Read South Giziga 2CO 8 Bible Online

2CO 8 - South Giziga bible

2CO 8

¹Sukum ndra misikristuhoy, i wuɗam ɓa ki sinaka gimezle ngi Buymisemuŋ miga da Cikil ngi misikristu ngi Maseduwanaya.

²A lumam bonoy le wal wal haɗi, ɓa ngi pura taŋ ava. Amma ko ti murga taŋ mihaɗi na kwana, a mumulom le haɗa, hã a tiram mizli muvuloy ti gula ti hazum.

³I ga sedewo taŋ gu: a vulam weˀe avu gidaŋ taŋ, hã a funa gidaŋ taŋ vuna le ma, a vulaka ngi mongoy taŋ.

⁴A cufuɗam ndra hirdam hirdam ɓa a lumam jiviɗ ngi jina mitiɓihey misi angi hirwuy Yude.

⁵A gaka fineˀ ndra mawulkaka zleˀe ma. Dumbuŋ na, a vulaka vu taŋ le ti haŋ taŋ da Bumbulvuŋ, a durba nah a vulaka da ndra ma, ka Buymisemuŋ mawuɗo.

⁶Vurˀe, i hurdumom hirdam avu Tite, ɓa vul kum ti gula ti hazum, naŋ mizla virzi naŋ nga hay kum na, a sa kiɗa mi naŋ ti mezle.

⁷Ani, ki gam zlili le, gwat gar ada avu kum: tiɓi, si na ɓi ɓi, si na gi gwata, gi wirwir ar gwat gar, waɗ wuɗavu kum mulumaka avu ndra. Bigaka, kum i misi zlilihey ti vul kum ti gula ti hazum na ya.

⁸Ya maɓukum na, i ɗuvukum di i ɓi ti ɗuf ta. Amma ya maslufukum wirwir ngi mizli mekelemey na, i pulukum di i jiviɗ ɓa ki puraka wuɗavu kum migisiŋ gisiŋ na, ava.

⁹Naŋ kine, mezle ngi Buy Yesu Kristu miga ndra di na, ki sinaka le: naŋ misi zlili zleˀe na, a tiri misi murga vur kum, ɓa a gukum zlili ti murga naŋ na.

¹⁰Ɓi ya maɓukum di ani na, i wuluk ɗu: slra kum mizlaka zle ngi jambu na, a zlir le avu kumo ɓa ki ram di nga mbuŋ nga mbuŋ. Asi kum i mudumbuŋhoy, angi gi naŋ tew ta, amma ko ar juwa ɓi ngi gi naŋ kwana, kum i mudumbuŋhoy na si.

¹¹Wurenna so na, kiɗaka mi ngi gi slra hana wãˀ muduba. Naŋ kine, gwat ngi gimezle kum majuwaka a mevel kum na, a sa jam haŋ kasl ati gi naŋ miweˀe avu gidaŋ kum tuwa.

¹²Da wuluk ngi gi gwata, i mezle gisiŋ na, Buymisemuŋ a tuɓuw kuy kuy jom ati gwat ɗike, anta slufa gwat mikic avu ka na ta.

¹³I ɓi ngi girukum kumo, ɓa ngi vula kefek da mizli mekelemey ta, amma ɓa ki gam rak raka si.

¹⁴Wurenna, gwat kum misi ti naŋ fineˀ gidaŋ na, mi naŋ a sa naha mi nga taŋ mikic na, ɓa pas mekeleme, gwat taŋ masa lumam fineˀ gidaŋ na ya kwana, mi naŋ, a sa naha ngi kum mikic na ya, kite a sa gi kum rak raka.

¹⁵A gi le kaɓa mutohoko zleˀe: «Mbur mihil haɗa na, a lum fineˀ gidaŋ ta. Mbur mihil neˀkini kwana, a kicaŋ ta ya.»

¹⁶Sise da Buymisemuŋ miga ɓa Tite ndir wirwir vur kumo, kaɓa ndra miwirwir vur kum aya na.

¹⁷Ndra mucufuɗakaŋ na, a ngum le. Mifineˀ nah ma na, a juw vu le wãˀ ngi ru ngi hay kumo, ngi mongoy naŋ.

¹⁸Sukum ndra mekelem, Cikil ngi misikristuhoy gar mangilam di wuy asi wirwir naŋ ngi tila mi ti Ɓimezle na, i slinakaŋ le aseˀe.

¹⁹Mukuy naŋ vuna ma na, i Cikil ngi misikristuhoy muwunakaŋ ɓa a kisa ndra angi bi mulak ndra ngi gi slra ngi gwat ndra mavulaka na. I slra ndra magaka ngi ɗuva hirnga da Bumbulvuŋ ti hirnga naŋ, yo ɓa ngi ga gwat ndra majuwaka ti wuluk ndra mezle na wãˀa.

²⁰Ndra majam lesl kuy kuy gar na, ɓa dala mihaɗi muvulaka slra naŋ asi haŋ ndra na, anja mizli a lumam ɓi ngi mbiɗa ndra hirnga aseˀe ta.

²¹I wuɗam gi gwat miɗalla, anta a mihiri ngi Buymisemuŋ tew ta, amma a mihiri ngi mizli ma.

²²I sa slinam sukum ndra mekelem ati mizli ndra mislinaka taŋ na. I mbur ndra mijiɗaka le is mbeˀ mbeˀ avu wirwir naŋ. Yo ko wurenna kwana, ara biga ti gidaŋ ava, asi a pula vu naŋ le mbak wãˀ da kumo.

²³Tit i cil ɗu, i gam slra misi purla vur kumo. Sukum ndra mekelemey maki sakaŋ na, maslinaka taŋ i Cikil ngi misikristuhoy. A gam slra ngi ga dudok da Kristu.

²⁴Wuɗ kum mawuɗaka taŋ, yo jijih ndra vur kum avu taŋ na, bigaka a mbuŋ Cikil ngi misikristuhoyo.