˀe, a ndilam, a micam ɓaˀɓaˀ a wuzlaɓuh mikirɗak kirɗaka.

⁶Gwat tayna a gam na, a bigam ndra di i gwat, ɓa i hĩyãm gwatay lambaˀ lambaˀ ka taŋ na ta.

⁷Anja ki dilkam a mbuŋ kulihey kaɓa mekelemey a wuzla taŋ midilkam na ta. Naŋ kine, a tohoko na: «Mizli a cifam ngi zuma gwat waɗ ngi si gwata. Dar a slikiɗam ɓa a gam dungur.[6].»

⁸Anja ko i pulaka vu ndra ar gi sulome, kaɓa mizli mekelemey a wuzla taŋ mupulaka vu taŋ na ta ma. Angi hin purla na, mizli mindilam, mumicama, taŋ durmuk kukur cuw nga makir.

⁹Anja ko i cam a kwacay Bumbulvuŋ kaɓa mizli mekelemey a wuzla taŋ micam na ta ma. Kaw a humbiɗa taŋ, dar a micam.

¹⁰Yo anja ko ki dirɗam vu ka mizli mekelemey a wuzla taŋ midirɗam vu na ta. Modro ngi Bumbulvuŋ miziza vu a ngizla taŋ kap.

¹¹Gwat tayna gar a gam avu taŋ na, ngi biga ndra gwat, yo a tohoko taŋ ti tuh na, ɓa ngi ka ndra mumuyuŋ ngi zay sla a slimiɗe, asi ndra migweˀ avu kiɗa mi ngi hin na.

¹²Naŋ kine so, mbur mawa vu naŋ ka naŋ deŋ ti deŋ na, anja a gi wer ɓa a diɗ ta.

¹³Tikiney gar mulumukum na, taŋ weˀe avu gidaŋ ngi mburo si. Bumbulvuŋ miɓa ɓi le na, a ga gisiŋ. Anta pula jiviɗ naŋ ɓa ki lumam tikin mifineˀ gidaŋ kumo ta. Da kum mulumam tikin le na, a sa vulukum wer ngi bi ti raˀa ati gidaŋ ngi ɓus naŋ.

¹⁴Vurˀe, yeme ɗuwoy, ki huruk hurukam a mbuŋ kuliheye.

¹⁵Ya maɓukum na, kaɓa maɓam da mizli misi lesley. Slaka wala ngi ɓi ɗu ti haŋ kumo so.

¹⁶Sikiɗ ngi ɗuwulami ndra magaka sise da Buymisemuŋ aseˀe na, a jumo ndra purla ati pumbus ngi Kristu ta kwa? Peŋ ndra mangilaka na, a jumo ndra purla ati vu ngi Kristu ta kwa?

¹⁷Ani, ɗaf naŋ purla, ko ndra mihaɗi na kwana, ndr'i dumvu purla, asi ndra gar i zumam di i ɗaf mupurla nah vuna.

¹⁸Puraka mizli Israyeley, mizli mazumam useˀ migam di mikuli le na, naɓa a jumom le ati li gi mikuli da Buymisemuŋ vuna ta kwa?

¹⁹Ya mawuɗ i ɓi na mbrike? Kuli malla useˀ migam di kuli le vuna, i gwat mupuɗaway kwa?

²⁰Kanah ta jaka, mikuli taŋ magaka na, da milyamay, anta da Buymisemuŋ ta. Amma y'anta wuɗ ɓa ki jumom ati milyamaya ta.

²¹Ɓa kisam gwat ar sikiɗ ngi Bumbulvuŋ waɗ ar sikiɗ ngi milyamay ma na, a gi ta. Ɓa ki zumam ɗaf ngi Bumbulvuŋ waɗ ngi milyamaya ma na, a gi ta.

²²Malla i wuɗam slikiɗa suloŋ ngi Bumbulvuŋ kwa? Ndra gidaŋ fineˀ naŋ sukwani?

²³Mizli mekelemey a ɓam: «Ndrˀada ti jiviɗ ngi gi gwat gar.» Haˀaw ɓula, amma gwat gar a zlir ngi gi ta. «Ndrˀada ti jiviɗ ngi gi gwat gar», amma gwat gar i ngi vula gidaŋ da mbur misikristu ta.

²⁴Anja ko mbur a sipi gwat ngi pula gir da naŋ tehhe a muŋ ta. Amma ngi pula gir da mizli mekelemey aya.

²⁵Gwat mahiɗikaka ar luuma gar na, ki zumaka zuy, manja ki cufuɗam vu, asi wuluk mijileŋ ngir mevel kum na.

²⁶Vur a tohoko na: «Hirwuy ati gwat ngi rahay gar, i ngi Bumbulvuŋ.»

²⁷Da mbur mitiɓi ta, a zulukum le nga zuma ɗaf a hay naŋ, da ki ngumam ru le na, gwat naŋ muvulukum di le gar na, zumaka manja ki cufuɗam vu, asi wuluk mijileŋ ngir mevel kum na.

²⁸Amma da mbur a ɓukum le: «I useˀ migam di kuli na», ki zumaka ta, asi naŋ muɓuw di ɗaˀ le, yo asi wuluk mijileŋ ngir mevel ɗik tuwa.

²⁹Ya maɓi hana vur wuluk mijileŋ ngir mevel kum ta, amma vur nga naŋ. Na, ya diimu na, masa sliy kiita i wuluk mijileŋ ngir mevel ngi mbur mekelem vur mike?

³⁰Da i ra zuma ɗafa ti gi sise da Buymisemuŋna, a sa mbiɗikiy hirnga asi gwat ya maga sise da Buymisemuŋ aseˀe na, vur mike?

³¹Na so na, da ki zumam i mi, da kisam i mi, malla ko da ki gam i mi gar na, gaka ngi ga dudok da Buymisemuŋ.

³²Anja cifi kum a ndir i cifi ngi bi sar da mbur ko pal ta, ko da Yudehey, ko da Grekey, ko da Cikil ngi misikristu, mizli ngi Buymisemuŋhoy.

³³Ya vuna kwana, kine ya, i ra tum vu ngi cira hiri da mizli gar ar gwat gar. Yi sipi di i lum vur hirnga ɗu ta, amma i lum ɓa vendek ngi mizli gar a laham.