Read South Giziga EPH 4 Bible Online

EPH 4 - South Giziga bible

EPH 4

¹Ya mbur dangay asi ya mujom ati Bumbulvuŋ na, i ra tumbulu kum so: sipaka jiviɗ ngi Buymisemuŋ kasl kasl ka naŋ muzulukum na.

²Hinam hirnga ndrehhe, ndiram teˀteˀe, ɓusam ɓi, ɓusam vu ar wala kumo ti wuɗavu.

³Wuluk purla ngi ˀUf Mipal mavula na, tusom mevel ɓa ki ndiram di ar wala kumo ti cifi zuy zuy kum na.

⁴Dumvu, naŋ purla, ˀUf Mipala, naŋ purla. Naŋ kanah ya, Buymisemuŋ a zulu kum na, ɓa ki njaham hiri njah wãˀ.

⁵Bumbulvuŋ, naŋ purla, tiɓi, naŋ purla, ci ar yama, naŋ purla.

⁶Buymisemuŋ, Cine ngi mizli gara, naŋ purla, a zum buy ar mizli gar, a gi slra tisi mizli gar, naŋ da a hur mizli gar.

⁷Ko wa gar a wuzla ndra, a vulakaŋ gwat nga naŋ le, weˀe avu ngi Kristu muvula.

⁸Kaɓa Ɓimutoho miɓi: «Naŋ mucuh nga muŋ na, aru ti dangayay le a haŋ. A vula gwat le da mizli.»

⁹Yo «a cuh le nga muŋ vuna», mbiɗeˀvra mbrike? Mbiɗeˀvra na, a pi sar le zleˀe hã sesẽŋ a hur li mijileŋ ngi ruwuy ɗagay.

¹⁰Mbur mipi sar na, i mupurla ati mucuh ng'ar li mikileŋ fineˀ muŋ na, ɓa a naha duniya kurzluˀ gar.

¹¹Yo i naŋ muvula gwat wal wal da mizli: mizli mekelemeye, a vula taŋ slra ngi mislin, mekelemeye, i mijiviɗey, mekelemeye, ngi tila mi ti Ɓi Mezle. Mizli mekelemeye, slra ngi jigin, waɗ ngi dubuna gwat da mizli.

¹²A ga kahana, ɓa ngi ɗiya mitiɓiheye, ɓa a gam slra ngi gila dumvu ngi Kristu,

¹³ɓa hã ndra jom gar ndra, i sa ndilam jom ar tiɓi purla, yo ar si na Mangal ngi Buymisemuŋ, ka mizli micawwahay, yo weˀe avu deŋ gil ngi Kristu wãˀ.

¹⁴Kahana na, ndr'anta sa ndiram ziri ziri mata. Ɓa gwat gar mizli madubunaka da mizli ti wer ngi ga taŋ gilaw, yo ɓa a zluɓam ɓi na, aru ti ndra nos aka nos aka mata.

¹⁵Amma tulukum mi ti ɓi mikaslsla ngi wuɗavu, ɓa i sa gilam ar gwat gar, hã i ndilaka Kristu, hirnga ndra na.

¹⁶Dumvu gar mujom na, aseˀeŋ, yo naŋ mujom purla ar leˀe kuy kuy na, mbele hirzlik ngi dumvuhoy gar mujumokoŋ. Da hirzlik gar ara ga slra nga naŋ na, dumvu gar a gil, a gi ɓesde nga mbuŋ ar wuɗavu.

¹⁷Ya maɓukum, yo ya magi sedewo ar ya mujom ati Bumbulvuŋ, puraka n'ani: anja ki sipam sirik ngi mizli duniyahay mata, wuluk taŋ ar ti taŋ nga zizi.

¹⁸Lesl taŋ, naŋ angi luvuŋ, yo siifa Buymisemuŋ mavula na, taŋ a lumam neˀ ta, vur a sinam gwat ta wãˀ, hirnga taŋ gidaŋ.

¹⁹Wuluk ngi mesem anta a mihiri taŋ ta wãˀ, a pulaka vu taŋ ngi gi sulome, a gam sukwi ngi gwat mizlir ngi gi ta manja makakway.

²⁰Kumo, kum mudubunam ar ɓi ngi Kristu na, i nah ta.

²¹Ɓi mikaslsla ngi Yesu, ki cinaka le ɗaˀ gisiŋ. Kum misikristuhoyo, a dubunukum di i nah.

²²Anja ki pulaka gi gwat kum misi zleˀe na. Kpak ngi vu kum magala mahiryi ti hiyĩ gwat magukum gilaw na, muɗam vu kum ceɗ ti ngaŋ.

²³Anja mevel kum ati lesl kum a mbiɗi ɓa ki tiram nawayahay wãˀ.

²⁴Kpak ngi vu nawaya Buymisemuŋ miga, mubam vu ati naŋ, yo mapur ar gi gwat mijeŋŋe, gwat mipal mabo tir ɓi mikaslsla na, kaka avu vu kumo.

²⁵Ani, ki muɗam vu kumo le tir slire so, anja mbur gar a ɓi ɓi migisiŋ da mbur cil naŋ. Asi ndra jom gar arleˀe, i hirzlik ngi dumvu purla.

²⁶Da ki jam mevel le na, anja ki gam mungra ta. Anja ki vam hiipas ti ji mevele, hã pas a diɗ di ta.

²⁷Ki pulaka jiviɗ da Satan a jukum ta.

²⁸Mbur muhul zleˀe na, anja a pula hulo. Anja a hurdum ngi gi slra ti haŋ naŋ ti jiviɗ mikaslsla, ɓa a lum gwat ngi wunuk ati mbur muro ti may naŋ jaka.

²⁹Anja ko ɓi malambaˀ pal a bo ti balam kumo ta. Da ki wuɗam ɓi ɓi le na, sey ɓi mezle, ɓa a jina mizli micin naŋhaya gu, yo a ga taŋ mezle.

³⁰Buymisemuŋ a ɗuvukum ˀUf naŋ le avu dumvu kumo ka lammba, ndra masinaka hin a sa ndilawa, Buymisemuŋ a sa laha ndra wãˀ na, ava. Anja ki gakaŋ gwat ngi ndurɓo hiri ta.

³¹Ɓi ngi ji mevel da mbur, ji mevel, himaˀ, buca vu ati zi vu, ko sukwi ngi moˀore wanaka gar na, pulaka taŋ avra.

³²Gam mezle ar wala kum, ndiram ti mevel mezle. Ko wa gar a pula gwat malambaˀ ngi cil naŋ magaŋ di kaɓa Buymisemuŋ mupulukum di ar kum mujom ati Kristu na ya.