Read South Giziga 1CO 9 Bible Online

1CO 9 - South Giziga bible

1CO 9

¹Yi diimu ta kwa? Yi mislin ngi Kristu ta kwa? Yi pura Buy ndra Yesu le ta kwa? Kumo, i migir ngi slra ɗu, ya miga da Bumbulvuŋ ta kwa?

²Ko da avu mizli mekelemeye, yi mislin ta kwana, amma avu kumo, yi mislin ɓula. Mabiga yi mislin gisiŋ na, i kum mujom ati Bumbulvuŋ na.

³Ɓi ya milaha hirnga ɗu ti naŋ avu mizli majikiy ɓi na, n'anihĩ:

⁴Ndr'anta ti jiviɗ ngi zuma gwat ati ngi si gwata ta kwa?

⁵Ndr'anta ti jiviɗ ngi ru ti ngwas misikristu asi ndra a haŋ ka mislin mekelemey: ti sukum ngi Buy ndra ati Kefas na ta wal kwa?

⁶Malla, sey ya pal ɗu ati Barnabas magam slra ngi zum ti hirnga ndra kwa?

⁷Mbur magi slra ngi soje, ɓa a zum ti hirnga naŋ tehhe a muŋ ta na, ada kwa? Mbur mahirvi gudubun manja a zum yi naŋ na, ada kwa? Malla, mbur majigin ginew manja a si ɗuwa naŋ na, ada kwa?

⁸Hana i gwat ngi gi ngi kpak ngi mbur tewle si ta. Ko ɓimujuwa ngi Moyis kwana, a ɓi di i ɓi mupurla ta kwa?

⁹Asi mike na, a tohoko angi ɓimujuwa ngi Moyise na: «Sla maɗug dawa, ki caŋ taɓak [5]. Mi ta «Buymisemuŋ maki slimiɗ na, ar slahay kwa?

¹⁰Naŋ maɓi kahana na, vur ndra tewle si ta kwa? Kanah, a tohoko hana vur ndra. Sey mbur mahuf ati mbur maɗug dawa, a ɗuvaka wuluk taŋ taˀ, ada sa lumam migir ngi slra taŋ.

¹¹Ndra mizligam a mevel kum na, i hilfa ngi Ɓi ngi Bumbulvuŋ. Wurenna, da i ra lumam migir ndra angi gwat ngi lum kumoyo na, i gwat mifineˀ gidaŋ avu kumo kwa?

¹²Da mizli mekelemeye, t'ada ti jiviɗ ngi luuma gwat kahana tivu kumo na, sokkota ndra jak kwa? Amma ndr'i gam kanah ta, i ra ɓusaka gwat gar jaka, ɓa i gam gwat ngi tika Ɓimezle ngi Kristu ta.

¹³Mizli magam slra ar hay ngi Bumbulvuŋ na, a lumam gwat ngi zum taŋ ara. Yo mizli magam mikuli ar li ngi gi mikuli a mbuŋ Buymisemuŋ kwana, a lumam mi nga taŋ angi useˀ nah vuna ya na, ki sinaka ta kwa?

¹⁴Naŋ kanah ya, Bumbulvuŋ a ɓa mizli mitila mi ti Ɓimezleheye na, sey a zumam ti Ɓimezle vuna.

¹⁵Amma ar gwat ngi gi ngi gi tayna gar na, ko i gi pal ta, yo ya matuhukum ɗerewol hana ngi cufuɗa gwat tayna ta ma. Zuwen mucu! Huhumo vu ɗu asi ɓi hana, ko mbur matiɓiy di gu, anta.

¹⁶Avi ya na, tila mi ti Ɓimezle, i ɓi ngi huhumo vu ta, i tikaˀay ɓa sey yi gaŋ. Da i til mi ti Ɓimezle ta na, kay, i bonoy avu ya.

¹⁷Da ya miga slra hana, i ngi mongoy ɗu zleˀe na, anja zleˀe, a wurkikiy aseˀeŋ. Amma i tikaˀay ɓa sey i gaŋ, i slra mupulikiy di ti pul.

¹⁸Migir ɗu ama ni ska? Migir ɗu i tila mi ti Ɓimezle, ngataraŋ, manja luuma migir zliv anja ya maluma zleˀe, asi ya matil di mi na.

¹⁹Haˀaw, yi diimu avu mizli gar, amma i gi ka yi beke ngi mizli gar, ɓa ngi lumo mizli haɗi.

²⁰I cifi a wuzla Yudeheye, ka mbur Yude, ɓa ngi lumo taŋ. Avu mizli masipaka ɓimuɗuva na, i sipa ka taŋ, y'anta ja ɓi taŋ a hirnga ta ngbaŋ. Hana gar na, ɓa ngi lumo taŋ.

²¹I cifi ati mizli manja ɓimujuwahaya, kaɓa ya manja ɓimujuwa. Anta wuɗ a ɓi, ya manja ɓimujuwa ngi Buymisemuŋ kine ta, asi Kristu i ɓimujuwa ɗu. Amma i gi gar na, ɓa ngi lumo mizli manja ɓimujuwahay.

²²Yo avu misikristu hĩhĩyahay na, i cifi ka mbur hĩhĩy ɓa ngi lumo taŋ. I gi avu mbur gar kaɓa naŋ, ɓa ko mbri na, i loho mekelemey a wuzla taŋ.

²³Yo ya maga hana gar na, asi Ɓimezle, ɓa i lum mi nga ya angaŋ.

²⁴Mizli mapam mi na, a kilam gar ta kwa? Amma masa lum migir ngi pi mi, i mbur purla a wuzla taŋ na, ki sinaka ta kwa? Kilam kil mizliv ngi luuma migir nah vuna so.

²⁵Mizli mawuɗam ci ngi pi mi gar na, a sirkaka vu taŋ ti gidaŋ nga taŋ, ɓa ngi luuma loppol mazik vuna ta ma. Amma ngi ndra, ɓa ngi luuma loppol mahiryi ta wãˀ.

²⁶Ya so na, i kil ani kahana: y'anta kil tiɗam tiɗam lambaˀ ta, yo da i ra kiɗ vu haŋ turɓus turɓus kwana, y'anta laha fit fit lambaˀ ta.

²⁷I ra ga bonoy da dumvu ɗu ti gidaŋ, yo i ra sirkaŋ. Anja a dirba, ya mbur mitil mi le ti Ɓimezle da mizli mekelemey na, ɓa a ɓulikiy ya vuna avra ta.