Read South Giziga 1CO 11 Bible Online

1CO 11 - South Giziga bible

1CO 11

¹Sipaka sar ɗu kaɓa ya masipa ngi Kristu na ya.

²I ra ngilwuy ti kum asi kum mawulkam ar ya ar gwat gar, yo waɗ gwat ya mudubunukum di gar, kum magaka kanah gisiŋ na.

³Amma gwat purla ani, ya mawuɗ ɓa ki sinakaŋ: buy ngi mbur zil gar i Kristu, buy ngi ngwasa i zil, yo buy ngi Kristu i Buymisemuŋ.

⁴Mbur mizile gar madir dibiɗ malla maɓi ɓi Buymisemuŋ minjikaŋ di ti gwat tiɗeˀ a hirnga na, naɓa anta ɗuva hirnga da buy naŋ ta.

⁵Amma ngwas gar madir dibiɗ malla maɓi ɓi Buymisemuŋ minjikaŋ di manja doropo kaˀ le a hirnga na, naɓa anta ɗuva hirnga da buy naŋ ta. Asi a tiri le kite a hija hirnga le.

⁶Da ngwasa, naŋ anta juw doropo a hirnga ta na, zuwen naŋ mahija hirnga avra. Amma da hic naŋ malla sli naŋ avra a gaŋ mesem na, zuwen naŋ majuw doropo a hirnga.

⁷Anja mbur mizile a tiɗi gwat a hirnga ta. Naŋ a bam vu ati Buymisemuŋ, yo i dudok naŋ ma gar. Amma ngwasa, naŋ i dudok ngi mbur mizileŋ.

⁸Asi mike na, a boko ti mbur mizile tivi ngwas ta. Amma ngwas a boko di ti vu mbur mizile ɓula.

⁹Yo ma na, a gaka mbur mizile vur ngwas ta, amma ngwas a gakaŋ vur mbur mizileŋ.

¹⁰Sey ngwasa juw doropo kaˀ le a hirnga na vurˀe, ɓa a biga i zil naŋ miwaŋ, yo asi modro ngi Bumbulvuŋhoy ma.

¹¹Dambalaka, a mbuŋ Bumbulvuŋ na, ngwasa, naŋ anta wi hirnga naŋ mbak zile ta. Yo zile kwana, naŋ anta wi hirnga naŋ mbak ngwasa ta ya.

¹²Asi da a boko ti ngwasa ti vu mbur zil tekeɗe kwana, mbur mizile a bo ti kwacay ngwasa ya. Yo maga gwat gar i Buymisemuŋ.

¹³Ɓa ngwasa dir dibiɗ a mbuŋ Buymisemuŋ manja doropo kaˀ le a hirnga na, a zlir le kwa? Slaka wala naŋ ti haŋ kum vuna.

¹⁴Kpak naŋ vuna si na, ɓa mbur mizile a pula himac hirnga naŋ a gil haɗa na, i mesem ava na, ki sinaka ta kwa?

¹⁵Dambalaka, avu ngwasa na, i gwat ngi ɗuvaŋ hirnga. Vur a vulakaŋ himac hirnga ar deɗe ngi doropo.

¹⁶Da mbur a wuɗ ngila mi le aseˀe ɓula na, sirik nah anta avu ndra ta. Yo ko avu Cikil ngi misikristuhoy kwana, naŋ kanah ya.

¹⁷Ar ɓi mekelemey misi nga mbuŋ na, y'anta i ngil wuy ti kum ta. Dambalaka, cikil kumoy na, i ngi ɗiyukum ta, amma i ngi hiryukum ti hiryi jaka.

¹⁸Dumbuŋ na, mizli a ɓikiy: ti kum micikilam le na, wunkaˀay ada ar wala kumo. I pura na, i slir wãˀ ta gwaɗ naŋ.

¹⁹A zlir le ɓa wunkaˀay a gi ar wala kum vuna, ɓa ngi si na mizli mijeŋŋehey migisiŋ gisiŋ.

²⁰Amma da kum micikilam le arleˀe na, i ngi zuma ɗaf ngi Buy Yesu ta.

²¹Asi ko wa gar na, ara wus vu ngi zuma ɗaf nga naŋ nga naŋ, mbak mbur mekelem a ndir ti may, yo numuŋ a wi ti mbaazla.

²²Hay kum anta ɓa ki zumam, yo ɓa kisam gwat anga ta kwa? Malla ki hirsaka Cikil ngi misikristu, mizli ngi Buymisemuŋhoyo le kwa? Ki wuɗam ki paka mesem da mizli manja gwataya kwa? I sa ɓukum mbri ska? Anja i ngil wuy ti kum kwa? Kay, asi ɓi hana na, i ngil wuy ti kum ta wãˀ.

²³Ya na, ɓi ya mulumo di avu Bumbulvuŋ, yo ya mudubunukum di na, anihĩ: Buy Yesu, ngi duvuɗ taŋ muvulakaŋ ɓa a jakaŋ na, a zuɓa ɗaf.

²⁴Yo a dirba naŋ miga sise da Buymisemuŋ na, a ngila, dar a ɓi: «Hana i dumvu ɗu muvula vur kum. Gaka kahana ti wuluk ar ya.»

²⁵A dirba ɗafa, a gi ti sikiɗ ngi mbaazla kanah ma, a ɓi: «Mbaazla hana i jumoˀay nawaya ar pumbus ɗu mipi. Ko ti vunaka gar kum masa saka na, gaka ti wuluk ar ya.»

²⁶Asi ko ti vunaka gar, kum mira zumaka ɗaf hana, yo kum mira saka mbaazla ngir sikiɗ hana na, ki tilam di mi ti muc ngi Buy Yesu, hã ti naŋ misa so le.

²⁷Vurˀe, da mbur misa zum ɗaf, malla misa si mbaazla Buy Yesu muvula na le ti jiviɗ naŋ jeŋŋe ta na, naɓa a gi di i mungra da dumvu ati pumbus ngi Buy Yesu vuna.

²⁸Anja mbur gar a pura mevele dumbuŋ ɗagay, ɓa a sa zum ɗaf, yo ɓa a sa si mbaazla hana.

²⁹Asi da mbur ara zuma, yo ara sa manja a sla wala ngi dumvu Buy Yesu na, kite ara zum, yo ara si kiita nga hirnga naŋ.

³⁰Mizli haɗi a wuzla kumo taŋ gu ta, a hĩhĩyam le, yo mekelemey haɗi a micam na vurˀe.

³¹Da ndra ti hirnga ndra, i ra puraka mevel ndraˀahaya na, naɓa anta sa gam ndra kiita mata.

³²Amma Bumbulvuŋ maga ndra kiita na, ɓa ngi kuta ndra, ɓa a ga ndra kiita ngi muc jom ati mizli ngi duniyahaya ta.

³³Naŋ kine so, sukum ɗuwoy, da kum mira cikilam ngi zuma ɗaf na, kutukom vu.

³⁴Da mburo, may ara jaŋ na, zuwen naŋ mazum a hay naŋ, ɓa cikil kum na, i ngi so ti kiita nga hirnga kumo ta. Ɓi mindir na, i sa ɗiya ti ya misa ndil le a hay kumo.