Read South Giziga GAL 2 Bible Online

GAL 2 - South Giziga bible

GAL 2

¹A dirba vi kuruˀ nga mufaɗ ma na, i mam nga Jerusalem ati Barnabas. I ru ti Tite le a haŋ ya.

²I ru nga diga asi i Buymisemuŋ minjikiy di ɓa i ru. I gam cikil baˀ pal ati mizli madiɗa ngi mitiɓiheye. I biga taŋ Ɓimezle ya matil di mi da mizli Yudehey ta na, ɓa slra ɗu ya miga zleˀe ati ya maga wurenna, a tiri gwat ngatara lambaˀ ta.

³Amma ko cil ɗu Tit, mbur Grek na kwana, a tikakaŋ ˀay ngi ci mizawa ta.

⁴Ko ti sukum ndra misi slirey mujumoko ng'avi ndra, muwuɗam ci naŋ na kwana, a cakaŋ ta. Mizli tayna, a slirkiɗoko nga wuzla ndra, ɓa a jiɗaka luuma hirnga ndra, asi ndra mujom ati Yesu Kristu na. Taŋ a wuɗam ɓa a tiram ti ndra bekehey.

⁵Ndr'i pulaka taŋ li ko neˀ ta wãˀ si, ɓa ɓi mikaslsla ngir Ɓimezle na, a ndir avu kum.

⁶A zilaka taŋ «mizli madiɗahay», amma ɓi ngi madiɗa taŋ zleˀe na, a ciy ya ta. Asi Buymisemuŋ anta pur di i deŋ ngi mizli ta. Mizli madiɗa tayna, a tikikiy ˀay ti ɓi mekelem pal nga hirnga nga ya na ta.

⁷Taŋ jak na, a puraka le, tila mi ti Ɓimezle da mizli manja ci mizaway na, Buymisemuŋ a pula ɓi nah le asi haŋ ɗu, kaɓa naŋ mupula ngi mici mizaway avu Piyer na ya.

⁸Asi Buymisemuŋ migi slra a hur Piyer, ɓa a tiri mislin ng'avi mizli mici mizaway na, a gi slra le a hur ɗu, ɓa i tiri mislin ng'avi mizli Yudehey ta na ya.

⁹Yo Zak, Piyer waɗ Zaŋ na, mitiɓihey a puraka taŋ kaɓa taŋ i ɓamtal ngi jaha hayay. Taŋ misinaka gimezle Buymisemuŋ migiy di na, dar a vulam ndra haŋ, da ya ati Barnabasa, ɓa ngi bigi ngiɓiˀay, ɓa ndra ati Barnabasa, i ram ng'avi mizli Yudehey ta na, yo ɓa taŋ kwana, ng'avi mici mizaway aya.

¹⁰A cufuɗam gwat purla avu ndra tewle, anja ɓa i wulkam ar misi murgahay. I gwat ya miki slimiɗ le kuy kuy anga zleˀe si.

¹¹Ti Piyer mindilo a Antiyos na, yi mbiɗaŋ hirnga daˀ a mbuŋ mizli, asi a zluɓ ɓi le.

¹²Asi mike na, dumbuŋ ti mizli Zak mislino taŋ mindiloko t'aruŋ na, Piyer ada zumam ɗaf ati mizli Yudehey ta na. Amma a dirba mizli tayna mindiloko na, a gwaha vu naŋ gwah murvay, asi a zluwun ti mici mizawaya.

¹³Joˀ Yude mekelemeye, a gam kaɓa Piyer tuwa ya, hã a sirka Barnabas vuna, a gi ti kwacay cuw ka naŋ vuna ya.

¹⁴Amma ti ya mupura t'anta gam jeŋŋe ka Ɓimezle mawuɗ na ta na, i ɓa Piyere njah a mbuŋ mizli gar: «Ka mbur Yude, da ki ra gi ka mbur ngir sukwi mekelem, anta ka mbur Yude ta na, mizli Yudehey ta na, kisa tika taŋ ˀay, ɓa a gam ka Yudeheye mbri mbrike?»

¹⁵Ndra, ndr'i Yude miya cak ti yihey. Ndr'i mizli duniyahay, migi mungrahay na ta.

¹⁶Amma i sinaka le, Buymisemuŋ mapura mburo jeŋŋe a mbuŋ naŋ na, asi naŋ matiɓa Yesu Kristu, anta asi naŋ maga gwat ɓimujuwa mawuɗ na ta. Ndra kwana, i tiɓaka Kristu le, ndra jeŋŋe a mbuŋ Buymisemuŋ aseˀe ya, anta asi ndra magaka gwat ɓimujuwa mawuɗ na ta. Da vur gi gwat ɓimujuwa mawuɗ na, mbur mandir naŋ jeŋŋe a mbuŋ Buymisemuŋ aseˀe, ko loŋ anta.

¹⁷Amma ndra Yudeheye kwana, da i puram jiviɗ le ɓa Buymisemuŋ a pura ndra ndra jeŋŋe a mbuŋ naŋ asi ndra mujom ati Kristu na, kite i tiram migi mungrahay vuna le ya. Mbiɗeˀvra: Kristu a gi slra ngi mungra sukwa? Kanah ta wãˀ.

¹⁸Asi mike na, da gwat ya mumbuzla le avra zleˀe, i zla le, i ra ndira hiri naŋ a muŋ na, naɓa i ya maga, ɓa i ngila ɓimujuwa.

¹⁹Asi ya, yi mumuca avu ɓimujuwa, i ɓimujuwa vuna mikiɗiy vagaya, ɓa i ndir ti siifa vur Buymisemuŋ. Yi midira le ati Kristu avu dum mizliraŋ.

²⁰Ya ti siifa ɓula, amma i ya mata, i Kristu misi a hur ɗu. Asi ya misi ti siifa wurenna na, i ndir di ti tiɓa Mangal ngi Buymisemuŋ muwuɗ ya, naŋ muvula hirnga naŋ asi ya.

²¹Y'anta pula gimezle ngi Buymisemuŋ fuk ta. Asi da mbur a a ndir naŋ jeŋŋe a mbuŋ Buymisemuŋ asi naŋ maga gwat ɓimujuwa mawuɗ na, kite Kristu a muc ngataraŋ.