Read South Giziga GAL 5 Bible Online

GAL 5 - South Giziga bible

GAL 5

¹Kristu mumbuɗo hirnga ndra na, ɓa i tiram diimuhoy gisiŋ gisiŋ, cicam zlak gidaŋ gidaŋ so. Anja ki pulaka vu kumo, ɓa ki tiram bekehey a muŋ mata.

²Ya Polo, i ɓukum di: da ki cam le a mizawa na, naɓa Kristu naŋ anta sa pulukum gir ko neˀ mata wãˀ.

³Yo mbur gar mitiɓa le ɓa a ci mizaw na, i ra maŋ hiri naŋ ava ma: a juwa hirnga naŋ le ɓa a ja ɓimujuwa a hirnga keɗeɗe gar.

⁴Kum mawuɗam ɓa ki ndiram jeŋŋe a mbuŋ Buymisemuŋ, asi ɓimujuwa na, kite ki wuɗkam le ati Kristu, ki ndiram le manja gimezle ngi Buymisemuŋ.

⁵Ndra kwana, i njaham hiri njah, Buymisemuŋ a sa ɗiya ndra jeŋŋe a mbuŋ naŋ tisi ˀUf Mipala, asi tiɓi ndra.

⁶Asi avu mbur mujum le ati Yesu Kristu na, da ko a ci le a mizawa, malla ko a ci ta kwana, i gwat mupuɗaw ta. Amma gwat mupuɗawa, sey tiɓi mabigi ti wuɗavu.

⁷Ki ra kilam kuy kuy zleˀe, amma muduslukum jiviɗ i wa, ɓa ki sipaka ɓi mikaslsla mata na ka?

⁸Mupukum mi ɓa ki gam kanah na, i Buymisemuŋ mazulu kum na ta.

⁹Mizli a ɓam na: «ˀIs neˀkini na, a slikiɗa hapa muhulɓa gar.»

¹⁰Amma ya na, i pula vu ɗu le mbak wãˀ da Bumbulvuŋ vur kumo. Kum anta sa wulkam wuluk mekelem pal avu nga ya na ta. Amma mbur mazliɗukum lesl na, ko da i waka gar na, Buymisemuŋ a sa kutaŋ.

¹¹Ya na, sukum ɗuwoy, da i ra til mi ti ɓi ngi ci mizawa ma na, naɓa a sipikiy nder nder vur mi aruŋ maka? Da kine na, naɓa Kristu midiraka avu dum mizlira, ya mitil di mi na, anta ji mevel da mbur ta.

¹²Mizli mazliɗukum lesl vuna, i wuɗ anja a bukoko mbuŋ taŋ vuna slar slar wãˀ ti vendeke si ni!

¹³Sukum ɗuwoy, kumo, Buymisemuŋ a zulu kum, ɓa ki lumam hirnga kum. Na so na, luuma hirnga kum na, anja a tiri i ɓi ngi ji mi, ɓa ki gam di gwat ngi dumvu kum mawuɗ ta, amma pulaka vu kumo da wuɗavu, ɓa ki jinam vu ar wala kumo.

¹⁴Asi ɓi miɓi ani: «Wuɗ mbur cil ɗike, kaɓa ka mawuɗ vu ɗik vuna» na, a jumo ɓimujuwa le gar ar li purla.

¹⁵Amma jam lesl. Da ki ra humbiɗam vu, ki ra kiɗam vu ti waˀa ar wala kumo, kaɓa gwat ngi ɓuhoy na, naɓa kisa zizam vu ar wala kumo.

¹⁶Cinaka mingiɓi ɗu anihĩ: sipam jiviɗ ngi ˀUf Mipal mabiga, naɓa kum anta sa gam may gwat ngi dumvu kum mawuɗo mata.

¹⁷Asi mike na, may gwat ngi dumvu ndra, ara gi mesene ti ˀUf Mipala, yo ˀUf Mipala kwana, ara gi mesene ti may gwat ngi dumvu ndra ya. Taŋ cuw taŋ i mesenehey, mbak ko ki gam gwat kum mawuɗama gu mata.

¹⁸Amma da ki ra sipam jiviɗ ngi ˀUf Mipal mabiga na, naɓa kum anta luɓ luɓ avu ɓimujuwa mata.

¹⁹May gwat ngi dumvu ngi mburo, i misinahay le: kuw, dili, sulome,

²⁰huruk huruk a mbuŋ kulihey, ketele, gi mesene, wunkaˀay, suloŋ, ji mevel, tiri, jumoˀay ta, ngic mingac kini ngac kini ar wala,

²¹may gwat, pula vu da mbaazla, zum fineˀ gidaŋ, yo waɗ gwat mekelemey mubam vu. I ɓukum di le ɗaˀ ɗaˀ le zleˀe si, i ra mukum hiri naŋ ava ma: mizli magam gwat misi ka tayna, t'anta sa zumam buy ngi Buymisemuŋ ta.

²²Amma gwat ˀUf Mipal maya a hur mburo n'anihĩ: wuɗavu, mumul, zuy zuy, ɓusa ɓi, gimezle, mevel mezle, gi teŋteŋ,

²³teˀteˀe, jigina vu. Ɓimujuwa anta tika gwat misi ka tayna ta.

²⁴Mizli ngi Kristuhoyo, dumvu taŋ ati hiyĩ gwat ngi dumvu taŋ waɗ may gwat naŋ gar na, a kiɗaka taŋ le vagay vagay ar dum mizlira.

²⁵Da ndra misi ti siifa na, asi ˀUf Mipal na, supukum jiviɗ naŋ mabiga ndra di ya.

²⁶Anja i huhumom vu ta: i jiginam mi ar wala ndra ta, yo i gam may gwat ar wala ndra ta.