Read South Giziga 1CO 7 Bible Online

1CO 7 - South Giziga bible

1CO 7

¹Akum ar ɓi ngi ɗerewol kum mutuhukiy di na, ki ɓam: «Zuwen mbur mazuɓ ngwas ta, a funa le» kini.

²Amma ɓa ngi tika gi sulome gar na, sey mbur zil gar a zuɓ ngwasa, yo ngwas gar a zuɓ zil.

³Anja zil a kiɗa may ngi ngwas naŋ, yo ngwasa kwana, a kiɗa may ngi zil naŋ ya.

⁴Dumvu ngi ngwasa, inga naŋ ta, i ngi zil naŋ. Yo dumvu ngi zile kwana, inga naŋ ta ya, i ngi ngwas naŋ.

⁵Ki zlikam vu ar wala kumo ta, sey da kum mujumom ˀay le ngi pas neˀ, ɓa ngi diradibiɗ far. A dirba nah, jumom a muŋ. Da kanah ta na, naɓa hĩhĩy kum, kum majaka vu kum gu ta na, a pula jiviɗ da Satana ɓa a tikinukum.

⁶Ya maɓi kahana na, ɓa sey ki gaka cummo ta ɓula, i pulukum di i jiviɗ ti pul.

⁷I hĩyã le haɗi ɓa mizli gar na, a cifam kaɓa ya. Amma Buymisemuŋ a vula da mburo pal pal ɓula. Ngi mbur mekeleme, i hana, ngi numuŋ kwana, pal ma.

⁸Mizli manja ngwasay ati ngwas manja ziley, waɗ wudigahaya, i ɓa taŋ so na: naŋ kuy ɓa a cifam pal taŋ pal taŋ kaɓa ya.

⁹Amma da a ndilaka tika vu taŋ avu may zil malla may ngwasa gu ta na, anja a zuɓam zil malla ngwasa. A funa may zil malla may ngwas makiɗuw na le.

¹⁰Mizli muɗuvam vuhoy le na, yi ɓa taŋ: anja ngwas a wunkam ati zil naŋ ta. Amma i mingiɓi ɗu ta ɓula, i mingiɓi ngi Bumbulvuŋ.

¹¹Amma da ngwas a wunkam le ati zile na, sey a cifi pal naŋ. Malla a ɗiyam ɓi ati zil naŋ a muŋ. Yo anja zile kwana, a ɓula ngwas naŋ ta ya.

¹²Mizli mekelemeye, i ɓa taŋ na: da mbur misikristu naŋ ti ngwas mitiɓi ta, amma da ngwas a hĩyã le ɓa a cifam cuwa na, anja zil a ɓula ta. Maɓa hana i ya, i Bumbulvuŋ ta.

¹³Yo da ngwas misikristu, zil naŋ i mbur mitiɓi ta, amma da zil a hĩyã le, ɓa a cifam cuwa na, anja a wunkam ta.

¹⁴Vur zil mitiɓi ta na, Buymisemuŋ a tiɓaŋ asi ngwas naŋ. Yo ngwas mitiɓi ta na kwana, Buymisemuŋ a tiɓaŋ asi zil naŋ ya. Da naŋ kine zleˀe ta na, naɓa ziri kumoyo, Buymisemuŋ anta sa tiɓa taŋ ta. Dambalaka, Buymisemuŋ a tiɓa taŋ le.

¹⁵Amma da zil malla ngwas mitiɓi ta, a wuɗ le ɓa a wunkam ati zil naŋ malla ngwas naŋ misikristu na, anja a wunkam. Angi hana so na, zil malla ngwas misikristu a lum hirnga naŋ le. Asi Buymisemuŋ a zulukum ɓa ki cifam zuy zuy.

¹⁶Naŋ kine, ka ngwasa, ki si na avu mi, kisa laha zil ɗike ka? Ka zil, ki si na avu mi, kisa laha ngwas ɗike ka?

¹⁷Yo! anja ko wa gar a cifi nga naŋ nga naŋ kaɓa Bumbulvuŋ muvulaŋ di, yo a ndir ar li naŋ Buymisemuŋ muzulo di ti ra. Ya madubuna da Cikil ngi misikristuhoy ko amaka gar na, i nah so.

¹⁸Da Buymisemuŋ muzulo mburo, naɓa a ci le a mizawa zleˀe si na, anja a ɗumo gwat mabiga a ci mizaw le na mata. Da mbur a ci a mizawa zleˀe ta kwana, anja a ci mata.

¹⁹Da mbur a ci le a mizawa, malla da ko a ci ta gar na, i gwat mupuɗaw ta. Gwat mupuɗawa, i sipa Ɓimuɗuva ngi Bumbulvuŋ.

²⁰Anja ko wa gar a ndir nga naŋ nga naŋ ar li naŋ Buymisemuŋ muzulo di ti ra.

²¹Ti Buymisemuŋ muzulo ka na, ki beke zleˀe kwa? Anja ki lik aseˀe ta. Amma da pas naŋ misa bo le avu ka, ɓa ki lum hirnga ɗike na, cir aseˀe jaka.

