Read South Giziga 1CO 14 Bible Online

1CO 14 - South Giziga bible

1CO 14

¹Hurdumom ɓa ki lumam wuɗavu so. Gwat ˀUf Mipal mavula na, ndiram ti may naŋ. Wãˀ naŋ na, ngi ɓi ɓi Buymisemuŋ manjika.

²Asi mbur maɓi ti mi manja sin na, a ɓi da mizli ta, amma da Buymisemuŋ. Ko mbur micin naŋ, anta. A njik di i ɓi ngi gwat mufuna wuluk ngi mbur, ti wuluk ˀUf Mipal muvulaŋ di.

³Amma mbur maɓi ɓi ngi Buymisemuŋ minjikaŋ di na, a ɓi da mizli, ɓa a jina taŋ ar tiɓi, a vula taŋ gidaŋ, yo a tisla taŋ mevel.

⁴Mbur maɓi ti mi manja sin na, a jini di i vu naŋ vuna si. Amma mbur maɓi ɓi Buymisemuŋ minjikaŋ di na, a jini di i cikil ngi misikristuhoy keɗeɗe.

⁵Yi wuɗ le haɗa zleˀe, ɓa kum gar, ki ɓam ti mi manja sine. Amma i hiyĩ dum le na, ɓa ki ɓam ɓi ngi Buymisemuŋ manjikukum di. Mbur maɓi ɓi ngi Buymisemuŋ manjika na, a funa mbur maɓi ti mi manja sin na le. Sey da kaɓa mbur ada ngi mbiɗa pulaˀvra ngi mi nah far, ɓa a jina cikil ngi misikristuhoy keɗeɗe.

⁶Wurenna, sukum ɗu misikristuhoy, da kaɓa ya muru le a hay kumo, da i ra ɓukum ti mi manja sin na, i sa jinukum gu kwa? Sey da i ɓukum di i ɓi Buymisemuŋ manjika, yo da i ɓukum di i ɓi ngi sin, malla da i tulukum di i mi ti ɓi Buymisemuŋ minjikiy di, malla ta na, da i dubunukum di i gwat far takwa?

⁷Naŋ kine ya, kaɓa gwat ngi gi dunguroy: bozloro malla gujuvur, da ˀay ngi bozloro, malla ngi gujuvuro, anta bo kuy kuy ta si na, mbur a sa si na i ˀay ngi bozloro, malla ngi gujuvuro mbri mbrike?

⁸Yo da mbur mifi tulumo, a fa i ˀay ngi tulum ta si na, masa juw vu nga gi vurum, i waka?

⁹Kumo kwana, kanah ya. Ɓi kum maɓaka ti mi manja sin na, da naŋ anta bo di ɓa mbur a cin ta si na, mizli a sa slaka wala ngi ɓi kumo mbri mbrike? Kite ki ɓam angi himiɗ lambaˀ ta kwa?

¹⁰Sukwi ngi miheye wal wal kite angi duniya ka na, i si na ta. Amma mi tayna, taŋ cek ti mbiɗeˀvra taŋ.

¹¹Amma da i si na mi maɓikiy ti nah ta na, naɓa mbur maɓiy na, a tiri le i mulak avu ya, ya kwana, yi mulak ava ya.

¹²Kumo kwana, ani gwat ˀUf Mipal mavula na, ki roko ti may naŋ haɗa haɗa wãˀ, sipam ɓa ki lumam haɗa. Wãˀ naŋ na, majina cikil ngi misikristuhoy.

¹³Vurˀe, mbur maɓi ti mi manja sin na, sey a cufuɗa Buymisemuŋ ɓa a vulaŋ sin ngi mbiɗa pulaˀavra naŋ.

¹⁴Da i ra dir dibiɗ ti mi manja sin na, musuɗuk ngi vu ɗu ara dir dibiɗ ɓula, amma lesl ɗu anta gi slra ta.

¹⁵Ani, i sa gi mbri ska? I sa dir dibiɗ ti musuɗuk ngi vu ɗu, amma i sa dir ti lesl ɗu ma. I sa zli dimis ti musuɗuk ngi vu ɗu, amma i sa zli ti lesl ɗu ma.

¹⁶Naŋ kine, da ki ra ga sise da Buymisemuŋ ti musuɗuk ngi vu ɗik tewle si na, naɓa mbur misi angi cikile, macin ti cin na, a sa tiɓa «Amin» asi gi sise ɗike gu kwa? Asi a si na ɓi ka maɓa vuna ta.

¹⁷Ko da diradibiɗ ɗik ngi ga sise da Buymisemuŋ, naŋ kuy haɗi tekeɗe kwana, anta jina mbur mekeleme ta.

¹⁸I ra ga sise da Buymisemuŋ, asi i funukum le gar ngi ɓi ti mi manja sine.

¹⁹Amma angi Cikil ngi misikristuhoy na, yi hiyĩ nga ya, i ɓi ɓi ngi lesl ɗaˀ ɗaˀ zlum ɓa a jina mizli, a funa ya maɓi durmuk ti mi manja sine le.

