Read South Giziga 1CO 4 Bible Online

1CO 4 - South Giziga bible

1CO 4

¹Anja mizli a puram ndra ka ndra i gawla ngi Kristuhoy, yo kaɓa mijikaw ngi ɓi mufuna wuluk ngi mbur ngi Buymisemuŋhoy.

²Dambalaka, gwat mawuɗam avu mizli mijikaway na, sey a bigaka vu taŋ i mizli miteŋteŋhey.

³Avi ya na, kiita kum magikiy di malla ko ngi mizli magikiy di na, a ciy ya ta. Na ya vuna kwana, i ga kiita da vu ɗu tehhe a muŋ ta ma.

⁴Vur wuluk ngir mevel ɗu anta mbiɗiy hirnga ko neˀ ta wãˀ gisiŋ. Amma magiy ɓa yi mbur micimak na, i nah ta. Magiy kiita i Buymisemuŋ.

⁵Vurˀe, anja ki gam kiita da mbur daf dumbuŋ ta, sey da Bumbulvuŋ muso le. Gwat muɗum ar luvuŋ gar na, i naŋ masa bo taŋ ngbah ar li babara, yo i naŋ masa njika wuluk miyaŋ ngir mevel ngi mizli gar. Dar Buymisemuŋ a sa hunuma mbur gar weˀe avu gwat naŋ migaŋ.

⁶Sukum ɗu misikristuhoy, ya mimbiɗa ɓi hana pal na, vur kum. I wa ɓi nah ti Apolos waɗ ti ya vuna, ɓa kum masipaka sar ndra na, kisa sinaka, anja ki huhumom vu kum ti sipi mbur pal, mbak mbur numuŋ le ta.

⁷Asi mitiri ti ka madiɗa ar mizli mekelemey na, i waka? Gwat ngi si haŋ ɗik gar na, i Buymisemuŋ muvuluw di ta kwa? Yo da a vulukuw le ma na, ki huhumo vu ɗik kaɓa a vulukuw di ti vul ta mbri mbri maka?

⁸Wuy ta na, ki mbam le si, ki gam zlili le si, kum i buyoy, mbak ndra ndra le so. Haˀaw, i wuɗ le haɗi ɓa ki tiram buyoy vuna gisiŋ, naɓa ndra kwana, i sa zumam buy ati kumo!

⁹Asi i wa na, ndra mislineye, Buymisemuŋ a cifa ndra le ar li cifi ngi dirba mizli wãˀ, kaɓa mizli migaka taŋ kiita ngi muc le. A vulam ndra le da duniya gar, da modro ngi Bumbulvuŋhoy, waɗ da mizli gar, ɓa a puram ndra ar li gi dungur taŋ.

¹⁰Ndr'i mibirngahay asi Kristu, amma kumo, kum i misi sinmijileŋhey, asi kum mujom ati Kristu. Ndr'i hĩhĩyahay, amma kumo, kum gidaŋ gidaŋ. A ra hirsam ndra, amma kumo, ara ɗuvukum hirnga.

¹¹Hã wurenna vuna kwana, may ara ja ndra, yam ara ga ndra. Ndra gulndiŋ gulndiŋ kine, ara sipam ndra nder nder, mbak ko i cifam ar li purla gu mata.

¹²Slra ndra magaka ti haŋ ndra na, i ra giram di kupuyah kupuyah wãˀ. Da mizli ara zam ndra na, ndr'i ɗuwulaka taŋ mi jaka. Da ara sipam ndra nder nder kwana, i ra ɓusakaŋ.

¹³Da ara ɓam ɓi malambaˀ ar ndra kwana, ndr'i mbiɗaka ti ˀay mezle. Hã wurenna kwana, ara gam ti ndra kaɓa gwat ngi duniya mufuk ng'ar kitikil, kaɓa zay ngi mbur.

¹⁴Yi tulukum mi ti ɓi hana, ɓa ngi pukum mesem ta, amma ɓa ki kaka a slimiɗ, asi kum i ziri ɗuwoy, ya mawuɗ kum haɗa.

¹⁵Asi mike na, da ko kum ti mizli durmuk kuruˀ madubunukum ɓi ngi Kristu tekeɗe kwana, cine kumo purla si. Muyukum sar mucuw naŋ na, i ya tisi Kristu, ti tila mi ti Ɓimezle naŋ.

¹⁶I ra gukum ambuh ambuh haɗa, sipaka sar ɗu.

¹⁷Ya muslinukum Timote, mangal ɗu ya mawuɗaŋ haɗa, miteŋteŋ ar naŋ mujom ati Bumbulvuŋ na, vurˀeŋ. Naŋ a sa mukum hiri ngi ɓi ngi cifi ɗu mujom ati Kristu na, ka ya madubuna ko maka gar, da mizli ar Cikil ngi misikristuhoy gar.

¹⁸Dambalaka mizli mekelemey a wuzla kumo, a waka kaɓa y'anta sa mi nga purukum mata, dar a huhumom vu.

¹⁹Amma da Buymisemuŋ a ngum le na, i sa ru gweˀ ngi hay kumo, yo ɓa mizli muhuhumo vu tayna, i sa sin di i mingiɓi taŋ tewle ta, amma gwat ngi gi taŋ vuna ma.

²⁰Asi Zumabuy ngi Buymisemuŋ na, naŋ anta ar mingiɓi tewle ta, amma ar gwat ngi gi ti gi ma.

²¹Zuwen i ru ngi hay kumo ti laway kwa? Malla ti wuɗavu waɗ ti mevel miteˀteˀ kwa mbrike? Ki hĩyãm wanaka?