Read South Giziga 1CO 13 Bible Online

1CO 13 - South Giziga bible

1CO 13

¹Da ko i ndila le ngi ɓi ti mi ngi mizli maɓaka gar, malla ngi ɓi ti mi ngi modro ngi Bumbulvuŋhoy maɓaka tekeɗe kwana, amma da y'anta wuɗ vu ta na, kite mingiɓi ɗu i hurum ngi ɓiri malla ngi jãw jãw ngi ɓiri mahurum haɗa.

²Da ko a vulikiy nga ya i tila mi ti ɓi Buymisemuŋ minjikiy di, da ko ya ti sin ngi sli wala ngi gwat mufuna wuluk ngi mbur gar, da ko i tiɓi le wãˀ, hã ngi buduguro muwãhaya gu tekeɗe kwana, amma da y'anta wuɗ vu ta na, naɓa yi gwat lambaˀ si.

³Da ko i wunka zlili ɗu le gar da mizli muroko ar may, malla da ko i vula vu ɗu le ngi wur ar vu [8] tekeɗe kwana, amma da y'anta wuɗ vu ta na, ko y'anta lum migir ɗu aseˀe ta.

⁴Wuɗavu a ɓus ɓi, wuɗavu a gimezle, wuɗavu a gi suloŋ ta, a jijih ta, a huhum vu ta.

⁵Wuɗavu anta gi gwat ngi meseme ta, i misi gizak ta, a ji mevel ta, anta ji mbur a kwacay ta.

⁶Ɓi mijeŋ ta na, anta mumul aseˀe ta, amma a mumul nga naŋ asi ɓi mikaslsla.

⁷Wuɗavu a gi wereke angi gwat gar, a tiɓi ɓi gar, a njih hiri njah ar gwat gar, a ɓus ɓi haɗa.

⁸Wuɗavu anta kiɗ mi ta ndiɗaˀ. Ɓi Buymisemuŋ manjika, a sa kiɗ mi, mihey maɓaka taŋ, a sa kiɗam mi, sin a sa kiɗ mi.

⁹Asi sin ndra, naŋ ti maakway, yo ɓi ngi Buymisemuŋ manjika ndra di ngi ɓi na, naŋ ti maakway.

¹⁰Amma da muwãˀ naŋ a sa ndilo le na, micah ti cah a sa kiɗ mi.

¹¹Ti ya misi ti zuŋ zleˀe aruŋ na, i ɓi ɓi ka ziri, i wuluk wuluk ngi ziri, i sla wala ngi ɓi zleˀe ka ziri. Ti ya mitiri mbur so na, gwat ngi gi ngi ziri zleˀe gar na, i kiɗa mi naŋ le wãˀ.

¹²Wurenna, i puraka gwata kaɓa ar dorogal, anta pur njah wãˀ ta. Amma i sa puram vu hiri taˀ taˀ. Wurenna, sin ɗu, naŋ ti maakway, amma i sa si na kuy kuy wãˀ kaɓa Buymisemuŋ misiniy na.

¹³Wurenna so na, mindiram i gwat mimakirey anihĩ, tiɓi, njaha hiri waɗ wuɗavu. Amma taŋ makir taŋ, wuɗavu a funa taŋ le gar.