Read South Giziga 1CO 15 Bible Online

1CO 15 - South Giziga bible

1CO 15

¹Sukum ɗu misikristuhoy, Ɓimezle ya mutulukum di mi zleˀe, yo kum mitiɓaka, mijaka ɓi nah a hirnga na, i mukum hiri nah ava.

²Yo da ki ra jaka a hirnga ka ya mutulukum di mi na, kisa laham. Da kanah ta na, naɓa kum mitiɓam na, i ngataraŋ.

³Ɓi ya muɓukum di dumbuŋ na, i ɓi ya mitiɓa ti hirnga ɗu vuna, n'anihĩ: Kristu a muc vur mungra ndrahay, kaɓa Ɓimutoho miɓa.

⁴A dikaka le, angi hin mimakir naŋ na, a slikiɗ a muŋ, kaɓa Ɓimutoho miɓa.

⁵A biga vu le da Piyere waɗ da mislin mukuruˀ nga cuwoyo.

⁶A dirba nah na, a biga vu da mizli ngi seˀehey fineˀ skat skat zlum jom ar li purla. Vendeke taŋ, t'ada ar siifa aruŋ, amma mekelemey a wuzla taŋ a micam le ɓula.

⁷A dirba nah ma na, a biga vu da Zak waɗ da misliney gar taŋ.

⁸Yo a dirba taŋ gar na, a bigiy vu da ya ya. Ya miyikiy kiya kasl ta.

⁹Asi yi metetek ngi wuzla misliney gar. Yi ndila ɓa a zilikiy mislin vuna ta, asi i sipa Cikil ngi misikristuhoyo le zleˀe nder nder.

¹⁰Amma ya mitiri mislin na, mbele Buymisemuŋ migiy mezle. Yo avu ya na, mezle naŋ migiy di na, i gwat ngatara lambaˀ ta, hã i gi slra le fineˀ mislin mekelemeye gar jaka. I ya miga ta ɓula, amma i gimezle ngi Buymisemuŋ misi avu ya na.

¹¹Naŋ kine, da ko i ya, malla da ko i taŋ kwana, ɓi ndra matilam di mi, yo ɓi kum mitiɓaka na, i nah degweleˀ tewle.

¹²Da i ra tilam mi: «Kristu a slikiɗ le ti wuzla mumucahaya» na, mizli mekelemey a wuzla kum a ɓam: «Mumucahay a slikiɗam ta» na, mbri mbri ma ka?

¹³Da mumucahay a slikiɗam ta na, kite Kristu kwana, a slikiɗ ta ya.

¹⁴Na, da Kristu a slikiɗ ta na, ɓi ndra matilam di mi na, i ngataraŋ, yo tiɓi kum na kwana, i ngatara ya.

¹⁵Mifineˀ nah vuna ma na, da mumucahay a slikiɗam ta gisiŋ na, a sa gi kite ndr'i migi sedewo ti slirey ar Buymisemuŋ. Ndra maɓam Buymisemuŋ a slikiɗa Kristu le na, kite i gam di i sedewo mijeŋ ta.

¹⁶Da mumucahay a slikiɗam ta na, naɓa Kristu kwana, a slikiɗ ta ya.

¹⁷Yo da Kristu a slikiɗ ta na, kum mitiɓam na, ki gam di i gilaw, kum ar gi mungra kumoy aruŋ.

¹⁸Mbiɗeˀvra: mizli mumicam ar taŋ mujom ati Kristu gar na, a zizam le.

¹⁹Da i njaham hiri ar Kristu vur cifi ndra a ruwuy hana tewle si na, kay, naɓa ndr'i mizli mambulom mi fineˀ mizli mekelemey gar!

²⁰Amma wãˀ naŋ na, Kristu a slikiɗ le dumbuŋ ti wuzla mumucahaya. Vurˀe, mumucahay gar a sa slikiɗam aya.

²¹Naŋ kine, asi muc muso tisi mbur purla na, mizli mumucahay masa slikiɗam na kwana, tisi mbur purla ya.

²²Mizli gar mamicam na, asi taŋ mujom ati Adamu. Naŋ kanah ya, mizli gar a sa lumam siifa a muŋ, asi taŋ mujom ati Kristu.

