Read South Giziga 1CO 6 Bible Online

1CO 6 - South Giziga bible

1CO 6

¹Da hiryaˀay a gi le ar wala kumo na, ki ra gaka kiita naŋ avu mizli duniyahay, mbak mitiɓiheye le jak mbrike?

²Masa gaka kiita da duniya, i mitiɓihey na, ki sinaka ta kwa? Yo da i kum masa gaka kiita da duniya ma na, ki ndilaka gi kiita memeɗeheye ta mbrike?

³I sa gaka kiita da modro ngi Bumbulvuŋhoyo na, ki sinaka ta kwa? Sokkota ɓi ngir duniya hana jak kwa?

⁴Da hiryaˀay a gi le ar wala kumo, mizli ngi pula gir da Cikil ngi misikristuhoy ta na, ki wuɗam ngi gi kiita naŋ i taŋ vur mike?

⁵Ya maɓa na, ɓa a gukum mesem. Mbur misi sinmijileŋ mindila le ngi ɗiya ɓi a wuzla sukum naŋhaya, anta ko pal ar wala kumo ta kwa?

⁶Ani, da mbur mihiryam ˀay le ati sukum naŋ na, a zlir le ɓa a widi di a mbuŋ mizli matiɓam tahay, magaka kiita nah kwa?

⁷Na zle, kum mawudam ti sukum kumoy tehhe a muŋ na, a bigi le, gwat a bukum sar le ar jiviɗ ngi Kristu si ta kwa? Da ki zluɓaka le tekeɗe kwana, ki ɓusaka ar wala kumo ta vur mike? Ki pulaka vu kumo mbak, a huloko gwat kumoyo ta vur mike?

⁸Amma i kum magam gwat mijeŋ ta, yo i kum mahuloko gwat mizli jaka. Ani, i sukum kum mitiɓihey ngbaŋ.

⁹Mizli magam gwat mijeŋ tahay na, anta sa zumam buy ngi Buymisemuŋ ta na, ki sinaka ta kwa? Jam lesl, cinaka ɓi ani kuy kuy: Ko sulomehey, ko mizli madilkam a mbuŋ kulihey, ko migi madamahay, ko mihin ti cil taŋhay ti jiviɗ wanaka gar,

¹⁰ko muhuloy, ko misi may dalahay, ko miwi ti mbaazlahay, ko miji ɓi gbiŋ gbiŋ lambaˀ da mizli waɗ muzuma cil taŋhay gar na, anta sa zumam buy ngi Buymisemuŋ ta.

¹¹Mekelemey a wuzla kumo taŋ zleˀe kanah vuna. Amma Buymisemuŋ a bunukum mungra kumoyo le avra, a pukum le sek pal da naŋ, a ɗiyukum le jeŋŋe a mbuŋ naŋ ti slimiɗ ngi Buy Yesu Kristu waɗ ti ˀUf ngi Buymisemuŋ ndra.

¹²Mizli mekelemey a ɓam na: «Y'ada ti jiviɗ ngi gi gwat gar.» Haˀaw ɓula, amma gwat gar a zlir ngi gi ta. «Y'ada ti jiviɗ ngi gi gwat gar», amma ko y'anta pula vu ɗu da gwat neˀ, ɓa a tiri ti ya beke ta.

¹³A ɓam ma na: «Ɗafa, naŋ vur kwacay, kwacaya kwana, naŋ vur ɗafa.» Haˀaw, Bumbulvuŋ a sa ziza taŋ cuw taŋ. Amma dumvu ngi mburo, naŋ vur gi sulome ta, naŋ vur Buymisemuŋ. Yo Buymisemuŋ kwana, naŋ vur dumvu ya.

¹⁴Naŋ kine, Buymisemuŋ mislikiɗa Buy ndra ti wuzla mumucahay na, a sa slikiɗa ndra ti wuzla mumucahaya ti gidaŋ naŋ aya.

¹⁵Dumvu kum i hirzlik ngi dumvu ngi Kristu na, ki sinaka ta kwa? I sa zuɓa hirzlik ngi dumvu ngi Kristu, ɓa i tiri di hirzlik ngi dumvu ngi sulome kwa? A gi ta wãˀ.

¹⁶Mbur mahin ti ngwas sulome na, a tiram le dumvu purla na, ki sinaka ta kwa? Asi Ɓimutoho, a ɓi na: «Taŋ cuw taŋ, a sa tiram le dumvu purla.»

¹⁷Amma mbur majum ng'avu Bumbulvuŋ na, a tiram le purla ati naŋ.

¹⁸Kilam kileŋ avu ɓi ngi sulome. Mungra mekelemey gar mbur maga na, anta duko dumvu naŋ vuna ta. Amma mbur magi madama na, a gi di i mungra da vu naŋ tehhe a muŋ.

¹⁹Dumvu kum i hay ngi ˀUf Mipal misi a hur kumo, i Buymisemuŋ muvulukum di, i ngi kum ta na, ki sinaka ta kwa?

²⁰Buymisemuŋ a wuruk le ngi mbiɗa hirnga kumo, gaka dudok da Buymisemuŋ ti dumvu kumo so.