Read South Giziga 2CO 4 Bible Online

2CO 4 - South Giziga bible

2CO 4

¹Asi mike na, Buymisemuŋ a pura ndra ˀircece le, a pula ndra slra hana le asi haŋ ndra. Ndra mahĩhĩyam ta na, vurˀe.

²Gwat ngi gi miyaŋ yaŋ ati mapi mesem gar na, i pulaka le. Ndr'anta gam gwat ti wer ta, yo ndr'anta mbiɗaka ɓi ngi Buymisemuŋ tir malambaˀ ta ma. Amma i bigam di i ɓi mikaslsla wãˀ, njah ar li babara jaka. I sipam di i jiviɗ ɓa mizli a pulaka vu taŋ mbak a mbuŋ Buymisemuŋ.

³Da Ɓimezle ndra matilam di mi na, gwat ada sirit ara na, naɓa naŋ sirit avu mizli mazizamay vuna ya.

⁴Mizli misi hirnga gidaŋhay anta tiɓaka Ɓimezle ta, asi Satan, taŋ madilkam a mbuŋ naŋ ar duniya hana na, a digisla taŋ lesle le, ɓa li minjahha ngi Ɓimezle, ngi ga dudok da Kristu na, a puraka ta. Kristu i foto ngi Bumbulvuŋ vuna.

⁵Naŋ kine, ndra matilam mi na, ti ndra tehhe a muŋ ta. Amma i tilam di i mi ti Yesu Kristu, Buy ndra. Yo ndra, ndra matilam mi: «Ndr'i gawla kumoy» na, asi Yesu vuna.

⁶Asi Bumbulvuŋ miɓi zleˀe: «Anja li a pusluɗ njahha angi luvuŋ» na, mupusluɗ a mevel ndrahay njahha na, i naŋ vuna, ɓa i sinaka dudok naŋ mawucuɗ njahha a mihiri ngi Kristu.

⁷Amma zlili muɗum nah vuna, ndra majijiraka angi mejejeŋ ngi hohoy na, ɓa mizli a puraka gidaŋ mihaɗa nah na, i ngi Buymisemuŋ, i ngi ndra ta.

⁸Mizli ara giram ndra ti bonoy wal wal haɗi, amma ko a tikam ndra ˀay gu ta wãˀ. I ra likam, amma i zizaka njaha hiri ndra njah ar Buymisemuŋ na ta.

⁹Ara sipam ndra nder nder, amma Buymisemuŋ anta pula ndra ta. A zlumbram ndra a ruwuy, amma anta kiɗam ndra vagay vagay ta.

¹⁰I ra jijiram ti muc ngi Yesu ndrehhe avu dumvu ndra, ɓa gwat ngi gi ngi Yesu na, a pur avu dumvu ndra ya.

¹¹Asi mike na, ndra misi ar siifa aruŋ na, a vulam ndra ngi muc asi Yesu, ɓa gwat ngi gi ngi Yesu a pur avu dumvu ndra mamuc na ya.

¹²Naŋ kine, muc ara gi slra a hur ndra, amma a hur kumo, ara vulukum siifa.

¹³A tohoko na: «I tiɓa Buymisemuŋ le, ya miɓi na, vurˀeŋ.«Ndra ya kwana, i ra tiɓaka Buymisemuŋ ti ˀUf naŋ mupurla nah, ndra maɓam na, vurˀe ya.

¹⁴Buymisemuŋ mislikiɗa Buy Yesu ti wuzla mumucahay na, i sinaka le, a sa slikiɗa ndra jom ati Yesu ya, yo a sa cifa ndra jom ati kum gweˀ acikeˀeŋ.

¹⁵Gwat mandilo ndra gar na, asi kum, ɓa kum masikam na, gimezle ngi Buymisemuŋ a tisl mizli haɗi nga mbuŋ nga mbuŋ, ɓa vendeke ngi mizli a gaka sise da Buymisemuŋ, ngi vulaŋ dudoko.

¹⁶Ndra mahĩhĩyãm ta wãˀ na, vurˀe. Ko da dumvu ndra mapur hana ara hiryi tekeɗe kwana, amma vur hin gar na, musuɗuk ndra ara tiri nawaya nawaya.

¹⁷Vur bonoy mikefek mazik ta, ndra masaka hana na, ara ɗiya ndra gi dudok mihaɗa mazik hã ngi sete, weˀ na, a funa bonoy ndra masaka wurenna le haɗa.

¹⁸Hiri ndra mitaˀ na, ar gwat mapuramay na ta, amma ar gwat hiri ndra mapura gu ta. Gwat hiri mapura na, a ndir ngi wãˀ ta, amma misi hiri ndra mapura ta na, a ndir hã ngi sete.