Read South Giziga 2CO 9 Bible Online

2CO 9 - South Giziga bible

2CO 9

¹Ar ɓi ngi kum mijinaka mitiɓi ngi Yudehey na, i gir vu ngi tuhukum ɓi nah mata.

²I si na wuluk kum mezle ngi gi gwata le, yo i ra jijih di avu Maseduwanaya vur kumo. I ɓa taŋ na, sukum ndra ngi Akayaya, a juwam vu le zle ngi jambu ngi jini vu. Kum mihirdam hirdam angi slra na, a puɗka vendeke ngi Cikil ngi misikristuhoyo le.

³Wurenna, i ra slinukum sukum ndrahay, ɓa ya majijih vur kum asi ɓi hana na, a ndir i gwat ngatara lambaˀ ta. I wuɗ ɓa ki wam vu gisiŋ gisiŋ ka ya miɓa zleˀe.

⁴I ra zluwun, da ani Maseduwanay a sa ram le asi ya, yo da ara lumukum le ki wam vu ta na, naɓa pula vu ndra mbak vur kum tuwa na, kay, a sa ga ndra mesem haɗa. Ngi kumo, a ɓi mata wãˀ le jaka.

⁵Vurˀe, i pura na, a tiɓaŋ le ngi ga ambuh da sukum ndraˀahaya, ɓa a ram cici ngi hay kumo, yo ɓa ara ɗiyaka gwat ngi vul kum muvulaka ti gula ti ti hazum, kum miɓaka ɓi naŋ zleˀe tuwa. Naŋ kine, hã ya masa ndil na, da ki wam di vu le sina, naɓa a sa gi i gwat kum muvulaka le ti gula ti hazum, anta ti niˀic aseˀe ta.

⁶Wulkaka ayɗi: mbur mazligi gwat neˀkini, a sa gi sifi ngi gwat neˀkini aya, yo mbur mazligi gwat haɗi na, a sa gi sifi ngi gwata haɗa ya.

⁷Anja mbur gar a vul ka naŋ muwulka le a mevele, manja niˀic malla manja tika ˀay. Asi Buymisemuŋ a wuɗ di i mbur mavul gwat ti mumul.

⁸Buymisemuŋ, naŋ ti gidaŋ ngi vulukum sukwi ngi gwat mezlehey wal wal gar, ɓa gwat kum misi ti may naŋ gar na, a kicukum ta wãˀ, hã kisa gam gwat mezlehey gar ti is naŋ mandir lambaˀ na.

⁹Kaɓa ɓimutoho miɓi: «A vul da misi murgahaya ti gula ti hazum. Gi mezle naŋ na, naŋ da caˀa, hã ngi sete.»

¹⁰Buymisemuŋ mavul hilfa gwat da mbur mizligi, yo naŋ mavulaŋ ɗaf na, a sa vulukum hilfa ngi gwat gar, a sa ska haɗa, yo a sa gila ma gar, ɓa vul kum ti gula, ti hazum na, a sa yi vu haɗa.

¹¹A sa tiri ti kum misi zlilihey ti jiviɗ wal wal ar gwat ngi vul kum ti gula, ti hazumo, ɓa hã mizli haɗa a sa gaka sise da Buymisemuŋ asi gwat kum, taŋ masa lumaka tisi haŋ ndra na.

¹²Vur slra ngi cikila gwat kum migaka hana, a sa kiɗ di i may da mitiɓihey tew ta, amma a sa wun hiri da mizli haɗi, ɓa a gaka sise da Buymisemuŋ.

¹³Slra kum magaka hana, da mizli a hĩyãka le na, hã a sa hunumaka Buymisemuŋ asi kum magam ka Ɓimezle ngi Kristu mawuɗo, yo asi vul kum ti gula ti hazum, ti wuɗka zlili kumoy ati taŋ waɗ ati mizli gar na.

¹⁴Yo a sa bugukum, taŋ mawuɗokum haɗa na, ti diradibiɗ taŋ vur kum asi gimezle mihaɗa Buymisemuŋ mugukum di na.

¹⁵Sise da Buymisemuŋ asi gwat naŋ muvula ndra di, misi ɓi naŋ a ɓi ta na.