Read South Giziga 1CO 16 Bible Online

1CO 16 - South Giziga bible

1CO 16

¹Asi ɓi ngi dala ngi cikil vur mitiɓi ngi Zeruzalemey na, ɓi ya muɗuva da Cikil ngi misikristu ngi Galatay na, kumo kwana, sipaka ya.

²Pas dimas gar na, ko wa gar a wuzla kumo, a wi vu ti dala weˀ le a hay naŋ, kasl avu naŋ mulum le, ɓa ti ya misa ndil le na, anta ngi sa cikil dala ti cikil mata.

³Da ya misa ndil le na, i sa slina mizli kum muwunaka taŋ na, ti ɗerewol kaw a haŋ, ɓa a ram ti gwat kum muvulaka na nga Zeruzaleme.

⁴Da a zlir le anja ya vuna i ru na, i sa zuɓaka mulaka bumoˀ.

⁵I sa so ngi hay kumo bal ti Maseduwan. Asi mike na, i wuɗ i sa cuh bal ti Maseduwan.

⁶Ko mbri na, i sa gi hin cawwa a hay kumo, malla ta na, i sa ba viya gar a diga, ɓa kisa jinikiy ngi zuɓa jiviɗ ɗu nga mbuŋ.

⁷Tapasa, i wuɗ i sa purukum deŋ ar sar mata. Da Bumbulvuŋ a pula jiviɗ naŋ le na, i wa na, i sa gi hin cawwa a hay kumo.

⁸Amma i sa cifi a Efeze, hã a ndila hin ngi muguzlum Paŋtekoto.

⁹Asi ko ti mesene ɗuwoy misi haɗa na tekeɗe kwana, miviŋ a wun le firndiw wãˀ ɓa i ga slra ɗu.

¹⁰Da Timote a ndil le a hay kumo na, wam vu ɓa a cifi manja zluwun a wuzla kumo. Asi a gi di i slra ngi Bumbulvuŋ kaɓa ya vuna ya.

¹¹Anja ko mbur a hirsaŋ ta wãˀ. Jinakaŋ ɓa a mo zuy zuy ng'avi ya, asi ya ati sukum ɗuwoyo, i ra kutukokoŋ.

¹²Sukum ndra Apoloso kwana, i vulaŋ gidaŋ le haɗi ɓa a ram ngi hay kum ati sukum ndra mekelemeye. Amma naŋ anta ngum ru wurenna ta wãˀ. A sa ru, sey tapas naŋ mulum haŋ le ɓula.

¹³Ki hinjam ta, cicam zlak gidaŋ gidaŋ ar tiɓi. Gam zil zil, gam gidaŋ gidaŋ.

¹⁴Gaka gwata gar ti wuɗavu.

¹⁵Sukum ɗuwoy, ambuh ambuh kum: ki sinaka le, Estefanas ati hay naŋ i mizli mimbiɗaka mevel dumbuŋ a Akaya. A pulaka vu taŋ le wãˀ da slra ngi misikristuhoyo.

¹⁶Cinaka mi da mizli misi ka tayna so, waɗ ko da waka gar magi slra bummoˀ ati taŋ ti gidaŋ wãˀa.

¹⁷Estefanas ati Fortinatus waɗ Akaˀikus mindiloko na, i mumul haɗi. Ya muro ti may ngi pur kum zleˀe na, a kiɗikiy may naŋ le.

¹⁸Asi a tislikiy mevele le, waɗ ngi kumo ma. Anja ki sinaka ngilawuy ti mizli misi ka tayna.

¹⁹Cikil ngi misikristu ngi Azihey a jukum haŋ le. Akilas ati Prisil waɗ misikristuhoy makusom a hay taŋ gar na, a jukum haŋ le kuy kuy ar kum mujom ati Bumbulvuŋ.

²⁰Sukum ndra ngi kahay gar, a jukum haŋ le. Jam haŋ ar wala kumo ti ji vu kuɓuy kuɓuy ka sukumuŋ mitiɓihey.

²¹Ɓi hana, i ya matoho ti haŋ ɗu: Ya Pol, majukum haŋ.

²²Da mbur anta wuɗ Bumbulvuŋ ta na, anja a nisakaŋ. Maranata! [9].»

²³Anja gimezle ngi Buy Yesu a ndir avu kum.

²⁴I ra wuɗukum gar kumo, ar ndra mujom ati Yesu Kristu.