²²Asi mbur beke, Bumbulvuŋ muzulo di le na, a luuma hirnga naŋ le asi naŋ mujom ati Bumbulvuŋ na. Naŋ kine ya, mbur diimu, Kristu muzulo di le kwana, i beke ngi Kristu.

²³Buymisemuŋ a wuruk le ngi mbiɗa hirnga kumo. Ki tiram beke ngi mizli ta.

²⁴Sukum ɗu misikristuhoy, anja ko wa gar a ndir nga naŋ nga naŋ ar li naŋ Buymisemuŋ muzulo di ti ra zleˀe.

²⁵Ar ɓi ngi mizli mungbuˀngbuˀhoy na, Bumbulvuŋ a ɓi ɓa yi ɓi ɓi vurˀe ta. Amma ya mavul hana, i wuluk ɗu nga ya mburu, mbele gimezle ngi Bumbulvuŋ na, a pura le kaslsla.

²⁶Yi wa na, cifi misi kahana, naŋ kuy asi bonoy misi dana na. Haˀaw, yi pura na, naŋ kuy ɓa mbur a cifi kahana.

²⁷Kˀada ti ngwas kwa? Ki pur jiviɗ ɓa ki wunkam mata so. K'anta ti ngwas ta kwa? Ki sipi ngwas mata so.

²⁸Amma da ki zuɓ ngwas le na, ki gi di i mungra ta ɓula. Yo da diili mungbuˀo a sliˀi le kwana, a gi di i mungra ta ɓula. Amma mizli muɗuvam vuhoy le na, a sa lumam bonoy haɗi ar hin ngi siifa taŋ. Yo i wuɗ na, ɓa kumo ki cam sar ara ta.

²⁹Sukum ɗu misikristuhoy, mingiɓi ɗu anihĩ: hin a dungufo le. Zle dana, mizli muɗuvam ngwasay le na, anja a cifam kaɓa t'anta ti ngwas ta.

³⁰Mizli matuwamay, anja a cifam kaɓa t'anta tuwam zleˀe ta. Mizli mamumulomo, kaɓa t'anta mumulom zleˀe ta. Mizli mahiɗikam gwata, kaɓa t'anta ti gwat zleˀe ta.

³¹Mizli maciram asi duniya hana na, kaɓa t'anta ciram aseˀe gisiŋ ta. Asi duniya ndra mapuraka hana, a sa kiɗ mi.

³²Yi wuɗ na, anja ki likam ko neˀ ta. Mbur muzuɓ ngwas ta na, a vula vu naŋ taˀ da slra ngi Bumbulvuŋ. A pur di i jiviɗ ngi cira hiri da Bumbulvuŋ.

³³Amma mbur muzuɓ ngwas le na, a vula vu naŋ taˀ da gwat ngi duniya hana. A pur di i jiviɗ ngi cira hiri da ngwas naŋ,

³⁴mevele a wunuk le cuw. Naŋ kine ya, ngwas muzuɓ zil ta, yo zuŋ diili na, a vulaka vu taŋ taˀ da slra ngi Buymisemuŋ, ɓa a tiram i ngi Buymisemuŋ ti dumvu taŋ ati hur mevel taŋ wãˀ. Amma ngwas muzuɓ zil le na, a vula vu naŋ taˀ da gwat ngi duniya hana, a pur di i jiviɗ ngi cira hiri da zil naŋ.

³⁵Ya maɓukum hana na, ɓa ngi junukum, i ci a kwacay kum ti ci ta. Amma ɓa ki gam gwat mikaslsla mizlir le, yo ɓa ki gumbaˀam kap ng'avu Buymisemuŋ manja mevel kum a wunuk cuw cuw.

³⁶Da mbur i gawla misi may ngwas, naŋ anta sa ɓusa mangasl naŋ manja a hin di ta, a si na le ko mbri a sa hin di, yo a wuluk le zuwen taŋ mazuɓam vu na, anja a zuɓam vu, a gi di i mungra ta.

³⁷Amma da mbur a juwa le a mevele ti gidaŋ wãˀ, a zuɓ ngwasa ta, i mbur mitikaŋ ˀay ta, i mevele, ɓa a ɓusa a hin ti mangasl naŋ na ta na, a gi di i gwat mezle jaka.

³⁸Naŋ kine, mbur mazuɓa zuŋ, naŋ mabubuɗ di na, a gi di i gwat mukuy. Amma mbur muzuɓa ta kwana, a gi di i gwat mukuy wãˀ ma jaka.

³⁹Ngwasa, ti zil naŋ misi ada ar siifa aruŋ na, i mujuwa le ava. Amma da zil naŋ a muc le na, i mupuska le, a zuɓ zile ka naŋ mawuɗo, amma sey mbur misikristu ɓula.

⁴⁰Avi ya na, da a cifi le manja zuɓa zil na, a sa mumul fineˀ nah ma. Ya kwana, i wa na, i lum ˀUf ngi Buymisemuŋ le ya.