Read South Giziga EPH 5 Bible Online

EPH 5 - South Giziga bible

EPH 5

¹Sipaka sar ngi Buymisemuŋ so, asi mike na, kum i ziri naŋhay, naŋ mawuɗokum.

²Wuɗam vu ar wala kum ar joˀ kumo, kaɓa Kristu muwuɗ ndra na. A vula hirnga naŋ ti haŋ naŋ da Buymisemuŋ vur ndra, ka gwat muvula ngi gi mikuli mazĩˀĩ ndum haɗa, macira hiri da Buymisemuŋ.

³Sukwi ngi madama wana gar, dili, malla ko may zlili gar na, a zlir ngi slufa ar wala kumo ta, kum i mizli ngi Buymisemuŋhoy.

⁴Yo ɓi mutuzloˀ lambaˀ, mi ngi gilaway, malla ko ɓi ngi hirya mbur gar na, a zlir ngi ɓi ta. Zuwen kum vulaka vu kum ngi ga sise da Buymisemuŋ jaka.

⁵Mbur sulome, magi gwat mizlir ngi gi ta, mawuɗ gwat gar da naŋ na, i mbur mahuruk huruk a mbuŋ kulihey, anta sa lum li cifi ar zumabuy ngi Kristu ati ngi Buymisemuŋ ta. Sinaka ɓi hana sin le kuy kuy.

⁶Anja mbur a gukum gilaw ti ɓi malambaˀhay ta. Buymisemuŋ mazuɓ himaˀ ar mizli macinakaŋ mi ta na, aseˀeŋ.

⁷Anja ki jumom ati mizli tayna ta so.

⁸Zleˀe na, kum ar luvuŋ, amma wurenna, kum mujom ati Bumbulvuŋ na, kum ar li minjahha. Zuwen cifam ka mizli ngir li minjahha.

⁹Asi li minjahha a bo ti gimezle, gi gwat mikaslsla ati mijeŋŋe.

¹⁰Slaka wala ngi gwat macira hiri da Bumbulvuŋ.

¹¹Anja ki jumom ar gwat ngi gi malambaˀ ngir luvuŋ na ta. Zuwen njuyoko taŋ avra jaka.

¹²Gwat mizli tayna magaka ɗum ti ɗum na, mesem a gi vu ngi ɓa ɓi nah.

¹³Amma gwat munjuy le ar li babara gar na, naɓa li minjahha a njika le njak wãˀ.

¹⁴Vur gwat minjik le gar na, i li minjahha. Vurˀe, a ɓam na: «Ka mahinje na, puɗuku, slikiɗ ti wuzla mumucahaya, joˀ Kristu a sa pusluɗa li njahha ar ka [2].»

¹⁵Jam lesl kuy kuy gisiŋ ar joˀ kumo. Ki gam gwat ngi gilaway ta, amma gam ka misi lesley,

¹⁶magam gwat mupuɗaw angi pas muwurenna, vur hinay i malambaˀhay.

¹⁷Anja ki tiram mizli manja lesley ta, amma slaka wala ngi gwat Bumbulvuŋ mawuɗo.

¹⁸Ki wam ti mbaazla ta, aru ti mburo ngra zizi. Amma naham ti ˀUf Mipal.

¹⁹Ɓam ar wala kumo ti ɗerewol ngi hunumavu, ti dimisey, waɗ ti dimis mabo ti vu ˀUf Mipal. Zlam dimis, yo hunumaka Bumbulvuŋ ti mevel purla.

²⁰Gaka sise da Cine ndra Buymisemuŋ ti slimiɗ ngi Buy ndra Yesu Kristu ar pas gar, yo asi ɓi mike gar.

²¹Kum mizli mazluwunam ti Kristu na, hinam hirnga ar wala kumo.

²²Kum ngwasay, hinam hirnga a mbuŋ zil kumoyo, kaɓa kum magaka a mbuŋ Bumbulvuŋ na ya.

²³Asi zil i buy ngi ngwasa, rak rak kaɓa Kristu i buy ngi Cikil ngi misikristuhoy, i Milih ngi dumvu naŋ vuna.

²⁴Anja ngwasay kwana, a hinam hirnga a mbuŋ zil taŋhay ar gwat gar, kaɓa Cikil ngi misikristuhoy mahin hirnga a mbuŋ Kristu na ya.

²⁵Kum ziley, wuɗam ngwas kumoyo, kaɓa Kristu muwuɗ Cikil ngi misikristuhoy, hã a vula hirnga naŋ asi taŋ na.

²⁶A wuɗ kanah na, ɓa a bunaŋ ti yam ati mingiɓi naŋ, ɓa a ndir, naŋ pal.

²⁷A wuɗ ɓa a bigaŋ a mbuŋ naŋ, i Cikil ngi misikristuhoy, mukuy haɗi, celele, kuleɗ kuleɗ, ko hereweɗ neˀ ava anta. A wuɗ ɓa mizli naŋhay a ndiram taŋ pal, yo ko gwat ngi mbiɗa taŋ hirnga neˀ, anta avu taŋ ta.

²⁸Naŋ kine, sey zil a wuɗ ngwas naŋ kaɓa naŋ mawuɗ dumvu naŋ. Mbur mira wuɗ ngwas naŋ na, a wuɗ di i vu naŋ vuna si.

²⁹Naŋ kine, ko mbur mihirsa dumvu naŋ anta ndiɗaˀ wãˀ. Amma a vulaŋ gwat ngi zum jaka, a ki slimiɗ ara kaɓa Kristu maga da Cikil ngi misikristuhoy.

³⁰Ndr'i hirzlik ngi dumvu naŋ ta kwa?

³¹Vurˀe, a ɓam na: «Mbur a sa pula cine ati mumuŋ, a sa gumbuˀ ng'avi ngwas naŋ. Yo taŋ cuw taŋ a sa tiram dumvu purla.»

³²Ɓi mufuna wuluk ngi mbur hana, i ɓi madiɗa: avu ya na, ara ɓi ar Kristu ati Cikil ngi misikristuhoy.

³³Na zle, a ɓi vuna vur kum aya: anja sey zil gar a wuɗ ngwas naŋ, kaɓa naŋ mawuɗ vu naŋ. Yo ngwasa kwana, a ɗuva hirnga da zil naŋ ya.