Read South Giziga 2CO 13 Bible Online

2CO 13 - South Giziga bible

2CO 13

¹Ya masa ru ngi hay kum na, i sar mimakir naŋ. A tohoko na: «Ɓi gar a sa cici ti mingiɓi ngi sedewohoy cuw malla makir.»

²Mizli migam mungrahay zleˀe, waɗ mizli mekelemey gar na, yi ɓukum ani: Ti ya mira purukum sar mucuw naŋ na, yi ɓukum di le zleˀe si. Yo dana, ar ya misi anta na, i mahiri naŋ ava ma: Da ya misa ndil le na, y'anta sa pur ircece da mbur ta.

³Asi ki wuɗam gwat mabiga, i Kristu maɓo ti balam ɗu. Kristu i hĩhĩy avu kumo ta, amma ara biga gidaŋ naŋ a wuzla kumo.

⁴Ti taŋ midirakaŋ avu dum mizlira na, i hĩhĩy gisiŋ ɓula. Amma naŋ ti siifa ti gidaŋ ngi Buymisemuŋ. Ndra kwana, ndr'i hĩhĩyahay asi ndra mujom ati naŋ na ya. Amma ndr'i sa bugukum di, ndra ti siifa jom ati naŋ ti gidaŋ ngi Buymisemuŋ.

⁵Kum vuna, puraka mevel kumo ti haŋ kum tehhe a muŋ. Kum mitiɓam na, kum ada sipaka kwa mbrike na, bigaka so. Malla Yesu Kristu naŋ da a hur kumo na, ki sinaka ta kwa? Sey da ɓi ngi Kristu kum mitiɓaka na, ki ndilaka bigi naŋ ta far.

⁶Yi wa na, i bigaka le, ki sinaka le.

⁷I ra tumbuloko Buymisemuŋ, ɓa anja ki gam malambaˀ ko neˀ ta. I wuɗam di i bigi gwat ndra mindilaka gi naŋ le ta, amma i wuɗam di i pur kum ar li gi gwat mezleŋ. Da ko ndr'i ndilaka ta tekeɗe kwana, zuy si.

⁸Asi ndr'anta ti gidaŋ ngi tika ɓi mikaslsla ta. Gidaŋ ndra, sey vur ɓi mikaslsla jaka.

⁹Ndrehhe na, da ndr'i hĩhĩyam le, yo da kumo, ki roko gidaŋ gidaŋ na, naɓa i mumulom. Puraka, ndra madiram dibiɗ hĩˀĩ na, vurˀe, ɓa ki tiram mizli mindilaka le kaslsla wãˀ.

¹⁰Ya matuhukum ɗerewol kahana ti ya mikileŋ avu kum na, vurˀeŋ, ɓa ti ya misa ndil le a hay kumo na, yi sa tiri mbur mihimaˀ avu kumo ta. Bumbulvuŋ a vuliy madiɗa na, ɓa ngi gulukum, anta ngi zuzukum ta.

¹¹Sukum ɗu misikristuhoy, wurenna, ndiram ti mumul, gam slra ɓa ki tiram mizli mindilaka le kaslsla wãˀ. Vulam gidaŋ ar wala kumo, jumom ˀay kuy kuy, cifam zuy zuy ɓa Buymisemuŋ ngi wuɗavu ati ngi zuyo, a sa ndir ati kum.

¹²Jam haŋ ar wala kumo ti ji vu kuɓuy kuɓuy ngi sukumuŋ mitiɓihey. Mitiɓihey gar a ju kum haŋ le.

¹³Anja gimezle ngi Buy Yesu Kristu ati wuɗavu ngi Buymisemuŋ waɗ jum purla ngi ˀUf Mipal na, a ndir ati kum gar.