Read South Giziga 2CO 12 Bible Online

2CO 12 - South Giziga bible

2CO 12

¹Sey i huhum vu kwa? I gwat mupuɗaw ta ngbaŋ. Dambalaka i sa ɓa ɓi ngi gwatay ya mupura taŋ ti kleŋ ati gwat Bumbulvuŋ minjikiy taŋ.

²Mbur ada, i misikristu, i si na le. A gi le ni vi kuruˀ nga mufaɗa. A zuɓakaŋ faw ng'ar muŋ mimakir naŋ. [1] Aru le ti dumvu naŋ vuna gisiŋ kwa? Malla aru manja dumvu kwa? I si na ta. Misina i Buymisemuŋ pal naŋ.

³Haˀaw mbur nah na, i si na le. Aru le ti dumvu naŋ gisiŋ kwa? Malla aru ti dumvu naŋ ta kwana, i si na ta. Misina i Buymisemuŋ pal naŋ.

⁴A zuɓaka mbur nah sesẽŋ nga ciki Buymisemuŋ. A cin mingiɓi masin ta a diga, yo jiviɗ naŋ anta ɓa mbur titra a ɓi di ta.

⁵I sa huhumo vu vur mbur nah ɓula, amma vur hirnga ɗu na, i sa huhumo vu vur hĩhĩy ɗu tewle.

⁶Kay, ko da i wuɗ le i huhumo vu zleˀe kwana, i bi hirnga ti bi ta. Yi ɓi di i ɓi mikaslsla tewle si. Amma ya matika vu ɗu ɓa gwat ya magaŋ, malla ɓi ya maɓa na, mbur mapura ati naŋ macina na, anja a wuluk ar ya fineˀ nah ta.

⁷Gwat Buymisemuŋ minjikiy taŋ na, i gwat madiɗahay haɗa. Ɓa i huhum di vu ta wãˀ na, a cikiy gwat maji vu raɓ raɓ ka hadaw kulaˀ avu vu ɗu, a so ka modro ngi Satan, ɓa ngi kiɗ ɗu, ngi tikiy ɓa yi huhum vu ta wãˀ.

⁸Vurˀe, i tumbulo Bumbulvuŋ le is makir ɓa a kiraha bonoy nah kileŋ avu ya.

⁹Amma a mbiɗiy di na: «Gi mezle ɗu, naŋ muk ti ka si. Gidaŋ ɗu a gi slra mbar vu wãˀ angi mbur mihĩhĩy le.» Vurˀe, yi huhum vu dum le asi hĩhĩy ɗu, ɓa gidaŋ ngi Kristu a ndir ar ya.

¹⁰Ya mamumul asi hĩhĩy ɗu na, vurˀe. Ko da ara zikiy, ko da i ra si bonoy, da ara sipikiy nder nder, da ko didak ara muɗiy asi ɓi ngi Kristu kwana, yi mumul. Asi da ya mihĩhĩy le na, naɓa ya gidaŋ jaka.

¹¹Ani, yi tiri mibihirnga le. I kum mitikikiy ˀay ɓa yi tiri mibihirnga. Anja zleˀe macikam vu a hirnga ɗu, i kum. Asi ko da yi mbur mupuɗaw ta tekeɗe kwana, mislin madiɗa kumoy tayna, a finikiy ko neˀ ta.

¹²Gwatay mabigaka, mbur hana i mislin na, a gam le ani a wuzla kumo: i ɓusa bonoy wal wal gar, gwat migam ɗaˀ tahay ati cekenehey waɗ slra madiɗahay.

¹³Gwat kum mulumam geˀpreˀ avu ngi Cikil ngi misikristu mekelemey na, i mike? Haˀaw, nga ya na, sey ya muvulukum gir ta na ɓula. Gwat malambaˀ ɗu ya mugukum di i nah, wereke.

¹⁴Ani, i juw vu le ngi ru ngi hay kumo sar mimakir naŋ ma. Yo y'anta ra vulukum gir vuna ta. Asi i sipi di i zlili kum ta, amma i sipi di i kum vuna. Asi mike na, mawam vu ti gwat sek na, i ziri vur miyi taŋhaya ta, amma i miyi ngi ziri mawam vu ti gwat sek vur ziri taŋhaya jaka.

¹⁵Ya na, ɓa ngi sa zliɗa gwat ngi si haŋ ɗu, yo ɓa ngi sa vula vu ɗu vuna wãˀ asi kumo na, i wuɗ le ti mumul haɗa. Da i ra wuɗukum haɗa na, kisa wuɗikiy preˀ vurˀe kwa?

¹⁶Malla ya muvulukum gir ta na, ki tiɓaka le ta kwa? Amma mizli a waka na, i gukum di i gilaw, i jukum le ti wer kini.

¹⁷Zuɓam mbur kum muwuɗam le, a wuzla mizli ya mislinukum taŋ na. Yi vulukum gir le ti mbur loŋ a wuzla taŋ kwa?

¹⁸I tumbulo Tite, ɓa aru ngi hay kumo. Sukum ndra, kum misinakaŋ na, i slinaŋ le aseˀeŋ. Tit vuna, a zumukum le kwa? Ya ati naŋ, i zuɓam di i lesl mupurla ta kwa? Yo i sipam di i jiviɗ mupurla ta kwa?

¹⁹Diga zlezle na, ki waka kaɓa i wuɗam di i biga vu ndra a mbuŋ kumo, ndra jeŋŋe kwa? Ĩˀĩ, ndra maɓam na, a mbuŋ Buymisemuŋ, kaɓa Kristu mawuɗo. Yeme ɗuwoy, gwat ndra magaka nah gar na, ɓa ngi gulukum ar tiɓi kumo.

²⁰Naŋ kine, da ya misa ndil le a hay kumo, i ra lumukum le ka ya muwuɗ ta, yo kumo, ki lumikiy leka kum muwuɗam ta ya na, i ra zluwun. Da ya mira lumukum le, ki ra wunkam ˀay, ki ra gam suloŋ, ki ra jam mevel, ki ra wam mi asi mbur, ki ra zam vu, ki ra cikislam ɓi, ki ra zirɗam mi ngi mbur, malla ki ra gam biyãˀ biyãˀ lambaˀa na, i ra zluwun.

²¹Ya masa cuh tumbuŋ bal tihay kumo na, i ra zluwun, anja Buymisemuŋ a hiniy ˀay luɓ luɓ a mbuŋ kumo ta. Yo mizli haɗi migam mungra zleˀe, mizilam marava ti mungra taŋ ta, ti gi sulome, waɗ ti madama taŋ na ta na, anja i sa tuwuy vur mizli haɗi ar wala taŋ ta.