Read South Giziga 2CO 11 Bible Online

2CO 11 - South Giziga bible

2CO 11

¹Yawwa, da zliv ki ɓusaka bihirrnga ɗu neˀ gu na, hãh hãh, ɓusikiy so.

²I ra wuɗukum suloŋ suloŋ haɗi, yo wuɗavu musuloŋ suloŋ nah a so tivu Buymisemuŋ. Kum kaɓa diili mungbuˀo kine, ya mitikukum da zil purla, i Kristu.

³Amma i ra zluwun, kaɓa kaw mitikina Hawa ti wer naŋ na, anja wuluk kumoy a hiryam fuk wãˀ avu cifi teŋteŋ kum avu Kristu na ta.

⁴Asi mike na, da mbur mindilo le dumbuŋ a hay kumo, ara tulukum mi ti Yesu mekelem pal mbak ngi ndra mutulukum di mi na le, malla da ki ra tiɓam ˀUf mekelem pal mbak kum mulumaka na le, yo da ki ra tiɓam Ɓimezle mekelem pal mbak kum mulumaka avu ndra na le na, naɓa ki vulam di i gidaŋ da mbur nah kuy kuy wãˀa.

⁵Mislin madiɗa kum tayna, yi wa na, a finikiy ko neˀ ta.

⁶Sina mingiɓi na, ya anga ta ɓula. Amma da vur si na Buymisemuŋ cummo na, kanah ta ɓula. I bugukum di le ar gwat gar, yo ti wer wal wal gar.

⁷Ti ya mutulukum mi ti Ɓimezle ngi Buymisemuŋ na, i tila ngataraŋ. Ya ti hirnga ɗu mima vu ɗu nga ruwuy, ɓa kumo ki gilam na, i zluɓa le kwa?

⁸Ya mungum ɓa Cikil ngi misikristu mekelemey a wurkikiy, ɓa i zum di na, kite i hulo taŋ ti hul, ɓa ngi gi slra vur kum.

⁹Yo ti ya misi zleˀe a hay kum, gir ngi gwat migiy na, ko yi vul gir da mbur ɗaˀ ta. Asi sukum ndrahay musoko ti Maseduwan na, a vulikiy gwat ya muro ti may naŋ le, i jigina vu ɗu le, ɓa y'anta vulukum gir ta. Yo i sa jigina vu ɗu ava na si.

¹⁰I ɓi: ko amaka gar angi hirwuy Grek na, anta ɗumoko jijih ɗu vur ɓi mikaslsla ngi Kristu misi a hur ɗu na ta.

¹¹I ɓi kanah vur mike? Vur y'anta wuɗukum ta kwa? Na, Buymisemuŋ a si na le, y'ada wuɗukum.

¹²Gwat ya maga na, i sa ga ava na si, ɓa mizli mawuɗam muhuhumo vu, masa ɓam, ara gam slra misi purla ati ndra na, ngi zuɓa wuluk taŋ gar avra.

¹³Mizli tayna, i mislin mijeŋŋehey ta, i misi slirey. A gam kaɓa taŋ i mislin ngi Kristuhoy.

¹⁴Ɓi ngi zuma hirnga anta anga ta. Ko Satan vuna ti hirnga naŋ kwana, ada tiri kaɓa modro ngi li minjahha.

¹⁵Da ko gawla naŋhay a tiram migi slra ngi ɓi mijeŋŋe tekeɗe kwana, i ɓi madiɗa ta. Amma kiɗa mi taŋ na, a sa lumam gwat miweˀe avu gwat ngi gi taŋ vuna.

¹⁶I mahiri naŋ ava, anja mbur a puriy kaɓa yi mibihirnga ta, malla tiɓaka ka yi mibihirnga vuna si, ɓa ya kwana, yi huhum vu neˀe ya.

¹⁷Ɓi ya maɓa wurenna na, i ɓi Bumbulvuŋ mawuɗ ta, amma i ɓi nga ya mibihirnga. Asi i si na le, ya mahuhum vu na, asi ɓi hana.

¹⁸Ani, mizli ada haɗi mahuhumom vu asi li lum ngi dumvu hana. Ya kwana, i sa huhum vu ya.

¹⁹Kum mizli misi lesleye, ki ra ɓusaka mibihirngahaya ti mevel mezleŋ.

²⁰Ɓusaka ɓa a gam ti kum bekehey, ɓa a zumaka gwat komoyo, ɓa a huloko gwat kumoyo gar, ɓa a mam ti kum nga ruwuy, yo ɓa a cukum babarva.

²¹Ya maɓa na, ɓa a ga ndra mesem, ar nah na, naŋ kaɓa ndr'i hĩhĩyahay muwãˀ naŋ. Ɓi mbur matum vu ngi ɓa ti huhumo vu na, ya kwana, yi tum vu ngi ɓa ya, yi ɓi ka mibihirngaŋ.

²²I Heberey kwa? Yi mbur Heber aya. I Israyeley kwa? Yi mbur Israyel aya. I dideˀ ngi Abrahamay kwa? Yi dideˀ ngi Abraham aya.

²³I migi slra ngi Kristuhoy kwa? I sa ɓi ɓi ngi mibihirngahay. Na, i funa taŋ le wãˀa. I gi slra le fineˀ taŋ. Yi zum dangay le fineˀ taŋ. A kiɗikiy le haɗa wãˀ fineˀ taŋ. A ndir mata ngi muc ngi muc is mbeˀ mbeˀe.

²⁴Yudehey a sliɗikiy le laway kukur makir nga ngoltir is zlum.

²⁵Romahay a sliɗikiy le is makir. A kuypikiy le ti ɗugur is pal. Palalam a ciɗisl ti ya le is makir. I vi le hiipas jom ti duvuɗ naŋ kap angi mubuliy.

²⁶Mekepel a giy bonoy le is mbeˀ mbeˀ ar bi mulak ɗu ti sara, i diɗ le a haŋ mufuyovuhoy, i si bonoy le ti vu muy ɗuwoyo, yo tivi mizli Yudehey ta. Bonoy ar walahay madiɗahay, bonoy a wuzlaɓuh mikirɗak kirɗak, waɗ angi mubuliy. I si bonoy le avu sukum ndra misi slireye.

²⁷I gi slra mutuwaˀ tuwaˀhay le, yo i gir le kupuyah wãˀa. I lum haŋ ngi hinje ta is mbeˀ mbeˀe. May a jiy le, yo yam a giy le. I gi dalyam le is mbeˀ mbeˀe, himiɗ a giy bonoy le, zana ngi ki a kiciy le.

²⁸Gwat mekelemey ada, a slufam gar mata, i ya magi welele angi hin gar, yo ya malika Cikil ngi misikristuhoy gar.

²⁹Mbur hĩhĩy i wa, ɓa yi hĩhĩy ta na ka? Madiɗ ar mungra i wa, manja ɓi naŋ a giriy a mevele na ka?

³⁰Da a gi le ngi huhumo vu na, i sa huhumo vu ɗu asi hĩhĩy ɗu.

³¹Buymisemuŋ, Cine ngi Buy Yesu, maɗuwulam di mi hã ngi set na, a si na le, y'anta gi slir ta.

³²Ti ya misi zleˀe a Damas na, gawla madiɗa ngi buy Aretas, a pi mijigina lihey ar walahaya, ɓa ngi ji ɗu.

³³Amma a pam ti ya sar kutuk a hur lelek tir fenetir ngi moholo, joˀ yi lih tisi haŋ naŋ kahana so.