Read South Giziga 2CO 2 Bible Online

2CO 2 - South Giziga bible

2CO 2

¹Yi juwa a mevel ɗu na, y'anta sa mi ngi hay kumo, ɓa ngi vulukum ndurɓo hiri mata.

²Naŋ kine, da i ra ga ɓa ki ndurɓom hiri na, masa giy ɓa i mumul i wa aruŋ maka? Sey i mbur ya migaŋ ɓa a nduruɓ hiri vuna a muŋ takwa?

³Da ani, i ndil le zleˀe na, naɓa mizli zliv anja zleˀe, a vulikiy mumul jak na, a sa vulikiy ndurɓo hiri. Ya mutuhukum ɗerewol na hĩˀĩ ngi tika ɓi nah.I si na le gisiŋ wãˀ, da ya mira mumul na, naɓa kum gar ki ra mumulom aya.

⁴Haˀaw, ya mutuhukum ɗerewol nah na, ti bonoy ati lik haɗa a mevele, yo hã ti tuwuy kol kol a hiri ma. Anta ɓa ki ndurɓom hiri ta ɓula, amma ɓa ki sinaka, y'ada wuɗukum haɗi.

⁵Da mbur a gi gwat ngi vula gir le da mbur na, a ga da ya ta, amma a vul di i gir da kum gar. Malla da i ɓam tororo nga mbuŋ ta na, a vul di i gir da mizli cah wuzla kumo ɓula.

⁶Mbur misi kanah na, anja vendeke ngi mizli ngir jum kumo, a mbiɗakaŋ hirnga.

⁷Wurenna so na, gakaŋ mezle muduba so, yo tislakaŋ mevele, ɓa a lum ndurɓo hiri mifineˀ gidaŋ, masa zizaŋ njaha hiri naŋ na ta.

⁸Ma na, ambuh kum, gakaŋ gwat ɓa a pura, ki ra wuɗakaŋ.

⁹Naŋ kine, ya mutuhukum ɗerewol na hĩˀĩ, ɓa i juɗukum, ɓa i si na da kum ada ki cinam mi wãˀ gisiŋ kwana.

¹⁰Mbur kum mupulakaŋ mungra naŋ le na, ya kwana, i pulaŋ di aya. Da ya mupula mungra ngi mburo le, da ya mulum jiviɗ le ɓa i ga na, i ga vur kum, yo a mbuŋ Kristu,

¹¹ɓa Satan a ga ndra gilaw ta. Asi i sinaka wuluk naŋ le kuy kuy.

¹²Ti ya mindil a Trowas ɓa ngi tila mi ti Ɓimezle ngi Kristu, i pura na, Bumbulvuŋ a wuniy miviŋ le baŋ ngi gi slra.

¹³Amma i lik le haɗa, asi i luuma sukum ɗu Tite ta. Ya mimbiɗa taŋ mi, i ru nga Maseduwan na vurˀeŋ.

¹⁴Amma sise da Buymisemuŋ, asi ara ru ti ndra ndrehhe ɓa i lumam bugawla mbele ndra mujom ati Kristu. A gi ti ndra ɓa i bigaka Kristu, ɓa mizli a sinaka ar li gar, ka zĩˀĩ ngi urdi mandih ar li gar.

¹⁵Asi mike na, avu Buymisemuŋ, ndr'i zĩˀĩ mundum ngi Kristu, vur mizli muroko ar jiviɗ ngi lih ati muroko zizama ma gar.

¹⁶Avi mizli mazizamaya, i zĩˀĩ ngi muc maru ti mbur ng'ar mucu. Avu mizli malahamaya, i zĩˀĩ ngi siifa maru ti mbur ng'ar siifa. Mandila gi slra hana gu, i waka?

¹⁷Asi ndr'anta kaɓa mizli mekelemey haɗi magam terere ti mingiɓi ngi Buymisemuŋ na ta. Ndra maɓam njah na, a mihiri ngi Buymisemuŋ, ar ndra mujom ati Kristu, asi i Buymisemuŋ mislino ndra.