Read South Giziga 2CO 10 Bible Online

2CO 10 - South Giziga bible

2CO 10

¹I ya Pol ti hirnga ɗu maɓukum ti hina hirnga ati gi mezle ngi Kristu. Da y'ada a wuzla kum vuna hiti taˀ taˀ na, yi mbur muluɓ luɓ haɗi, amma da ya kileŋ avu kum na, yi mbur mutuwaˀ haɗi.

²Ambuh kum, ti ya misa ndil le a hay kum na, anja i ga ɓi mutuwaˀ ya mawulka ɓa i ga ti gidaŋ na ta. I wuɗ i sa biga avu mizli mawaka kaɓa gwat ngi gi ndra i ngi mizli titrahay na.

³Ndr'i mizli titrahay ɓula, amma gi vurum ndra i ngi mizli titrahay ta.

⁴Ĩˀĩ, gwat ngi gi vurum ndraˀahaya, a boko ti vu mbur titra ta. Amma gidaŋ taŋ, a boko ti vu Buymisemuŋ ɓa ngi mbizla li muguno ti moholoyo. Wuluk mikaslslahay ta gar na, i zizaka taŋ avra,

⁵waɗ gidaŋ ngi huhumo vu maslikiɗ gi mesene ati sin ngi Buymisemuŋ gar. Wuluk wanaka gar na, i jaka ɓa a cin mi da Kristu.

⁶I wam vu le weˀ si, da kum misa cinam mi le wãˀ na, i sa gaka bonoy da cinami ta gar.

⁷Kumo, ki puram di i deŋ ngi gwata. Da mbur a tiɓa le gisiŋ, naŋ i mbur ngi Kristu na, anja a wuluk ani kuy kuy ava: Da naŋ i ngi Kristu na, ndra kwana, i ngi Kristuhoy ka naŋ vuna ya.

⁸Ko da i ra jijih fineˀ gidaŋ neˀ ti madiɗa, Bumbulvuŋ muvula ndra di na tekeɗe kwana, y'anta gi di i mesem ta. A vula ndra di ngi vulukum gidaŋ nga mbuŋ nga mbuŋ, anta ngi hiryukum ta.

⁹Ɗerewol ya mutuhukum taŋ na, i wuɗ i pur di i jiviɗ ngi gukum zluwun ti taŋ ta.

¹⁰Vur mizli a ɓam na: «Ɗerewol Pol mutoho taŋ na, a ɓam ɓi mududok dudok, taŋ himaˀ haɗa. Amma da naŋ da ti hirnga naŋ a wuzla ndra na, i hĩhĩyaŋ, yo mingiɓi naŋ i ngatara lambaˀ ngbaŋ.»

¹¹Mbur maɓi kahana na, anja a wuluk ani kuy kuy: Mingiɓi ndra matohoko ar ɗerewol, ti ndra misi kileŋ, yo gwat ndra masa gaka ti ndra masa ndilam a wuzla kum na, wal wal naŋ anta.

¹²Mizli mekelemey mahuhumomvu taŋ tehhe a muŋ, ɓa i gam rak raka, malla ɓa i waka vu ndra ati taŋ na, i gufam gaf le ngi gi kanah ta. Taŋ a waka vu taŋ ka gwat ngi wi gwata, i taŋ vuna si, yo a waka vu taŋ avu vu taŋ vuna tehhe a muŋ. Kay, taŋ i gilaway.

¹³Amma ndra na, jijih ndra majijaham na, ndr'anta sa tuwuɗaka maakwaya ta. Amma i sa gaka weˀ avu maakway ngi slra Buymisemuŋ misla ndra di, ti naŋ mindil ti ndra gbaˀ a hay kum na.

¹⁴Asi ndr'anta tuwuɗaka maakway ndra ta. Sey da kaɓa i ram zleˀe gbaˀ a hay kumo ta. Ndr'i ndilam le dumbuŋ, hã avu kumo ti Ɓimezle ngi Kristu gisiŋ.

¹⁵Naŋ kine, ndr'anta jijaham tuwaɗ maakwaya ta, yo ndr'anta jijaham asi slra ngi mbur mekeleme ta. Amma i wuɗam jak na, anja tiɓi kum a sik nga mbuŋ, ɓa slra ndra a gil a wuzla kumo nga mbuŋ nga mbuŋ, weˀ mi ar maakway Buymisemuŋ misla ndra di,

¹⁶ɓa a dirba nah na, i sa ram ti Ɓimezle hã ar hirwuy ngi duba kumoy, manja jijih asi slra migaka gar ar guva ngi mizli mekelemeye.

¹⁷A tohoko na: «Mbur mawuɗ huhumo vu naŋ na, anja a huhum vu asi naŋ mujom ati Bumbulvuŋ.»

¹⁸Naŋ kine, mbur ngi ngil di wuy na, i mbur mangil wuy ti vu naŋ tehhe a muŋ na ta, amma i mbur Bumbulvuŋ mangil di wuy.