Read South Giziga PHP 1 Bible Online

PHP 1 - South Giziga bible

PHP 1

¹I ya Pol ati Timote, gawla ngi Yesu Kristuhoy matohoko ɗerewol hana, da kum mizli ngi Buymisemuŋhoy gar, misi a hurwuy Filip, ar kum mujom ati Yesu Kristu, da mizli madiɗa ngi Cikil ngi misikrisktuhoy waɗ da mijini mitiɓihey.

²Anja Cine ndra Buymisemuŋ ati Buy ndra Yesu Kristu a gukum mezle, a vulukum zuy.

³Ti ya muwulka ɓi kumo le gar na, i ra ga sise da Buymisemuŋ ɗu aseˀeŋ.

⁴Da ya mira dir dibiɗ ndrehhe vur kum gar na, i dira ti mumul,

⁵asi kum mijinikiy ngi njaha Ɓimezle, zle angi hin mudumbuŋ naŋ, hã wurenna na.

⁶Yi tiɓa le gisiŋ gisiŋ: Buymisemuŋ mizla virzi ngi slra mezle hana a hur kum na, a sa ru di caˀa kine, gbaˀ avu kiɗa mi naŋ, hã tapas Yesu Kristu masa mawa.

⁷Ya mawulkukum gar ar mevel ɗu kahana na, naŋ kaslsla wãˀ. Asi gimezle Buymisemuŋ migiy di, ko angi dangay, ko angi ya macik vu, yo ya mawuɗ ɓa Ɓimezle a cici kuy kuy na, kum gar, ki jumom le ati ya anga.

⁸Haˀaw, i ra wuɗukum haɗi a mevel ɗu, kaɓa Yesu Kristu mawuɗokum vuna, Buymisemuŋ a ga sedewo nah.

⁹Diradibiɗ ɗu avu Bumbulvuŋ ani: ɓa anja ki wuɗam vu nga mbuŋ nga mbuŋ ava, ki ndiram hiri ɗeŋ ɗeŋ waɗ ki slaka wala ngi ɓi kuy kuy wãˀ,

¹⁰ɓa ki slaka wala ngi gwat mizlir le kaslsla. Naŋ kine, tapas Yesu Kristu masa sawa na, kisa ndiram manja dili, ko ɓi ngi mbuɗukum hirnga aseˀe, anta.

¹¹Ki sa ndiram ti gi gwat mijeŋŋe haɗa, Yesu Kristu mavulo ndra di, ɓa ngi gi dudok da Buymisemuŋ, yo waɗ ngi hunumaŋ ti naŋ.

¹²Sukum ɗu misikristuhoy, i wuɗ anja ki sinaka gwat mindilo avu ya na, a gi ngi jina Ɓimezle, ɓa aru nga mbuŋ nga mbuŋ jaka.

¹³Asi mike na, angi hay ngi kiitahay gar, yo ko amaka gar na, wurenna mizli a sinaka le kuy kuy wãˀ, a jikiy angi dangaya asi Kristu.

¹⁴Yo vendeke ngi sukum ɗuwoyo, ji ɗu ar dangay na, a vula taŋ gidaŋ le ar taŋ mujom ati Bumbulvuŋ. A ra tumom vu fineˀ misi zleˀe ngi tila mi ti ɓi ngi Buymisemuŋ manja zluwun.

¹⁵Gisiŋ ɓula, mizli mekelemeye, ara tilam di mi ti suloŋ waɗ ti gi mesene ti ya. Amma mekelemeye, a tilam di mi ti wuluk mezle.

¹⁶Mizli, a gaka ti wuɗavu. A sinaka le, ya misi aka na, ngi cika vu asi Ɓimezle ngi Kristu vuna.

¹⁷Mekelemeye, a tilam mi ti ɓi ngi Kristu, ti wuluk ngi gi mesene tewle. A wuɗam ɓa ya misi ar dangay na, anja bonoy ɗu a gi ɓesde nga mbuŋ ava, anta wuɗam di i tilami gisiŋ ta.

¹⁸Na zle nga ya wanaka! Da a tilam di mi ti wuluk cuw cuw, malla ti wuluk mijeŋŋe gar kwana, ɓi ngi Kristu a tilaka le si. I mumul vurˀe, hã i sa mumul nga mbuŋ nga mbuŋ vurˀe ava ma kini.

¹⁹Asi i si na le, hana gar na, a sa kiɗ mi ti lih ɗu, mbele kum madiram dibiɗ vur ya, yo asi ˀUf ngi Yesu Kristu majiniy.

²⁰Asi mike na, ya makutuk ti yam ar gojogoɗ, yo ya manjih hiri gar na, y'anta sa pi mesem ta wãˀ. Amma wurenna ati nga mbuŋ gar na, y'anta zluwun ko neˀ ta wãˀ. Ko da ya ti siifa malla ko da ya mumuc le kwana, mizli a sa puraka dudok ngi Kristu avu dumvu ɗu.

²¹Asi nga ya na, siifa i Kristu, yo muco kwana, i li lum ɗu.

²²Amma da siifa ɗu a ruwuy aka, a puliy jiviɗ ɓa i gi slra mupuɗaw gu na, i si na ɓa i wini hana kini mata so.

²³A giy le welele ti ka ti ka gar. I wuɗ le haɗi ɓa i pula hirwuy hana, ɓa i ra cifi avu Kristu. Gwat ya mahĩyã haɗa wãˀ na, i nah so.

²⁴Amma cifi a ruwuy aka vur kum na kwana, a funa kuyo le wãˀ ma.

²⁵Yo i tiɓa le gisiŋ gisiŋ, i si na le ma, i sa cifi avu kumo, i sa ndir gweˀ avu kum gar, ɓa ngi jinukum, ki ram nga mbuŋ nga mbuŋ, yo ɓa kum matiɓam na, ki mumulom di.

²⁶Yo ɓa ya misa mi le ng'avu kum na, dudok kum mulumam asi kum mujom ati Yesu Kristu na, aru nga mbuŋ nga mbuŋ mbele ya.

²⁷Amma sey da gwat ngi gi kumo, a ndila le kaɓa Ɓimezle ngi Kristu mawuɗo. Naŋ kine, da ko i ru le nga purukum, malla i ru ta kwana, i sa cine ɓi kumo, ki roko cicam zlak kuy kuy ar wuluk misi purla. Ki roko cikam vu jom arleˀe ti mevel purla, ka tiɓi Ɓimezle mawuɗo.

²⁸Ko ki pulaka mizli mazliram ti kum ta na, a gucukum mi ar gwat ko neˀta. Avi taŋ na, i gwat mabiga taŋ di njah, taŋ maram na, nga zizi, yo ngi kumo, kum ar jiviɗ ngi lih, yo hana, a so tivu Buymisemuŋ.

²⁹Asi Buymisemuŋ a gukum mezle le, ɓa ki gam gwat da Kristu. Anta ki tiɓakaŋ ti tiɓi tew ta, amma sey kisam bonoy aseˀe ma,

³⁰ti cika vu misi purla, kum mipraka avu ya na, yo ki sinaka le, i ra cik vu aruŋ.