Read South Giziga 1CO 12 Bible Online

1CO 12 - South Giziga bible

1CO 12

¹Sukum ɗu misikristuhoy, vur ɓi ngi gwatay ˀUf Mipal mavula taŋ na, i wuɗ ɓa ki ndiram manja sin naŋ ta.

²Ki sinaka le, ti kum misi i mizli duniyahay zleˀe na, a ɗuɗukum le gbor gbor ng'avu kulihey, gwatay maɓam ɓi ta.

³Vurˀe, i ɓukum na, da mburo, naŋ ti ˀUf ngi Buymisemuŋ na, ɓa a ɓi: «Yesu i minisa le» na, a ɓi ta. Yo da mburo, naŋ anta ti ˀUf Mipal ta na, ɓa a ɓi: «Yesu i Buy» na, a ɓi ta.

⁴Sukwi ngi gwat ngi vul ngi Buymisemuŋ ada wal wal haɗi, amma i ˀUf mupurla mavula.

⁵Sukwi ngi slra ngi gihey ada wal wal haɗi, amma i gaka da Bumbulvuŋ mupurla.

⁶Slra ngi gi ada wal wal haɗi, amma mavula gi naŋ gar da mizli gar na, i Buymisemuŋ mupurla.

⁷Uf Mipala, a njik avu mbur gar ti gwat muvula, ɓa ngi gi mezle da mizli gar.

⁸Mbur mekeleme, ˀUf mupurla nah vuna a vulaŋ nga naŋ, i ɓi ɓi ti sinmijileŋ. ˀUf mupurla nah vuna, a vula da mbur numuŋ, i si na gwat.

⁹Mbur mekeleme, ˀUf mupurla nah, a vulaŋ nga naŋ, i tiɓi [7] mbur numuŋ, ˀUf mupurla nah na, a vulaŋ gidaŋ ngi mbulo misi jijihey.

¹⁰Mbur mekeleme, a vulaŋ nga naŋ, i gidaŋ ngi gi cekene, mbur numuŋ, i ɓi ɓi ngi Buymisemuŋ minjikaŋ di, mbur numuŋ ma, i sli wala ngi gwat maso ti vuˀUf Mipal ati maso ti vu naŋ. Mbur mekeleme, i ɓi ɓi ti mi manja sin, waɗ da mbur numuŋ ma na, i gidaŋ ngi mbiɗa pulaˀvra ngi mi nah vuna.

¹¹Amma mavula nah gar na, i ˀUf Mipal vuna pal naŋ. A vula gwat wal wal da mbur gar ka naŋ mawuɗo.

¹²Naŋ kine, wukum ɓi ani ti wi: dumvu, naŋ purla, yo hirzlikey ava wal wal haɗi ngbaŋ. Amma ko ti hirzlik ngi dumvu mihaɗi na tekeɗe kwana, a jumom le i dumvu purla na si. Vur Kristu kwana, naŋ kanah ya.

¹³Asi ndra gar, ko Yudehey, ko Yudehey ta, bekehey ati diimuhoy gar na, i cam le angi yam ti ˀUf mupurla nah, ɓa i tiram dumvu purla. Yo ndra gar ndra, i sam di i gidaŋ ngi ˀUf mupurla nah.

¹⁴Dumvu ngi mburo, i hirzlik purla tew ta, amma i hirzlikey wal wal mujumom.

¹⁵Da sar a ɓi: «Yi haŋ ta ma na, ya avu dumvu ta», a sa gi i hirzlik ngi dumvu mata vurˀe sukwa?

¹⁶Da slimiɗ a ɓi: «Yi hiri ta ma na, ya avu dumvu ta», a sa gi i hirzlik ngi dumvu mata vurˀe sukwa?

¹⁷Da dumvu ngi mburo gar i hiri si na, a sa cin ti mike? Da i slimiɗ gar na, a sa zãˀã gwata ti mike?

¹⁸Amma Buymisemuŋ a ɗuva hirzlikey wal wal gar avu dumvu ngi mburo ka naŋ muwuɗu.

¹⁹Da dumvu taˀ gar, i hirzlik purla zleˀe si na, anja dumvu ama ani ska?

²⁰Amma dumvu, naŋ purla, hirzlikeye so na, taŋ haɗi.

²¹Vurˀe, hiri a ɓa haŋ: «y'anta ti may ɗike ta» na, a ɓaŋ gu ta. Malla ko hirnga a ɓa saraya: «y'anta ti may kumo ta» na, a ɓa taŋ gu ta.

²²Wãˀ naŋ vuna jak na, ko hirzlik ngi dumvuhoy mapuram ka taŋ vus le na, taŋ i gwat mupuɗaw puɗaway jaka.

²³Hirzlik, ndra mapuraka taŋ ka taŋ puɗaw puɗaw ta tuwa na, i kam slimiɗ dum le angi taŋ jaka. Mekelemey mizlir ngi ɓa ɓi taŋ avu mi ta na, i ɗumoko taŋ ti wer kuy kuy.

²⁴Hirzlik ngi dumvu, ndra mahĩyãka taŋ na, t'anta ti may ɓa a ɗumoko taŋ ta. Amma Buymisemuŋ mindira dumvu ngi mbur na, a ɗuva hirnga dum le da vay gwat mikic le avu taŋ na,

²⁵ɓa wunkaˀay a gi avu dumvu ta. Amma ɓa hirzlik ngi dumvuhoy na, a ndiram ti lik purla vur cala vur cala.

²⁶Da hirzlik ngi dumvu purla ara si bonoy na, hirzlik mekelemey gar a sam bonoy aseˀe ya. Da ara ɗuvaka hirnga da hirzlik ngi dumvu purla na, naɓa mekelemey gar a mumulom aseˀe ya.

²⁷Naŋ kine, kum gar, kum i dumvu ngi Kristu, kum i hirzlik naŋhay, mbur gar ar li nga naŋ nga naŋ.

²⁸Yo mizli Buymisemuŋ micifa taŋ a wuzla cikil ngi misikristuhoy na, dumbuŋ i misliney, mucuw taŋhay i mijiviɗ naŋhay, mimakir taŋhay i mudubuna gwat da mizli. A dirba nah na, migi cekenehey, yo mumbulo misi jijihey, mijini vuhoy, madiɗa ngi mizli, waɗ mizli maɓam ti mi manja sin.

²⁹Taŋ gar i misliney kwa? Taŋ gar i mijiviɗey kwa? Malla taŋ gar i mudubuna gwat da mizli kwa? Taŋ gar i migi cekenehey kwa?

³⁰Taŋ gar a lumam gidaŋ ngi mbulo vu le kwa? Taŋ gar ada ɓam ti mi manja sine kwa? Taŋ gar ada mbiɗaka pulaˀvra nah gu kwa?

³¹Zuwen hĩyãm gwat mupuɗaw Buymisemuŋ mavula. Yo nga meˀe ma na, i sa bugukum jiviɗ mifineˀ gwat gar.