Read South Giziga 2CO 3 Bible Online

2CO 3 - South Giziga bible

2CO 3

¹I zlaka, i maka hiri ngi ngila wuy ti vu ndra a muŋ ma kwa? Mizli mekelemey a wuɗam ɗerewol ngi ngilawuy ti vu taŋ kaw asi haŋ taŋ. Amma ndra, ɗerewol ngi ngilawuy ti vu ndra avu kum malla ngi kum avu ndra na, ndr'ada ti may naŋ kwa?

²Ɗerewol ndra, i kum vuna si. Kum i ɗerewol mutoho a mevel ndra. Mizli gar a sinaka le, a slufaka le.

³Gisiŋ gisiŋ, kum i ɗerewol ngi Kristu mutohoŋ, muvulam ndra di ngi gi slra. A tohoko ti yam ngi hilseɓ ta, amma ti ˀUf ngi Buymisemuŋ misi ti siifa. A tohoko ar beleler ta, amma a mevel mizli.

⁴Ndra maɓaka na, asi vula vu ndra taˀ wãˀ da Buymisemuŋ, mbele Kristu na.

⁵Anta asi ndra ti haŋ ndra, i ndilaka le ngi ga slra hana ti gidaŋ ndra gu, kanah ta. Gidaŋ ndra a so ti vu Buymisemuŋ.

⁶I naŋ mitiri ti ndra ter ngi tila mi ti ɓi ngi jumoˀay nawayaŋ, ɓi mutohoko ti tuh ta, amma ɓi ngi ˀUf Mipal. Asi ɓi mutohoko ti tuh, a kiɗ vu vagay, amma ˀUf Mipala, a vul siifa.

⁷Ɓimujuwa, a tohoko nguɗ nguɗ avu beleler, yo dudok ngi tihaŋ a wucuɗ le. Mihiri ngi Moyise, a wucuɗ haɗi, hã Israyeley a ɗuvaka hiri ava gu ta. Wucuɗ nah vuna, a zik ta ngbaŋ. Da slra ngi ɓimujuwa maru ti mbur ng'ar muco, a bugo vu le ti dudok haɗa kanah na,

⁸naɓa slra ngi ˀUf Mipal na, a sa gi fineˀ nah ta jak kwa?

⁹Naŋ kine, da slra ngi ɓimujuwa maga kiita ngi muc da mizli, naŋ ti dudok na, naɓa slra ngi ˀUf maɗiya mizli jeŋŋe a mbuŋ Buymisemuŋ na, a sa gi fineˀ nah ta mbri jak ka?

¹⁰Dudok misi wurenna a funa le haɗa wãˀ, ko a wam weˀ le ati dudok misi zleˀe na ta, i ɓam kanah gu.

¹¹Naŋ kine, da gwat mazik caˀa zleˀe ta, naŋ ti dudok na, naɓa gwat mazik hã ngi sete a sa gi naŋ ti dudok fineˀ nah ta mbri jak ka?

¹²I njaham hiri le njah, Buymisemuŋ naŋ ti gidaŋ kahana. Ndra maɓam manja zluwun na, aseˀeŋ.

¹³Moyis a sirit gwat sirit le a mihiri naŋ, ɓa wucuɗ naŋ mazik ta, mira susuyum na, Israyeley a puraka ta. Ndr'i gam ka naŋ na ta.

¹⁴Amma lesl taŋ anta sla wala ngi ɓi gu ta, hã dana aruŋ, da ara slufaka Jumoˀay Magala na, gwat misirta lesl taŋ tuwa na, naŋ da aruŋ. Asi a susuyum na, sey avu mbur mujom ati Kristu.

¹⁵Haˀaw, hã dana kwana, da Israyeley ara slufaka ɗerewol ngi Moyiseye na, gwat ada sirta mevel taŋ na si.

¹⁶A tohoko na: Sey mbur ara mbiɗi ng'avu Bumbulvuŋ, ɓa gwat misirit a mevele na, a tur avra.

¹⁷Asi Bumbulvuŋ vuna, i ˀUf Mipal, yo ar li ˀUf ngi Bumbulvuŋ misi anga na, li pula vu ada a diga.

¹⁸Ndra gar, misi gwat misirit a mihiri ndra, mutur le avra na, anja mizli a puraka dudok ngi Bumbulvuŋ njahha avu ndra. Bumbulvuŋ misi i ˀUf tuwa na, a mbiɗa ndra le, ɓa i tiram rak rak ati naŋ vuna, ti dudok nga mbuŋ nga mbuŋ ava.