Read South Giziga 1CO 2 Bible Online

1CO 2 - South Giziga bible

1CO 2

¹Sukum ɗu misikristuhoy, ti ya vuna muru a hay kumo, ɓa ngi tulukum mi tiɓi muɗum ngi Buymisemuŋ zleˀe na, i ɓi ti ˀay madiɗa ta, malla ko ti ˀay ngi sinmijileŋ ta ma.

²Asi i juwa le a mevel ɗu, ɓa i sin gwat mekelem ko neˀ a wuzla kumo ta, sey Yesu Kristu, wãˀ naŋ na, Yesu Kristu midiraka angi dum mizliraŋ.

³Ma na, ya misi zleˀe avu kumo, yi hĩhĩyaŋ, yi muzluwun kirkir.

⁴Dubuna gwat ɗu da mizli ati tila mi ɗu na, ˀay ngi ɓi ɓi ngi mbiɗa mevel ngi mbur ti sinmijileŋ ngi mbur anta anga ta. Amma i dubun ati tila mi, ˀUf Mipal mibiga ti gidaŋ naŋ,

⁵ɓa tiɓi kum na, a cici ar sinmijileŋ ngi mizli ta, amma ar gidaŋ ngi Buymisemuŋ.

⁶Dambalaka, ɓi ndra matilam di mi da misikristu minaham le ar tiɓi na, i sinmijileŋ ngi Buymisemuŋ vuna ngbaŋ, i sinmijileŋ ngi duniya hana ta, ko i sinmijileŋ ngi misi gidaŋ ngir duniya hana vuna, mihĩˀĩ ngi zizihey na ta.

⁷I tilam di i mi ti sinmijileŋ ngi Buymisemuŋ, sinmijileŋ mufuna wuluk ngi mbur, miyaŋ, ɗum zleˀe. Dumbuŋ angi Buymisemuŋ miga duniya t'aruŋ, a wi di vu le, ɓa a sa vula ndra dudok naŋ ti naŋ.

⁸A wuzla buy ngi duniya hanayna, ko pal misinaŋ, anta. Asi da a sinakaŋ le zleˀe na, anja a diraka Buy misi ti dudoko ta.

⁹Amma a gi le ka taŋ mutohoko zleˀe: «I gwat hiri mupura ɗaˀ ta, i gwat slimiɗ micina ɗaˀ ta, i gwat mbur muwulka ɓi naŋ a mevele ɗaˀ ta, Buymisemuŋ miɗiya gar na, asi mizli muwuɗ naŋhay [1].»

¹⁰Dambalaka Buymisemuŋ a njika ndra di le da ndra ti ˀUf naŋ. Asi ˀUf Mipal a wunjila gwataya gar, ko gwat muɗum ngi hur Buymisemuŋ.

¹¹A wuzla mizli, masina gwat ngi hur mburo, i wa ska? Sey wuluk misi a hur mbur vuna ta kwa? Naŋ kine, gwat misi a hur Buymisemuŋ na, mbur masina anta, sey ˀUf ngi Buymisemuŋ vuna.

¹²Ngi ndra na, ndr'i lumam di i ˀuf ngi duniya ta, amma ˀUf maso paɗ ti vu Buymisemuŋ, ɓa i sinaka gwat Buymisemuŋ muvula asi gimezle naŋ.

¹³Yo ndra maɓam na, ti mi ngi sinmijileŋ ngi mbur madubuna ndra di ta, amma ti mi ngi ˀUf ngi Buymisemuŋ madubuna ndra di. Mizli mulumam gwat maso tivu Bumbulvuŋ nah le na, i bigaka taŋ pulaˀvra ngi gwat maso tivu Buymisemuŋ vuna.

¹⁴Mbur misi ti wuluk ngi kpak ngi vu naŋ tewle na, anta tiɓa gwat maso ti vu ˀUf ngi Buymisemuŋ ta. A pura ka ɓi ngi mibirngahay, anta sla wala nah gu ta. Asi ɓa mbur a sla wala nah, naŋ kahana kahana na, sey ti ˀUf ngi Buymisemuŋ far.

¹⁵Mbur misi ti ˀUf ngi Buymisemuŋ na, a sla wala ngi gwata gar jaka. Amma naŋ vuna, ko mbur masla wala nga naŋ gu, anta.

¹⁶Asi Ɓimutoho a ɓi na: «Misina wuluk ngi Bumbulvuŋ i wa, ɓa a kutaŋ ka?» Dambalaka ndra, ndr'ada ti wuluk ngi Kristu.