Read South Giziga 2CO 7 Bible Online

2CO 7 - South Giziga bible

2CO 7

¹Yeme ɗuwoy, ani gwat tayna gar na, Buymisemuŋ a ɓa ndra di le ɗaˀ le, a sa ndiram da ndra. Vurˀe, dumvu ndra ati musuɗuk ngi vu ndra misi dili na, zuɓukum dili taŋ ti haŋ ndra. Tumukum vu ɓa i ndiram ndr'i mizli muvuku vu taŋ wãˀ ti zluwunun ti Buymisemuŋ.

²Tuɓam ndra kuy kuy a mevel kumo. Ko i zluɓam ɓi ɗaˀ avu mbur ta. I hiryam tiɓi ngi mbur ɗaˀ ta. I zumam gwat ngi mbur ɗaˀ ta.

³Ya maɓa ɓi hana na, ɓa ngi jukum ti kiita ta. Asi mike na, yi ɓa le zleˀe si: Ko ar muc malla ko ar siifa kwana, kum i mizli ngisi mevel ndrahay wãˀa.

⁴I pula vu ɗu le wãˀ asi kum, i ra jijih teˀe asi kumo. Angi bonoy ndrahay gar na, i ro zlak gidaŋ gidaŋ wãˀa, yo i ra mumul haɗi.

⁵Wãˀ naŋ na, ti ndra mindilam a Maseduwan na, ko i muskam vu neˀ ta. I lumam bonoy le wal wal gar: kiɗavu ati mizli, yo zluwun a mevel.

⁶Amma Buymisemuŋ matisla mevel ngi mizli mihina hirngahaya, a tisla ndra mevele le ti Tit mundulo na.

⁷Mitisla ndra mevele, i Tit mundulo na tew ta, amma i gidaŋ kum muvulakaŋ di na. A ɓa ndra ɓi ngi kum muroko ti may ngi pur ɗu haɗa haɗa, ngi kum malikam, kum macikam vu a hirnga ɗu na, hã i mumul haɗi fineˀ misi zleˀe.

⁸Naŋ kine, da ɗerewol ya mutuhukum di na, ki ndurɓom di hiri le tekeɗe kwana, y'anta wulka ta. Yo da ko i wulka le tekeɗe kwana, asi i si na le, ɗerewol nah, ki ndurɓom di hiri ngi bulaw pas na si.

⁹Wurenna ya mamumul na, asi kum mandurɓom hiri na ta, amma asi ndurɓo hiri kum mugukum ɓa ki zilam marava na. Asi ndurɓo hiri kum na, a gi le ka Buymisemuŋ mawuɗo. Vurˀe, ndra kwana, ko i gukum malambaˀ neˀ ta.

¹⁰Vur ndurɓo hiri ka Buymisemuŋ mawuɗ na, a ga ɓa mbur a zil marava maru ti mburo nga lihi, yo mbur anta wulka mata. Amma ndurɓo hiri ngi duniya mawuɗ na, aru ti mburo ng'ar mucu.

¹¹Ndurɓo hiri ka Buymisemuŋ mawuɗ na, gwat naŋ miga a wuzla kum ani: Haˀaw gisiŋ, a tiri ti kum le wirwir haɗa, a junukum le haɗi ngi gi wereke, ki jam mevel le haɗi, ki zluwunam le haɗi. A vulukum may ngi pur ɗu le haɗi. A tiri ti kum le gidaŋ gidaŋ haɗa. A vulukum gidaŋ le haɗa ngi mbiɗa hirnga da migi malambaˀhaya. Ti nah gar kwana, kum vuna ki bigaka le, kum njiraŋ avu ɓi hana.

¹²Degweleˀ naŋ na, da yi tuhukum ɗerewol le na, anta asi mbur migi malambaˀ na ta, malla ko asi mbur migakaŋ malambaˀ na ta ma. Amma ɓa ki sinaka cikavu kum a hirnga ndra na kuy kuy wãˀ a mihiri ngi Buymisemuŋ.

¹³Gwat mitisla ndra mevele, i hana so. Mbak mevel nga ya ɗu mitisl na le ma na, i mumulom haɗi ti gidaŋ ma, ti mumul ngi Tit mumumul haɗa na, asi kum gar kumo mitislakaŋ mevel teˀ na.

¹⁴Asi da ko yi jijih le neˀ asi ɓi kum a mbuŋ Tite tekeɗe kwana, i ɓi ngi piy mesem ta. Amma ndra maɓukum ɓi mikaslsla ndrehhe na, naɓa jijih ndra asi ɓi kum a mbuŋ Tite, a gi le jeŋŋe.

¹⁵Kum gar kum micinakaŋ mi, yo kum mitiɓakaŋ ti jijik kirkir na, da naŋ muwulka le keŋ na, a wuɗukum hã fineˀ gidaŋ wãˀa.

¹⁶Yi mumul haɗa asi i pula vu ɗu le mbak wãˀ vur kum ko ar mike gar.