Read South Giziga 2CO 5 Bible Online

2CO 5 - South Giziga bible

2CO 5

¹Naŋ kine, i sinaka le, da guɗuk ndra ngi ruwuy, ndra misi anga hana, a puw le avra na, hay ndra ada a muŋ, hay mandir hã ngi sete, i mizli mindiraka ta, i Buymisemuŋ.

²Yo wurenna, i ra niˀicam, asi i roko ti may haɗa haɗa ngi ka hay ndra mise amuŋ na, jirngasl nga hirnga mekeleme,

³ɓa Buymisemuŋ a sa luuma ndra na, ndra gulndiŋ gulndiŋ ta, amma ti gwat ɓaˀ ɓaˀ avu vu.

⁴Guɗuk ngi ruwuy hana, ndra misi anga aruŋ ɗagay na, i ra niˀicam di kaɓa mbur maniˀic ti jijir. Dumvu ndra ngi ruwuy hana, i wuɗam cuk naŋ avra ta ngbaŋ, amma i wuɗam ki dumvu ndra ngi muŋ na, ɓa siifa a nda dumvu mamuc na surum.

⁵Miɗiya ndra ɓa i sinaka hin ngi mbuŋ nah na, i Buymisemuŋ vuna. A vula ndra ˀUf naŋ ɓa i sinaka, a wa ndra vu le ti gwat mezle gisiŋ na, ava.

⁶Ko ti vunaka gar na, ndr'anta zluwunam ta wãˀ. I sinaka le, ti ndra misi angi dumvu ndra hana aruŋ na, ndra angi hay ndra ta, ndra kileŋ avu Bumbulvuŋ.

⁷Ndra masipam jiviɗ na, asi ndra matiɓam, anta asi ndra mapuram gwat t'aruŋ.

⁸Haˀaw, ndr'anta zluwunam ta wãˀ. I hĩyãka le ɓa i pulaka li cifi ngi dumvu ndra hana, ɓa i ra cifam aciki Bumbulvuŋ.

⁹Da ko i ndiram le angi dumvu ndra hana, malla ko i pulaka le kwana, ndra mahĩyãm dum le na, i cira hiri da Buymisemuŋ.

¹⁰Sey ndra gar, i cicam a mbuŋ Kristu, ɓa a ga ndra kiita, ɓa ko wa gar a lum migir naŋ weˀe avu gwat naŋ miga ti naŋ misi ar siifa aruŋ. Da a gi di i gwat mezle, malla malambaˀ kwana.

¹¹Ndra misinaka zluwun ti Bumbulvuŋ sin si na, i puram jiviɗ ɓa mizli a tiɓaka Ɓimezle. Buymisemuŋ a si na ndra le kuy kuy wãˀ. Yi wa na, ki sinikiy le kuy kuy a hur mevel kum aya.

¹²Ndr'anta maka hiri ngi ngilawuy ti vu ndra a mbuŋ kumo mata. Amma i wuɗam i bugukum jiviɗ ɓa ki jijaham asi ndra. Naŋ kine, ɓa mizli mahuhumom deŋ ngi vu taŋ asi gwat mapur avu dumvu si, mbak ngi hur mevele le na, ki lumam mingiɓi ngi mbiɗa taŋ di gu.

¹³Da ndr'i mibirngahay tekeɗe kwana, ndra vur Buymisemuŋ. Da ndra ti lesl ndra kuy kuy na, naɓa ndra vur kum.

¹⁴Wuɗavu ngi Kristu a ca ndra le asi vu. I sinaka le gisiŋ, mbur pal mumuc vur mizli gar na, mbiɗeˀvra: mizli gar a micam le.

¹⁵Kristu a muc le vur mizli gar, ɓa mizli misi ti siifahay a ndiram ti siifa vur hirnga taŋ mata, amma vur Kristu mumuc, yo mislikiɗ tir muc vur taŋ na.

¹⁶Vurˀe, zle dana, ko ndr'anta sa puram mbur avu deŋ ngi vu ngi mburo mata. Ko da i sinaka Kristu le zleˀe avu deŋ ngi vu ngi mbur tekeɗe kwana, wurenna ndr'anta sinaka kanah mata.

¹⁷Yo ma na, da mbur mujum le ati Kristu na, a tiri mbur nawaya le. Gwat magala a cuh le, puraka, gwat nawaya naŋ da.

¹⁸Gwat hana gar, a so ti vu Buymisemuŋ miɗiya ɓi ar wala ndra ati naŋ tisi Kristu, a pula slra ngi ɗiya ɓi asi haŋ ndra.

¹⁹Na zle i Buymisemuŋvuna miɗiya ɓi ar wala ngi mizli ati naŋ tehhe a muŋ, asi taŋ mujom ati Kristu. A wulka mungra taŋ ta, a vula ndra slra ngi ɗiya ɓi, ɓa i tilam di mi.

²⁰Ndr'i mijiviɗ ngi Kristuhoy na, vurˀe. Buymisemuŋ mazulukum na, ti mingiɓi ngi balam ndra. Ambuh, ambuh kum, ti slimiɗ ngi Kristu, pulaka vu kum mbak, ɓa ki ɗiyam ɓi ar wala kum ati Buymisemuŋ.

²¹Kristu a gi mungra ɗaˀ ta. Amma Buymisemuŋ a tiri di misi purla ati ndra migi mungrahay, ɓa Buymisemuŋ a ɗiya ndra jeŋŋe a mbuŋ naŋ, ti seˀeŋ.