Read South Giziga 1CO 8 Bible Online

1CO 8 - South Giziga bible

1CO 8

¹Asi ɓi ngi useˀ migam di kuli na, ki ɓam: «Ndra gar, ndr'ada ti sin.» Na, sin vuna a vula huhumo vu da mburo. Amma wuɗavu a gila mburo ar jiviɗ ngi Kristu.

²Da mbur ara pura vu naŋ kaɓa a sin gwat le na, naɓa a sin gwat gisiŋ gisiŋ vuna t'aruŋ.

³Amma da mbur ara wuɗ Buymisemuŋ na, Buymisemuŋ a sinaŋ le.

⁴Ani so na, useˀ magam di kuli na, a zumaka zuy sukwa mbrike? I sinaka le, kuli i gwat mupuɗaw ar duniya ta, yo Buymisemuŋ naŋ purla si, ko mekelem anta.

⁵Da ko mizli a ɓam: «Gwat misi ka buymisemuŋhoy ada a muŋ, yo a ruwuyo kwana, haˀaw, gwat misi ka buymisemuŋhoy ada haɗi ɓula, yo misi ka bumbulvuŋhoy ada haɗi ma.» [4].

⁶Amma ngi ndra, Buymisemuŋ naŋ purla si. I Cine ndra miga gwatay gar, ndra maram kini ng'avaŋ. Yo ndra ti Buy purla si, i Yesu Kristu. Gwatay migam gar, yo ndra misi ti siifa na, mbele naŋ.

⁷Amma misin naŋhay, i mizli gar ta ɓula. Mizli mekelemey misirkam ti ɓi ngi kulihey na, a zumaka useˀ migam di kuli na, kaɓa i useˀ ngi kulihey gisiŋ aruŋ na si.Wuluk ngir mevel taŋ migidaŋ ta na, a waka kaɓa ara ca taŋ ar dili.

⁸Masa kiraha ndra gweˀ ng'avu Buymisemuŋ i gwat ngi zum ta. Da ndr'anta zumam gwat ta kwana, anta ma ndra nga dirba ta. Da ko i ra zumam gwat kwana, anta kiraha ndra gweˀ haɗa ng'ava ta ma.

⁹Amma jam lesl, anja luuma hirnga kum na, a tiri i gwat ngi hizigiɗa mihĩyãhay ng'ar mungra ta.

¹⁰Asi ka mbur misina ɓi le, ki ra zum gwat ar hay kuli, da mbur misi wuluk ngir mevele gidaŋ ta, a puruw le na, a sa vulaŋ gidaŋ, ɓa a zum useˀ ngi kuli vuna ya ta kwa?

¹¹Sukum ɗik hĩhĩy nah, Kristu mumuc vurˀe na, a sa zizi, asi sin ɗik na takwa?

¹²Kum magam mungra kahana avu sukum kumoy, yo kum magam gwat mijeŋ ta avu wuluk ngir mevel taŋ migidaŋ ta na, kite ki gam di i mungra avu Kristu.

¹³Vurˀe, da gwat ngi zumo, a hizigiɗa sukum ɗu ng'ar mungra na, zuwen ya mazum useˀ mata wãˀ si, ɓa sukum ɗu a diɗ ng'ar mungra ta.