Read South Giziga 2CO 1 Bible Online

2CO 1 - South Giziga bible

2CO 1

¹I ya Pol, Buymisemuŋ a wuɗ le ɓa i tiri mislin ngi Yesu Kristu, i ya ati sukum ɗu Timote mutohoko ɗerewol hana da Cikil ngi misikristu, mizli ngi Buymisemuŋhoy misi a hirwuy Akaya gar.

²Anja Cine ndra Buymisemuŋ ati Buy ndra Yesu Kristu a gukum mezle, a vulukum zuy.

³Gukum sise da Buymisemuŋ, Cine ngi Buy ndra Yesu Kristu, Cine mapur ˀircece, yo i Buymisemuŋ musõhõ tuwuy ngi mizli angi gwat gar.

⁴A sõhõ ndra tuwuy ar bonoy gar, ɓa a tiri ti ndra ter ngi sõhõ tuwuy ngi mizli muroko angi bonoy gara ma, ti gidaŋ ndra malumoko di ti vaˀa vuna tehhe.

⁵Naŋ kine, Kristu misi bonoy haɗa vur ndra na, mi ngi ndra ada ara ya. Naŋ kanah ma, anja i lumam sõhõ tuwuy haɗi tisi Kristu vuna ya.

⁶Da ɓi mutuwaˀ a luuma ndra le na, naɓa i ngi sũhukum tuwuy, yo ɓa ki laham. Da a sõhõm ndra tuwuyo le na, naɓa i ngi sũhukum tuwuy, ɓa ki lumam gidaŋ ngi ɓusa bonoy misi purla ati ngi ndra masaka na ya.

⁷Yo i njaham hiri le njah ti gidaŋ wãˀ asi ɓi kumo, i sinaka le, kum masam bonoy jom ati ndra na, kisa lumam gidaŋ jom ati ndra ya.

⁸Naŋ kine, sukum ndrahay, i wuɗam ɓa ki sinaka, bonoy ndra misaka angi hirwuy Azi na, a gira ndra le kupuyah wãˀ, a funa ndra gidaŋ le. Ko i ɓam zleˀe, i sa ndiram ti siifa na, i ɓam ta.

⁹Haˀaw, i puraka a mevel ndra na, kaɓa a gam ndra kiita ngi muc le si. Naŋ kine, i pulaka vu ndra mbak da hirnga ndra gu mata. Amma i pulaka da Buymisemuŋ maslikiɗa mumucahay.

¹⁰Milaha ndra tir muc misi kahana na, i naŋ. Yo a sa laha ndra ti ra ava ma. I njaham hiri le asi naŋ, a sa laha ndra ti ra ava ma.

¹¹Kumo kwana, kisa jumom anga ti diradibiɗ vur ndra ya. Naŋ kine, gimezle Buymisemuŋ masa ga ndra di asi diradibiɗ ngi mizli haɗa na, a sa tiri i gi sise ngi mizli haɗa da Buymisemuŋ tisi ndra.

¹²Ɓi ndra majijaham di na, wuluk ngir mevel ndra, a ga sedewo naŋ anihĩ: gwat ngi gi ndra ar duniya, wãˀ naŋ avu kum na, i gaka weˀe, yo njah wãˀ ka Buymisemuŋ mawuɗo, anta ti sinmijileŋ ngi mbur ta, amma ti gimezle ngi Buymisemuŋ.

¹³Naŋ kine, ɗerewol ndra kum maslufaka, yo kum maslaka wala naŋ hana na, ko ndr'anta tuhukum mekelem ava mata. Amma i wa weˀ na, kisa slaka wala ngi mingiɓi ndra wãˀ muduba.

¹⁴Asi ki slaka wala naŋ le cah si. Tapas Buy ndra Yesu Kristu masa mawa na, kisa jijaham asi ndra kaɓa ndra majijaham asi kum na ya.

¹⁵Ya misina ɓi nah, naŋ njah na, i wuɗ cuh dumbuŋ bal ti hay kumo zleˀe, ɓa ngi ɗuwulukum mi sar mucuw naŋ ma.

¹⁶A dirba nah, i sa ru ti hay kumo nga Maseduwan, yo ɓa i sa mo ti Maseduwana wãˀ ngi hay kum, ɓa kisa jinikiy ngi zuɓa mulak ɗu nga hirwuy Yude.

¹⁷Ti ya muwuluk kahana na, i gi di i ɓi ngi sefel kwa? Malla ɓi ya majuwa a mevel ɗu ngi gi gar na, i juwa ɓi ngi mbur titra kwa? Ɓa hã yi ɓi: «hĩ», yo «ŋˀŋˀ», jom cuw taŋ kwa?

¹⁸Gwat Buymisemuŋ miɓa le na, a gaŋ, mingiɓi ndra muɓukum di na, i «hĩ» waɗ «ŋˀ ŋˀ ma», jom cuw taŋ ta.

¹⁹Asi Mangal ngi Buymisemuŋ, Yesu Kristu, ya ati Silveŋ waɗ Timote mitilam di mi a hay kum na, i «hĩ» waɗ «ŋˀŋˀ ma», jom cuw taŋ ta. Amma naŋ i «hĩ» tewle si.

²⁰Vur gwat Bumbulvuŋ miɓa le a sa ga a sa ga gar na, i «Haˀaw» gisiŋ tisi Yesu Kristu. Yo ma na, ndra maɓam «Amin» ngi ga dudok da Buymisemuŋ na, ti seˀe ma.

²¹I Buymisemuŋ vuna ti haŋ naŋ macica ndra zlak gidaŋ gidaŋ ati kumo angi Kristu, yo i naŋ vuna mipa ndra sek pal.

²²I naŋ muɗuva haŋ naŋ angi ndra, yo a po ˀUf naŋ, mudumbuŋ dumbuŋ naŋ, nga mevel ndra.

²³Nga ya na, i zuɓa Buymisemuŋ le, i migi sedewo ar joˀ ɗu: ya mimi nga Korenti ta na, i wi vu ti kum ti wi.

²⁴I puram di i jiviɗ ngi tukukum ˀay ti ɓi kum matiɓaka na ta, asi ki cicam le zlak gidaŋ gidaŋ anga si. Amma ndra jom ati kum ar mumul kumo, asi ɓi kum mitiɓaka na, kum gidaŋ gidaŋ anga si.