Read South Giziga 2CO 6 Bible Online

2CO 6 - South Giziga bible

2CO 6

¹Naŋ kine, ndr'i ra gam slra jom ati Buymisemuŋ. Buymisemuŋ a gukum mezle le. Ambuh, ambuh kum, anja ki pulaka gimezle naŋ na fuk lambaˀ ta.

²Asi Buymisemuŋ a ɓi na: «Angi pas ngi gimezle na, i tiɓa tumbul ɗike le, yo angi pas ngi laha vu na, i kilo widi ɗike. Ani wurenna, i pas ngi tiɓa gimezle ngi Buymisemuŋ, ani wurenna, i hin ngi laha vu.»

³I wuɗam i gam gwat ngi ji mevel da mbur ko neˀ ta, ɓa slra ndra magaka na, a mbiɗam ndra hirnga aseˀe ta.

⁴Angi gwat gar na, i ra bigaka, ndr'i migi slra ngi Buymisemuŋhoy jaka. I ra hurdumom ti ɓusa bonoy, ti ɓusa tikaˀay waɗ muɗa didaka.

⁵Mizli a kiɗam ndra, a cam ndra ar dangay, a slikiɗam ɓi ar ndra. I giram kupuyah kupuyah ti slra, i hinjam ta, yo may ara sla ndra zlambar.

⁶I bigaka, ndr'i migi slra ngi Buymisemuŋhoy na, ti joˀ ndra mezleŋ, ti si na gwat, ti ɓusa ɓi, ti gimezle, tisi ˀUf Mipal waɗ ti wuɗavu ndra ti kwacay purla,

⁷ti tilami ti ɓi mikaslsla, ti gidaŋ ngi Buymisemuŋ. Gwat ngi vurum ndra ngi kiɗa vu ati ngi laha hirnga ndra na, i gi jeŋŋe.

⁸Mizli a ɗuvam ndra hirnga, a hirsam ndra, a zam ndra, yo a ngilam wuy ti ndra. A puram ndra ka misi slirey, dambalaka i ɓam di i ɓi mijeŋŋe ngbaŋ.

⁹A gam ti ndra kaɓa a sinam ndra ta, dambalaka a sinam ndra le kuy kuy ngbaŋ, kaɓa ndr'i mizli migweˀ ngi mucoy, dambalaka ndra ti siifa ngbaŋ. A sliɗam ndra, amma a kiɗam ndra vagay vagay ta.

¹⁰A gam ndra gwat ngi ndurɓo hiri, amma ndr'i ra mumulom na si. Ka ndr'i misi murgahay, dambalaka i ra gam zlili da mizli haɗi ngbaŋ. Kaɓa ndr'anta ti gwat neˀ le ta, dambalaka gwat gar ada avu ndra.

¹¹Kum Korentihey, ndr'i ɓukum le njah njah, i wunukum mevel ndra le baŋ wãˀ.

¹²Ndr'i gicaka mevel ndra vur kumo ta, i kum migicaka mevel kum vur ndra jaka.

¹³Yi ɓukum kaɓa kum i ziri ɗuwoy: Gam ti ndra kaɓa ndra magam ti kum na ya, wunam ndra mevel kumo baŋ aya.

¹⁴Mizli matiɓaka Buymisemuŋ ta na, slra mizlir ngi gi ati taŋ ta na, ki jumom ara ta. Gi jeŋŋe ati mungra a gam slra jom arleˀe gu mbri mbrike? Li minjahha ati luvuŋ a jumom gu kwa?

¹⁵Kristu ati Satana, a jumom ˀay gu kwa? Mbur mitiɓi a jumom ˀay ati mbur mitiɓi ta mbri mbrike?

¹⁶Hay ngi Buymisemuŋ ati kuliheye, a jumom arleˀe mbri mbrike? Asi ndra, ndr'i hay ngi Bumbulvuŋ misi ti siifa, kaɓa Buymisemuŋ vuna miɓi: «I sa cifi ti hay ɗu a wuzla taŋ, yo i sa liˀi a wuzla taŋ. I sa tiri Buymisemuŋ taŋ, yo taŋ a sa tiram mizli ɗuwoy.»

¹⁷Vurˀe, Bumbulvuŋ a ɓi: «Bam avra ti wuzla mizli tayna so. Cifam baˀ pal kum. Gwat misi dili na, ki jaka haŋ ava ta, ɓa ya, i sa tuɓukum.

¹⁸I sa tiri Cine kum, yo kumo, kisa tiram ziri ɗu mizile ati mongosohoy. Maɓi hana i ya Bumbulvuŋ misi gidaŋ wãˀ.»