²⁰Sukum ɗuwoy, ar sli wala ngi ɓi na, anja ki wulkam kaɓa ziri ta. Ar ɓi malambaˀ na, ndiram ka ziri ɓula. Amma ar sli wala ngi ɓi na, ndiram ka mizli micawwahay.

²¹A tohoko angi Ɓimujuwa na: «Bumbulvuŋ a ɓi: Mizli tayna, mingiɓi ɗu, i mizli mulakay masa ɓaka taŋ di ti mi taŋ. Irne ngi mulakay masa ɓa taŋ di. Amma gar ti nah na, anta sa cinikiy mi ta.»

²²Naŋ kine, ɓi ɓi ti mi manja sin na, a bigi di i gwat da mitiɓihey ta, amma da mizli manja tiɓihey. Ɓi ɓi Buymisemuŋ manjika na, a bigi di i gwat da mizli manja tiɓihey ta, amma da mitiɓihey.

²³Da kaɓa cikil ngi misikristuhoy keɗeɗe micikilam le ar leˀe, yo da a zlaka le ara ɓam ti mi manja sin gar taŋ na, mizli ngatarahay macinam ti cin, malla mizli mitiɓihey ta masa cam ng'avu kum na, a sa waka kaɓa kum i mibirngahay ta kwa?

²⁴Amma da mizli gar a ɓam di i ɓi Buymisemuŋ minjika na, naɓa mbur mitiɓi ta malla micin ti cin lambaˀ maco nga wuzla kumo, a sa pura, ɓi kum maɓaka gar na, a bigaŋ mungra naŋ le, a gaŋ kiita le.

²⁵Ɓi miyaŋ ngir mevele, a njik le, a sa tumbulo Buymisemuŋ, huruk a ruwuy, a sa putukul a mbuŋ naŋ hã a sa til mi: «Buymisemuŋ naŋ da wuzla kumo gisiŋ!»

²⁶Sukum ɗuwoy, kisa gam mbri ska? Da kum mukusom le ngi dira dibiɗ na, anja mbur pal mekelem a wuzla kumo, a zli dimisi, mbur numuŋ a dubun gwat da mizli, numuŋ a ɓi ɓi Buymisemuŋ minjikaŋ di, mekeleme, a ɓi ti mi manja sin, yo mbur numuŋ a mbiɗa pulaˀvra naŋ. Anja hana gar na, a gi ngi jini Cikil ngi misikristuhoy, ɓa aru nga mbuŋ.

²⁷Da ada ɓam ti mi manja sin na, anja maɓam di a funa mizli cuw malla makire ta. A ɓam pal pal, yo anja mbur ngi mbiɗi pulaˀvra naŋ, ada.

²⁸Da mbur ngi mbiɗi pulaˀvra naŋ, anta na, anja mbur nah a cifi teˀ teˀ ar cikile. Anja a ɓi ti kwacay, yo da Buymisemuŋ tewle si.

²⁹Da i ɓi Buymisemuŋ minjika na, anja i mizli cuw malla makir maɓaka, yo anja mizli mekelemey a slaka wala nah, da i gisiŋ, i gisiŋ ta kwana.

³⁰Da mbur mekelem misi a wuzla kuso, a lum ɓi Buymisemuŋ minjikaŋ di le na, sey mbur maɓi zleˀe na, a taˀa mi ɗagay.

³¹Kum gar, ki ɓam ɓi Buymisemuŋ manjika gu, amma sey ki ɓaka pal pal, ɓa mizli gar a sinam gwat, yo ɓa a vula taŋ gidaŋ gar.

³²Mbur matil mi ti ɓi Buymisemuŋ minjikaŋ di na, sey a jigina vu naŋ avu gwat muvulakaŋ di.

³³Asi Buymisemuŋ a zila ndra ɓa i gam biyãˀ biyãˀ lambaˀ ta, amma ɓa i cifam zuy zuy. Kaɓa magi ar Cikil ngi misikristuhoy gar na.

³⁴Anja ngwasay a cifam teteˀ teteˀ angi cikileye, jiviɗ anta ɓa a ɓama ta. Sey a hinam hirnga kaɓa ɓimujuwa miɓa na ma.

³⁵Da a wuɗam le ɓa a cufuɗam ɓi na, anja a cufuɗaka zil taŋhay a hay. Ɓa ngwas a ɓi ɓi ar cikile na, a zlir ta.

³⁶Ɓi ngi Buymisemuŋ a zlo virzi a hay kum kwa? Malla a ndil sey a hay kum tewle kwa?

³⁷Da mbur a wa vu naŋ kaɓa i mijiviɗ, malla kaɓa naŋ da ti ˀUf Mipal na, anja sey a sina, ɓi ya matuhukum di na, i ɓimuɗuva ngi Bumbulvuŋ.

³⁸Da mbur a si na ta na, kite Buymisemuŋ kwana, a sinaŋ ta ya.

³⁹Naŋ kine, sukum ɗuwoy, hĩyãm dum le na, i ɓi ɓi Buymisemuŋ manjika, yo ɓi ɓi ti mi manja sine kwana, ki tikaka ta ɓula.

⁴⁰Amma anja gwat gar a gi kuy kuy, biyãˀbiyãˀ ta.