²³Amma ko wa gar ti li nga naŋ nga naŋ. Mislikiɗ cikiɗeffe dumbuŋ, i Kristu. Yo ti naŋ masa mawa na, i mizli naŋhay aya.

²⁴A dirba nah, gwat gar a sa kiɗ mi. Kristu a sa ngizla gwat matikaˀay da mizli gar, miwi mizli gar waɗ misi gidaŋhay gar. Joˀ a sa mi ti zuma buyo da Cine Buymisemuŋ.

²⁵Anja sey Kristu a zum buy hã tapas Buymisemuŋ mipa mesene naŋhaya le gar asi sar naŋ.

²⁶Mesene ngi dirba wãˀ masa zizaka na, i mucu.

²⁷Naŋ kine, a tohoko na: «Buymisemuŋ a paŋ gwataya le gar asi sar naŋ.» Amma Buymisemuŋ masa ɓi: «gwatay gar asi sar ngi Kristu» na, a cin kwaŋ wãˀ: Buymisemuŋ mipaŋ gwatay asi sar naŋ na, kite naŋ vuna, naŋ anga ta.

²⁸Yo da gwatay gar misa ram le asi sar naŋ na, dar Mangala ti hirnga naŋ, a sa hin hirnga a mbuŋ Buymisemuŋ mipaŋ gwatay gar asi sar naŋ vuna, ɓa Buymisemuŋ wãˀa, a ndir ar ko mike gar.

²⁹Wulkam ar mizli macam ar yam ar deɗe ngi mizli mumucahay na ɗagay. Da mumucahay a slikiɗam ta gisiŋ na, a wuɗam na, ɓa a lumam mike? Taŋ macam ar yam ar deɗe taŋ na, vur mike?

³⁰Yo ndra vuna ya kwana, pas gar i ra pulaka hirnga ndra da mendere vur mike?

³¹Sukum ɗuwoy, i ra pula hirnga ɗu da muc vur hin gar. Ya maɓukum di na, asi kum mujom ati Buy ndra Yesu Kristu. Magiy ɓa i jijih na, i naŋ.

³²Da i ɗuva wuluko le taˀ ar ɓi ngi mizli si na, naɓa ya mikiɗ vu a Efeze, kaɓa ati gwat ngi ɓuhoy na, i lum di mike? Da mumucahay a slikiɗam ta na, zuwen i gam kaɓa mizli maɓam: «Zumukum gwat, sukum gwat, vur ti prike, i sa micam» na sukwa?

³³Ki gam gilaw da vu kum ta: «Cil ndra malambaˀhaya, ara hiryam ndra joˀ ndra mezle.»

³⁴Pulaka gi biyã biyãˀa gisiŋ wãˀ, yo pulaka gi mungra. Asi mizli mekelemey a wuzla kumo, a sinaka Buymisemuŋ ta. Ya maɓa na, ɓa a gukum mesem.

³⁵Asinta, mbur a sa ɓi: «Mumucahay a slikiɗam mbri mbrike? A sa slikiɗam ti dumvu wana maka kwani?»

³⁶Gilaw lambaˀ, gwat ka mizliga le na, sey da a zĩˀĩ le ɗagay, ɓa a sa bo ti kalafa takwa?

³⁷Yo gwat ka mazliga na, i kalaf masa gil na t'aruŋ, amma i mengeleleŋ naŋ aruŋ, mengeleleŋ ngi alkamari, malla ko ngi gwat mekelem pal.

³⁸Joˀ Buymisemuŋ a vulaŋ kalafa kaɓa naŋ mawuɗo. Mengeleleŋ ngi gwat gar na, a vulaŋ ngufo pal pal.

³⁹Gwat misi titiri gar na, useˀ naŋ i misi purla ta. Useˀ ngi mizli pal, ngi gwat misããmiaya kwana pal, ngi ɗiyuwoyo pal, ngi kilifeye kwana, pala ma.

⁴⁰Gwat ngi muŋhoyo, t'ada ti dumvu, yo gwat ngi ruwuyoyo kwana, t'ada ti dumvu ya, amma wucuɗ taŋ i misi purla ta.

