Read South Giziga EPH 6 Bible Online

EPH 6 - South Giziga bible

EPH 6

¹Kum ziri, cinaka mi da miyi kumoy ar kum mujom ati Bumbulvuŋ. Gwat mizlir ngi gi, i hana.

²«Ɗuva hirnga da bunuk ati munuko», hana i ɓimuɗuva mudumbuŋ naŋ, waɗ gwat Buymisemuŋ miɓa ɗaˀ le na, geˀ ng'ameˀeŋ:

³ɓa ki mumul, yo ɓa hin ngi siifa ɗik a ruwuyo, a muruɗ nga mbuŋ.

⁴Kum miyi ziriy, ki slikiɗaka himaˀ ngi ziri kumoyo ta, amma gilaka taŋ ti sirik ati kuti maso ti vu Bumbulvuŋ.

⁵Kum bekehey, cinaka mi da buy kum ngi ruwuyoy aka ti zluwun, ti jijik, yo ti mevel mezle, kaɓa ki gaka i da Kristu.

⁶Anta asi taŋ majiɗukum kaɓa ki puram di i jiviɗ ngi cira hiri da mizli ta, amma kaɓa beke ngi Kristuhoy macikam vu ngi gi gwat Buymisemuŋ mawuɗo.

⁷Gaka slra kumo ti mevel mezle, kaɓa ki gaka na, da Bumbulvuŋ, anta da mizli ta.

⁸Ki sinaka le, mbur gara, ko da i beke, malla i diimu kwana, da ara gi gwat mezle na, Bumbulvuŋ a sa vulaŋ migir naŋ.

⁹Yo kum buy ngi bekehey, gam avu taŋ kanah ya. Pulaka buc taŋ ti buco. Ki sinaka le, taŋ waɗ kumo gar na, Buy kumo naŋ a muŋ, yo mizli, taŋ rak rak gar a mbuŋ naŋ.

¹⁰Wurenna, mindir na, juwam vu gidaŋ gidaŋ ar kum mujom ati Bumbulvuŋ, gam solok ti gidaŋ naŋ mihaɗi na.

¹¹Kaka gwat ngi vurum ngi Buymisemuŋ mavula na, ɓa ki cicam zlak a mbuŋ wer ngi Satana gu.

¹²Ndra makiɗam vu na, ati mizli ta, amma ati gwat madiɗahay, gwat misi gidaŋhay, yo mazumam buy ar luvuŋ ngi duniya hana, waɗ ati gidaŋ ngi Satanay mazumam buy ar birngiŋ ngi muŋ.

¹³Vurˀe, jaka gwat ngi vurum Buymisemuŋ mavula na so, da hin malambaˀ misa ndilo le na, kisa cicam zlak gu. Yo ko a dirba kum mikiɗam vu le, hã ar kiɗa mi naŋ kwana, kum ada dedeŋ ngi kum ngi kum na si.

¹⁴Cicam zlak so, kwacay tuwaɗ tuwaɗ ti ɓi mikaslsla ar deɗe ngi gabaga, gi gwat mijeŋŋe sirit a didaka ar deɗe ngi libiti,

¹⁵yo wirwir ngi ru nga tila mi ngi Ɓimezle ngi vula zuyo, kulaˀ a sara ar deɗe ngi taraka.

¹⁶wãˀ naŋ na, tiɓam a mevel kumo, kite ki jam di i mbaray. Ki sa mucaka gidaŋ ngi luvut mihimaˀ ngi Satan maso ng'avu kumo ti naŋ.

¹⁷Tuɓaka ɓi ngi lahavu, tiɗaka tiɗeˀ a hirnga ar deɗe ngi jiiku ngi ɓiri. Yo tiɓaka mingiɓi ngi Buymisemuŋ ar deɗe ngi maslalam, ˀUf Mipal mavula.

¹⁸Gaka kahana gar ar diradibiɗ ti cufuɗa jini avu Buymisemuŋ. Diram dibiɗ angi pas gar, kaɓa ˀUf Mipal mabugukum di. Naŋ kine, ki hinjam ta, yo cifam jeŋŋe ndrehhe, diram dibiɗ vur mizli ngi Buymisemuŋhoy gar.

¹⁹Diram dibiɗ vur ya ya, ɓa ya masa wuna mi na, anja Buymisemuŋ a vuliy mingiɓi naŋ, ɓa Ɓimezle mufuna wuluk ngi mbur na, i til di mi manja zluwun.

²⁰Ya misi yi mislin, yo mujuwikiy ti celelu angi dangay na, aseˀeŋ.Tumbuloko Buymisemuŋ, ɓa i ɓi manja zluwun ka naŋ mawuɗo.

²¹Tikik, sukum ɗu ya mawuɗaŋ, mijini ɗu miteŋteŋ ar ya mujom ati Bumbulvuŋ na, a sa slufukum ɓi ngi cifi ɗu ati gwat ya maga, ɓa kum kwana, ki sinaka ya.

²²Ya maslinukum di na hĩˀĩ ɓa ngi ɓukum ɓi ngi jam ndra, yo ɓa ngi vulukum gidaŋ a mevel a muŋ.

²³Kum sukum ndrahay gar, anja Cine ndra Buymisemuŋ ati Buy ndra Yesu Kristu, a vulukum zuy ati wuɗavu, ɓa ki tiɓam a mevel kumo.

²⁴Mizli mawuɗaka Buy ndra Yesu Kristu ti wuɗavu mahiryi ta na, anja Buymisemuŋ a ga taŋ mezle gar.