⁴¹Pas a wucuɗ pal, kiya a wucuɗ pal, wurzlaŋhaya kwana a wucuɗam pal. Ko wurzlaŋhay vuna kwana, wucuɗ taŋhaya, taŋ pal pal.

⁴²Tapas mumucahay masa slikiɗam na, a sa gi kanah ya. Dumvu maka ka ng'ar vigiɗe, i vu mazĩˀĩ. Da naŋ misa slikiɗ le na, a zĩˀĩ mata wãˀ.

⁴³Dumvu maka ka ng'ar vigiɗe, naŋ hiris le, yo i hĩhĩyaŋ, amma da naŋ misa slikiɗ le na, naŋ ti dudok, yo naŋ ti gidaŋ haɗi teˀe.

⁴⁴Dumvu maka ka ng'ar vigiɗe, i dumvu ngi ruwuy, amma da naŋ misa slikiɗ le na, i dumvu ngi ˀUf Mipal. Dumvu ngi ruwuy ada, yo dumvu misi ti ˀUf Mipal kwana, ada ya.

⁴⁵Naŋ kine, a tohoko na: «Adamu, mbur mudumbuŋ, naŋ ti dumvu misi ti siifa.» Amma Adamu ngi dirba, i ˀUf Mipal mavul siifa.

⁴⁶Amma mudumbuŋ i misi dumvu ngi ruwuy, i misi ˀUf Mipal na ta. Misi ˀUf Mipal na, naŋ a so a dirba.

⁴⁷Mbur mudumbuŋ, a gaka ti murɓuk, naŋ i hirwuy. Mbur mucuw naŋ, a so paɗ ti muŋ.

⁴⁸Mizli ngi ruwuyoyo, taŋ kaɓa mbur migakaŋ ti hirwuy na ya. Mizli ngi muŋhoy kwana, taŋ kaɓa mbur muso paɗ ti muŋ na ya.

⁴⁹Yo ndra mubam vu ati mbur migakaŋ ti hirwuy na, i sa bam vu ati mbur muso paɗ ti muŋ na ya.

⁵⁰Sukum ɗu misikristuhoy, gisiŋ yi ɓukum anihĩ: Misi ti dumvu ati pumbus gar na, anta sa zumam buy ngi Buymisemuŋ gu ta. Yo dumvu mamuco, anta sa zuma li ngi dumvu mamuc ta na gu ta.

⁵¹Y'ani wuɗ i njukukum ɓi mufuna wuluk ngi mbur anihĩ: Ndr'anta sa micam gar ta, amma i sa mbiɗam cek

⁵²kutum, kaɓa kuɓuco hiri si, hirak ti taŋ masa faka tulum ngi kiɗa mi naŋ wãˀa. Asi da taŋ misa faka tulumo le na, mumucahay a sa slikiɗam, ɓa a micam mata. Yo ndra gar kwana, i sa mbiɗam pal aya.

⁵³Naŋ kine, anja dumvu mazĩˀĩ hana, a ci a hur dumvu mazĩˀĩ ta na, yo anja dumvu mamuco, a ci a hur dumvu mamuc ta wãˀa.

⁵⁴Da dumvu mazĩˀĩ a sa ci le a hur dumvu mazĩˀĩ ta wãˀa, yo da dumvu mamuco a sa ci le a hur dumvu mamuc ta wãˀ na, naɓa a sa gi kaɓa Ɓimutoho miɓi: «A paka hirnga le da muco, muc a zizi le.

⁵⁵Mucu, gidaŋ ɗik ama ani aruŋ ka? Mucu, gidaŋ ɗik ngi gi waˀa da mizli, ama ani aruŋ ka?»

⁵⁶Gwat, muc magi di waˀa da mizli i mungra, yo gidaŋ ngi mungra kwana, i ɓimujuwa.

⁵⁷Gukum sise da Buymisemuŋ magi ti ndra bugawla tisi Buy ndra Yesu Kristu.

⁵⁸Naŋ kanah, sukum ɗu, yeme ɗuwoy, cicam zlak gidaŋ gidaŋ, ki jijikam ta. A ram nga mbuŋ nga mbuŋ ndrehhe ar slra ngi Bumbulvuŋ, asi ki sinaka le, cika vu kum ti slra asi kum mujom ati Bumbulvuŋ na, i ngatara ta.